ລິ້ງ ສຳຫລັບເຂົ້າຫາ

logo-print

ນາ​ຍົກ​ລັດ​ຖະ​ມົມ​ນຕີ​ລາວ ຊົມ​ເຊີຍ​ຜົນງານຂອງການ​ຫລຸດ​ຜ່ອນ​ ​ຄວາມທຸກ​ຈ​ົນ


ກອງ​ປະ​ຊຸມ ຫລຸດ​ຜ່ອນ​​ຄວາມທຸກ​ຈ​ົນ ໃນ ສ​ປ​ປ ລາວ.

ນາ​ຍົກ​ລັດ​ຖະ​ມົນ​ຕີ​ລາວ ສະ​ແດງ​ການຊົມ​ເຊີຍຕໍ່​ຜົນ​ການ​ດຳ​ເນີນງານຂອງ​ກອງ​ທຶນ​ພັດ
​ທະ​ນາ​ ເພື່ອຫລຸດ​ຜ່ອນບັນ​ຫາ​ຍາກ​ຈົນ​ຂອງ​ປະ​ຊາ​ຊົນ​ບັນ​ດາ​ເຜົ່າ​ໃນ​ເຂດ​ຊົນ​ນະ
​ບົດ​ໃນ​ໄລ​ຍະ 15 ປີ​ຜ່ານ​ມາ ຊຶ່ງ​ຊົງ​ລິດ ໂພນ​ເງິນ ມີ​ລາຍ​ງານ​ຈາກ​ບາງກອກ.

ທ່ານ​ທອງ​ລຸນ ສີ​ສຸ​ລິດ ນາ​ຍົກ​ລັດ​ຖະ​ມົນ​ຕີ​ລາວ ໄດ້​ສະ​ແດງ​ການ​ຊົມ​ເຊີຍ​ຕໍ່​ຜົນ​ການ​ດຳ​
ເນີນ​ງານ ຂອງ​ກອງ​ທຶນ​ລົບ​ລ້າງ​ຄ​ວາມ​ທຸກ​ຍາກ​ໃນ​ຊ່ວງ​ປີ​ 2003-2018 ກໍ​ຄື 15 ປີ​ທີ່
​ຜ່ານ​ມາ​ວ່າ​ກອງ​ທຶນ​ລົບ​ລ້າງ​ຄວາມ​ທຸກ​ຍາກ​ໄດ້​ເຕີບ​ໃຫຍ່​ຂະ​ຫຍາຍ​ໂຕ​ເປັນ​ກ້າວໆ​ມາ​
ໂດຍ​ໄດ້​ລະ​ດົມ​ທຶນ​ຈາກ​ຕ່າງ​ປະ​ເທດ​ເຂົ້າ​ໃນ​ການ​ພັດ​ທະ​ນາ​ຊົນ​ນະ​ບົດ ເປັນ​ຕົ້ນ​ແມ່ນ
​ການ​ສ້າງ​ຖະ​ໜົນ​ຫົນ​ທາງ ສ້າງ​ໃຫ້​ປະ​ຊາ​ຊົນໄດ້ຊົມ​ໃຊ້​ໄຟ​ຟ້າ ​ສ້າງຊົນ​ລະ​ປະ​ທານ ແລະການສ້າງ​ເງື່ອນ​ໄຂຕ່າງໆ ເພື່ອ​ເຮັດ​ໃຫ້​ປະ​ຊາ​ຊົນ ສາ​ມາດ​ຜະ​ລິດ​ສິນ​ຄ້າ​ໄດ້​ຫຼາຍ
ຂຶ້ນ ແລະ​ເຮັດ​ໃຫ້​ມີລາຍ​ຮັບ ທີ່​ສາ​ມາດ​ລ້ຽງ​ດູ​ຄອບ​ຄົວໄດ້​ຢ່າງ​ພຽງ​ພໍ ຮວມ​ເຖິງ​ການ​
ຂ​ະ​ຫຍາຍໂອ​ກາດ​ດ້ານ​ການ​ສຶກ​ສາ​ໄປ​ສູ່​ຊົນ​ນະ​ບົດ​ໄດ້​ຢ່າງກວ້າງ​ຂວາງ​ດັ່ງ​ທີ່ ທ່ານ​
ທອງ​ລຸ່ນ ໄດ້ຢືນ​ຢັນ​ວ່າ

“ຂ້າ​ພະ​ເຈົ້າ​ຄຶດ​ວ່າກອ​ງ​ທຶນ​ລົບ​ລ້າງ​ຄວ​າມ​ທຸກ​ຍາກ ມີ​ຜົນ​ງານ​ຫຼາຍ ຄື​ສູ່​ມື້​ນີ້ ອັດ​ຕາ​
ເຂົ້າ​ຮ​ຽນ​ຊັ້ນ​ປະ​ຖົມ​ຂອງ​ເດັກໃນເກນ​ອາ​ຍຸ 5 ປີ ຢູ່​ໃນ​ບັນ​ດາ​ບ້ານ​ເປົ້າ​ໝາຍ ຫຼື​ວ່າ
​ເມືອງ​ເປົ້າ​ໝາຍ ທີ່​ເຮົາ​ຈະ​ລົບ​ລ້າງ​ຄວາມ​ທຸກ​ຍາກ​ກໍ​ບັນ​ລຸ​ເຖິງ 98.8 ​ສ່ວນ​ຮ້ອຍອັນ​ນີ້
​ມັນ​ເປັນ​ໂຕ​ເລກ​ທີ​ສູງ ຂ້າ​ພ​ະ​ເຈົ້າ​ຄິດ​ວ່າ​ກອງ​ທຶນ​ນີ້​ໄດ້​ເຮັດ​ໜ້າ​ທີ່​ຂອງ​ຕົນ​ຢ່າງ​ເອົາ​ໃຈ​
ໃສ່ ໄດ້​ທຸ່ມ​ເທ​ເຮືອ​ແຮງ ສະ​ຕິ​ປັນ​ຍາ ພັດ​ທະ​ນາ​ຊົນ​ນະບົດ ​ຖື​ປະ​ຊາ​ຊົນ​ ບ້ານເມືອງ
ແລະ​ຄອບ​ຄົວ​ທຸກ​ຍາກ​ເປັນ​ເປົ້າ​ໝາຍ​ອັນ​ນີ້​ໄດ້​ຮັບ​ຜົນ​ດີ.”

ທາງ​ດ້ານ​ເຈົ້າ​ໜ້​າ​ທີ່​ທະ​ນາ​ຄານ​ໂລກ​ປະ​ຈຳ​ລາວ ເປີດເຜີຍ​ວ່າ​ກອ​ງ​ທຶນ​ລົບ​ລ້າງ​ຄວາມ​
ທຸກ​ຍາກ​ໃນ​ລາວ ໄດ້​ຮັບ​ການ​ສະ​ໜັ​ບ​ສະ​ໜູນ​ງົບ​ປະ​ມານຄຶດ​ເປັນ​ມູນ​ຄາ​ລວມ 54 ລ້ານ​
ໂດ​ລາ​ສະ​ຫະ​ລັດ ສຳ​ລັບ​ນໍ​າໃຊ້​ໃນ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ພັ​ດ​ທະ​ນາ​ພື້ນ​ຖານ​
ໂຄງ​ຮ່າງເພື່ອ​ແກ້​ໄຂ​ບັນ​ຫາ​ຄວາມ​ຍາກ​ຈົນຂອງ​ປະ​ຊາ​ຊົນ​ໃນ​ເຂດ​ຊົນ​ນະ​ບົດ​ໃນ​ຊ່ວງ​ປີ 2017-2019 ໃນ​ນີ້​ລັດ​ຖະ​ບານ​ລາວ​ໄດ້​ປະ​ກອບ​ສ່ວນ​ພຽງ 6 ລ້ານ​ໂດ​ລາ​ສະ​ຫະ​ລັດ
ສ່ວນ​ທີ່​ເຫຼືອ​ກໍ​ກູ້​ຢືມ​ຈາກ​ທະ​ນາ​ຄານ​ໂລກ 30 ລ້ານ​ໂດ​ລາ​ສະ​ຫະ​ລັດ ແລະ​ລັດ​ຖະ​ບານ
​ສະ​ວິດ​ເຊ​ແລນ ຊ່ວ​ຍ​ເຫຼືອ 18 ລ້ານ​ໂດ​ລາ​ສະ​ຫະ​ລັດ.

ພາຍ​ໃຕ້​ສະ​ພາບ​ການ​ທີ່​ມີ​ງົບ​ປະ​ມານ​ຢ່າງ​ຈຳ​ກັດ​ດັ່ງ​ກ່າວ ກໍ​ເຮັດ​ໃຫ້​ການ​ຈັດ​ຕັ້ງ​ປະ​ຕິ​
ບັດ​ວຽກ​ງານ​ຕ່າງໆ​ຂອງກອງ​ທຶນ​ຫລຸດ​ຜ່ອນ​ຄວາມທຸ​ກຍາກໃນ​ລາວ ສາ​ມາດ​ດຳ​ເນີນ​
ໃນ​ລາວ​ສາ​ມາດ​ດຳ​ເນີນການ​ໄດ້​ຢ່າງ​ຈຳ​ກັດ​ດ້ວຍ​ເຊັ່ນ​ກັນໂດຍ​ເຫັນ​ໄດ້​ຈາກ​ການ​ທີ່​ລັດ
ຖະ​ບານ​ລາວ​ສ​າ​ມາດ​ແກ້​ໄຂ​ບັນ​ຫາ​ຍາກ​ຈົນ​ຂອງ​ປະ​ຊາ​ຊົນ​ໄດ້​ຈຳ​ນວນ 12,011 ຄອບ​
ຄົວ ລົ​ບ​ລ້າງ​ຄວາມຍາກ​ຈົນ​ໄດ້​ຢ່າງ​ສິ້ນ​ເຊີງ​ໃນ 200 ບ້ານ ແລະ​ສ້າງ​ຕັ້ງ​ບ້ານ​ພັດທະ​ນາ​
ໄດ້​ເພີ້ມ​ຂຶ້ນ 561 ບ້ານຊຶ່ງ​ເຮັດ​ໃຫ້​ໃນ​ທົ່ວ​ປະ​ເທດ​ລາວ​ມີ​ບ້ານ​ພັດ​ທະ​ນາ​ແລ້ວ 4,138
ບ້ານ ແລະ​ມີ​ບ້ານ​ໃຫ​ຍ່ທີ່​ກາຍ​ເປັນ​ໂຕ​ເມືອງ​ນ້ອຍ​ໃນ​ຊົນ​ນະ​ບົດ​ເພີ້ມ​ຂຶ້ນ​ຈາກ 45 ເປັ​ນ
56 ເມືອງ.

ແຕ່​ຢ່າງ​ໃດ​ກໍ​ຕາ​ມ​ຍັງ​ມີ​ຄອບ​ຄົວ​ທີ່​ຍາກ​ຈົນ​ເຫຼຶອ​ຢູ່​ເຖິງ 64,593 ຄອບ​ຄົວ ແລະ​ບ້ານ​
ທຸກ​ຍາກ​ອີກ 1,536 ບ້ານ ທີ່​ລັດ​ຖະ​ບານ​ລາວ​ຈະ​ຕ້ອງ​ດຳ​ເນີນ​ມາດ​ຕະ​ການ​ເພື່ອ​ລົບ​
ລ້າງ​ບັນ​ຫາ​ຍາກ​ຈົນ​ໃຫ້​ໄດ້​ຢ່າງ​ສິ້ນ​ເຊິງ​ຕາມ​ເປົ້າ​ໝາຍ​ທີ່​ວາງ​ໄວ້​ພາຍ​ໃນ​ປີ 2020
ໝາຍ​ຄວ​າມ​ວ່າ​ຍັງ​ມີ​ເວ​ລາອີກ 2 ປີ​ທີ່​ລັດ​ຖະ​ບ​ານ​ລາວ​ຈະ​ຕ້ອງ​ດຳ​ເນີນ​ມາດ​ຕະ​ການ
​ຕ່າງໆ ເພື່ອ​ໃຫ້​ບັນ​ລຸ​ເປົ້າ​ໝາຍ​ຂະ​ນະ​ທີ່​ການ​ຈັດ​ຕັ້ງ​ປະ​ຕິ​ບັດ​ໄລ​ຍະ​ຜ່ານ​ມາ ລັດ​ຖະ
​ບານ​ລາວ​ກັບ​ຍັງ​ສາ​ມາດ​ແກ້​ໄຂ​ບັນ​ຫາ​ຍາກ​ຈົນ​ຂອງ ​ປະ​ຊາ​ຊົນ​ໄດ້​ຕ່ຳ​ກວ່າ​ເປົ້າ​ໝາຍ​
ກໍ​ຄື​ສາ​ມາດ​ລົບ​ລ້າງ​ຄວາມ​ຍາກ​ຈົນ​ໄດ້​ບໍ່​ເຖິງ 2 ເປີ​ເຊັນ ໃນ​ທົ່ວ​ປະ​ເທດ ສ່ວນ​ອັດ​ຕາ​
ການ​ເຂົ້າ​ເຖິງ​ຫລັກ​ປະ​ກັນ​ໃນ​ດ້ານ​ສຸ​ຂ​ະ​ພາບ​ຂອງ​ປະ​ຊາ​ຊົນ​ລາວ ກໍ​ສາ​ມາດ​ຈັດ​ຕັ້ງ
​ປະ​ຕິ​ບັດ​ໄດ້​ພຽງ 34.7 ເປີ​ເຊັນ ໃນ​ຂະ​ນະ​ທີ່​ເປົ້າ​ໝາຍ​ໄດ້​ວາງ​ເອົາ​ໄວ້​ເຖິງ 51 ເປີ​ເຊັນ
ຂອງ​ຈຳ​ນວນ​ປະ​ຊາ​ກອນ​ລາວ​ທັງ​ປະ​ເທດ.

ສ່ວນ​ສະ​ພາບ​ເສດ​ຖະ​ກິດ​ ແລະ​ສັງ​ຄົມ​ແຫ່ງ​ສະ​ຫະ​ປະ​ຊາ​ຊາດ ຄາດ​ໝາຍ​ໄວ້ວ່າ

ລາວ​ຈະ​ລຸດ​ພົ້ນ​ຈາກ​ສະ​ພາບ​ດ້ອຍ​ພັດ​ທະ​ນາ​ໃນ​ປີ 2024 ເພາະ​ລັດ​ຖະ​ບານ​ລາວ​ປະ
​ຕິ​ບັດ​ໄດ້​ແລ້ວ 2 ໃນ 3 ເງື່ອນ​ໄຂ ກໍ​ຄື ຍອດ​ລາຍ​ຮັບ​ແຫ່​ຊາດ​ຕໍ່​ຫົວ​ຄົນ (GNI) ຕ້ອງ​ບໍ່​
ຕ່ຳ​ກວ່າ 1,242 ໂດ​ລາ​ຕໍ່​ຄົນ ໂດຍ​ລັດ​ຖະ​ບານ​ລາວ​ປະ​ຕິ​ບັດ​ໄດ້​ທີ່​ລະ​ດັບ 1,996 ໂດ​
ລາ​ສະ​ຫະ​ລັດ ຕໍ່​ຄົນ​ໃນ​ປີ 2015 ກັບ​ດັດ​ຊະ​ນີ​ຊັບ​ສິນ​ມະນຸດ (HAI) ຕ້ອງ​ເຖິງ​ອັດ​ຕາ​
ສະ​ເລ່ຍ 66 ເປີ​ເຊັນ ຊຶ່​ງ​ລັດ​ຖະ​ບານ​ລາວ​ປະ​ຕິ​ບັດ​ໄດ້​ທີ່​ລະ​ດັບ 72.8 ເປີ​ເຊັນ​ ໃນ​ປີ
2015 ຈຶ່ງ​ເຫຼືອ​ພຽງແຕ່ດັດ​ຊະ​ນີຄວາມ ອ່ອນ​ໄຫວ​ທາງ​ເສດ​ຖະ​ກິດ (EVI) ທີ່​ຕ້ອງ​ຕ່ຳ​ກວ່າ
32 ເປີ​ເຊັນ ຫາກ​ແຕ່​ລັດ​ຖະ​ບານ​ລາວ​ຍັງ​ສາ​ມາດ​ຕັດ​ຕັ້ງ​ປະ​ຕິ​ບັດ​ໄດ້​ທີ່​ລະ​ດັບ 33.7
ເປີ​ເຊັນ​ໃນ​ປັດ​ຈຸ​ບັນ​ນີ້.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG