ທາງການຕຳຫຼວດລາວກວດພົບອຸປະກອນ ແລະ ວັດຖຸດິບສຳລັບຜະລິດຢາເສບຕິດໃນລາວເປັນຄັ້ງທຳອິດ ທັງຍັງຊີ້ໃຫ້ເຫັນວ່າ
ຂະບວນການຄ້າຢາເສບຕິດມີເຄືອຂ່າຍໃນທຸກປະເທດໃນເຂດລຸ່ມແມ່ນ້ຳຂອງ.
ເຈົ້າໜ້າທີ່ຕຳຫຼວດໃນໜ່ວຍປາບປາມຢາເສບຕິດ ເປີດເຜີຍວ່າການກວດຄົ້ນສະຖານທີ່ຕ່າງໆທີ່ຖືກສົງໃສວ່າມີການລັກລອບຜະລິດຢາເສບຕິດໃນທົ່ວປະເທດລາວໃນຕະຫຼອດປີ 2014 ທີ່ຜ່ານມາ ນອກຈາກຈະສາມາດຈັບກຸມນັກຄ້າ ແລະ ຍຶດຢາເສບຕິດຂອງກາງໄດ້ຢ່າງຫຼວງຫຼາຍແລ້ວກໍຍັງເຮັດໃຫ້ຮັບຮູ້ເປັນຄັ້ງທຳອິດວ່າໄດ້ມີການລັກລອບຜະລິດເຮໂຣອິນ ແລະ ຢາບ້າຢູ່ໃນລາວແລ້ວອີກດ້ວຍ.
ທັງນີ້ໂດຍໜ່ວຍປາບປາມຢາເສບຕິດໄດ້ກວດພົບອຸປະກອນສຳລັບຜະລິດເຮໂຣອິນ ແລະ ເຄື່ອງອັດເມັດຢາບ້າຈຳນວນຫຼາຍເຄື່ອງທີ່ສາມາດເຄື່ອນຍ້າຍເພື່ອຫຼົບໜີການຈັບກຸມໄດ້ຢ່າງຄ່ອງຕົວ ແລະ ເປັນເທັກໂນໂລຈີ ສະໄໝໃໝ່ທີ່ຖືກນຳມາໃຊ້ໃນການຜະລິດເຮໂຣອິນ ແລະ ຢາບ້າເປັນການສະເພາະ ທັງຍັງເປັນອຸປະກອນທີ່ມີຂະໜາດກະທັດຮັດທີ່ສາມາດເຄື່ອນຍ້າຍ ແລະ ຊຸກເຊື່ອງໄວ້ໃນຕູ້ໄດ້ດ້ວຍ.
ຍິ່ງໄປກວ່ານັ້ນໜ່ວຍປາບປາມຢາເສບຂອງລາວ ກໍຍັງສາມາດຈັບກຸມນັກຄ້າຢາເສບຕິດໄດ້ 2,140 ຄົນພ້ອມກັນຍຶດເຮໂຣອິນໄດ້ 165 ກິໂລກຼາມ ຢາບ້າ 15 ລ້ານກວ່າເມັດ ກັນຊາແຫ້ງຫຼາຍກວ່າ 5 ໂຕນ ຝິ່ນ 89 ກິໂລກຼາມ ຢາໄອສ 27 ກິໂລກຼາມ ໂຄນເຄນຫຼາຍກວ່າ 10 ກິໂລກຼາມ ສານເຄມີທີ່ໃຊ້ໃນການຜະລິດຢາບ້າ ແລະ ເຮໂຣອິນ 122 ກິໂລກຼາມ ອຸປະກອນທີ່ໃຊ້ໃນການຜະລິດຢາອີກ 10 ກວ່າໜ່ວຍ ແລະ ອາວຸດສົງຄາມຫຼາຍກວ່າ 100 ລາຍການ ພ້ອມລູກປືນອີກ 2,000 ກວ່ານັດ ແລະ ຊັບສິນຕ່າງໆຫຼາຍຮ້ອຍຕື້ກີບ
ທາງດ້ານທ່ານ ກຸ ຈັນສີນາ ປະທານຄະນະກຳມະການຄວບຄຸມ ແລະ ກວດກາຍາເສບຕິດແຫ່ງຊາດໄດ້ຖະແຫຼງຍອມຮັບວ່າປັນຫາຢາເສບຕິດໃນລາວເປັນບັນຫາທີ່ຮຸນແຮງຂຶ້ນນັບມື້ ຫາກແຕ່ທາງການລາວກໍໄດ້ດຳເນີນມາດຕະການສະກັດກັ້ນ ແລະ ປາບປາມຢ່າງເຂັ້ມງວດຫຼາຍຂຶ້ນທັງພາຍໃນປະເທດ ແລະ ທີ່ພົວພັນກັບຕ່າງປະເທດໂດຍສະເພາະແມ່ນການຮ່ວມມືກັບປະເທດເພື່ອນບ້ານໃນລຸ່ມແມ່ນ້ຳຂອງທີ່ມີຊາຍແດນຕິດຕໍ່ກັບລາວນັ້ນ ທາງການລາວຍັງໄດ້ສ້າງຕັ້ງໜ່ວຍພິເສດຂຶ້ນມາຮັບຜິດຊອບໃນການຮ່ວມມືກັບໜ່ວຍງານຂອງປະເທດເພື່ອນບ້ານເປັນການສະເພາະອີກດ້ວຍດັ່ງທີ່ທ່ານ ກຸ ໄດ້ຢືນຢັນວ່າ
“ເຈົ້າໜ້າທີ່ຕຳຫຼວດໄດ້ຮ່ວມມືກັບພາກສ່ວນກ່ຽວຂ້້ອງຂັ້ນຕ່າງໆປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງສຳລັບກັບບັນດາປະເທດເພື່ອນບ້ານທີ່ໃກ້ຄຽງນັ້ນ ພວກເຮົາໄດ້ມີກອງປະຊຸມສອງຝ່າຍ ຫຼາຍຝ່າຍ ໃນລະດັບຊາດ ແລະ ລະດັບທ້ອງຖິ່ນ ນອກຈາກນັ້ນພວກເຮົາຍັງໄດ້ສ້າງຕັ້ງໜ່ວຍປະສານງານກວດກາ ແລະ ຄວບຄຸມຢາເສບຕິດຕາມຊາຍແດນໃຫ້ສາມາດປະຕິບັດວຽກງານໄດ້ຢ່າງມີປະສິດທິຜົນ.”
ກ່ອນໜ້ານີ້ ຄະນະກຳມະການຄວບຄຸມ ແລະ ກວດກາຢາເສບຕິດແຫ່ງຊາດລາວ ກໍໄດ້ລາຍງານວ່າເຂດຊາຍແດນທາງບົກລະຫວ່າງ ລາວ ກັບ ຫວຽດນາມ ໄດ້ຖືກຂະບວນການຄ້າຢາເສບຕິດຂ້າມຊາດສວຍໃຊ້ເປັນເສັ້ນທາງລັກລອບຂົນຢາເສບຕິດຈາກເຂດສາມຫຼ່ຽມທອງຄຳໄປຕ່າງປະເທດຫຼາຍຂຶ້ນນັບມື້ ໂດຍເສັ້ນທາງທີ່ແກ໊ງຄ້າຢາເສບຕິດນຳໃຊ້ຫຼາຍທີ່ສຸດໃນລາວກໍຄືຖະໜົນເລກ 13 ຈາກພາກເໜືອຕໍ່ມາຍັງຖະໜົນເລກ 9 ໃນແຂວງສະຫວັນນະເຂດ ຕໍ່ໄປຍັງຫວຽດນາມ ແລະ ປະເທດທີ 3 ຕາມລຳດັບ.
ຍິ່ງໄປກວ່ານັ້ນການທີ່ຂະບວນການຄ້າຢາເສບຕິດຂ້າມຊາດໄດ້ຫັນມາໃຊ້ເຂດແດນລາວເປັນເສັ້ນທາງໃນການລັກລອບຂົນສົ່ງຢາເສບຕິດຈາກເຂດສາມຫຼ່ຽມທອງຄຳໄປຍັງປະເທດທີ 3 ຫຼາຍຂຶ້ນດັ່ງກ່າວນີ້ຍັງເປັນປັດໃຈສຳຄັນທີ່ຊຸກຍູ້ໃຫ້ເຍົາວະຊົນລາວພາກັນຫັນໄປຊົມໃຊ້ຢາເສບຕິດເພີ່ມຂຶ້ນນັບມື້ອີກດ້ວຍໂດຍສະເພາະແມ່ນການເສບຢາບ້າໃນກຸ່ມນັກຮຽນ-ນັກສຶກສານັ້ນຖືເປັນບັນຫາທີ່ໜ້າເປັນຫ່ວງທີ່ສຸດ.
ໂດຍການສຸ່ມກວດນ້ຳປັດສະວະຂອງນັກຮຽນໃນເຂດ 145 ເມືອງພົບວ່າມີນັກຮຽນເຖິງໜຶ່ງແສນກວ່າຄົນທີ່ໃຊ້ຢາ ແລະ 2 ແສນກວ່າຄົນຢູ່ໃນສິ່ງແວດລ້ອມທີ່ຈະເຂົ້າໄປຫຍຸ້ງກ່ຽວກັບຢາເສບຕິດໃນປັດຈຸບັນ.
