ລິ້ງ ສຳຫລັບເຂົ້າຫາ

logo-print

ນາຍົກລາວ ແຕ່ງຕັ້ງຄະນະພິເສດ ເພື່ອສືບຫາ ສາເຫດ ເຂື່ອນເຊປຽນ-ເຊນໍ້ານ້ອຍແຕກ


ເຈົ້າໜ້າທີ່ປ້ອງກັນປະເທດ ລາວ ຖະແຫຼງຂ່າວ ກ່ຽວກັບ ໄພພິບັດຈາກເຂື່ອນເຊປຽນ-ເຊນໍ້ານ້ອຍແຕກໃນແຂວງອັດຕະປື.

ນາຍົກລັດຖະມົນຕີ ລາວ ແຕ່ງຕັ້ງຄະນະສະເພາະກິດ ໃຫ້ຮັບຜິດຊອບການສືບສວນ
ເພື່ອຫາສາເຫດທີ່ເຮັດໃຫ້ເຂື່ອນໄຟຟ້າເຊປຽນ-ເຊນໍ້ານ້ອຍແຕກ ແລະ ສົ່ງຜົນກະທົບ
ຕໍ່ປະຊາຊົນ ລາວ ຢ່າງຮຸນແຮງ.

ທ່ານ ທອງລຸນ ສີສຸລິດ ນາຍົກລັດຖະມົນຕີ ຖະແຫຼງຢືນຢັນວ່າ ການແຕ່ງຕັ້ງຄະນະ
ສະເພາະກິດຂຶ້ນມາໃນຄັ້ງນີ້ມີເປົ້າໝາຍເພື່ອຮັບປະກັນວ່າ ການສືບສວນສອບສວນ
ເພື່ອຫາສາເຫດທີ່ເຮັດໃຫ້ເຂື່ອນໄຟຟ້າເຊປຽນ-ເຊນໍ້ານ້ອຍແຕກ ແລະ ສົ່ງຜົນກະ
ທົບຕໍ່ປະຊາຊົນ ລາວ ຢ່າງຮຸນແຮງນັ້ນ ໄດ້ດຳເນີນໄປຢ່າງໂປ່ງໄສ ແລະ ປາສະຈາກ
ການແຊກແຊງຈາກພາຍນອກ ໂດຍການຮ່ວມມືກັບພາກສ່ວນທີ່ກ່ຽວຂ້ອງທັງໃນລະ
ດັບສູນກາງ ແລະ ທ້ອງຖິ່ນຢ່າງໃກ້ຊິດເພື່ອແກ້ໄຂບັນຫາ ແລະ ຜົນກະທົບທີ່ເກີດຂຶ້ນ
ທັງໃນໄລຍະສະເພາະໜ້າ ແລະ ໄລຍະຍາວໃຫ້ໄດ້ຢ່າງມີປະສິດທິຜົນ ຊຶ່ງລວມເຖິງ
ການກວດກາ ແລະ ກຳນົດການຮັບຜິດຊອບຂອງກຸ່ມຜູ້ລົງທຶນໃນໂຄງການທີ່ມີຕໍ່ຜົນ
ເສຍຫາຍທີ່ເກີດຂຶ້ນດ້ວຍ ດັ່ງທີ່ທ່ານ ທອງລຸນ ຢືນຢັນວ່າ

"ໜ່ວຍສະເພາະກິດດັ່ງກ່າວນີ້ຈະເຮັດໜ້າທີ່ທັງໄລຍະສະເພາະໜ້າ ແລະ ຍາວນານ
ຄະນະສະເພາະກິດນີ້ຈະໄດ້ປະເມີນຜົນເສຍຫາຍ ທັງຊອກຫາສາເຫດທີ່ພາໃຫ້ເກີດ
ອຸບັດຕິເຫດການແຕກຫັກຂອງອ່າງເກັບນໍ້າດັ່ງກ່າວນັ້ນ ລວມທັງຈະໄດ້ຮ່ວມກັບບໍລິ
ສັດທີ່ໄດ້ຮັບການສຳປະທານນັ້ນ ກວດກາຄວາມຮັບຜິດຊອບ ແລະ ພັນທະຂອງແຕ່
ລະຝ່າຍ ເພື່ອແກ້ໄຂບັນຫານີ້ຕໍ່ໄປ.

ໂດຍສະເພາະກິດດັ່ງກ່າວນີ້ມີທ່ານ ສອນໄຊ ສີພັນດອນ ຮອງນາຍົກລັດຖະມົນຕີເປັນ
ຫົວໜ້າຄະນະທີ່ປະກອບດ້ວຍການນຳຂັ້ນສູງຈາກກະຊວງປ້ອງກັນປະເທດ, ກະຊວງ
ກະສິກຳ ແລະ ປ່າໄມ້, ກະຊວງແຮງງານ ແລະ ສະຫວັດດີການສັງຄົມ, ກະຊວງພະລັງ
ງານ ແລະ ບໍ່ແຮ່, ກະຊວງພາຍໃນ ແລະ ອຳນາດການປົກຄອງແຂວງອັດຕະປື ຊຶ່ງບັນ
ດາອົງການອະນຸລັກສິ່ງແວດລ້ອມທຳມະຊາດໃນລຸ່ມແມ່ນໍ້າຂອງ ແລະ ສາກົນ ມອງ
ວ່າບໍ່ສາມາດທີ່ຈະຮັບປະກັນເຖິງຄວາມໂປ່ງໄສໃນການສືບສວນສອບສວນໄດ້ເລີຍ
ເນື່ອງຈາກວ່າເປັນຄະນະສະເພາະກິດທີ່ບໍ່ມີການປະກອບສ່ວນຂອງຜູ້ຊ່ຽວຊານຈາກ
ພາຍນອກນັ້ນເອງ.

ສ່ວນທ່ານ ວິທູນ ເພີ່ມພົງສາຈະເລີນ ຜູ້ອຳນວຍການເຄືອຂ່າຍພະລັງງານເພື່ອລະບົບ
ນິເວດທຳມະຊາດໃນລຸ່ມແມ່ນໍ້າຂອງຢືນຢັນວ່າ ບັນດາອົງການອະນຸລັກສິ່ງແວດລ້ອມ
ໃນລຸ່ນແມ່ນໍ້າຂອງ ແລະ ສາກົນໄດ້ສະແດງການຄັດຄ້ານຕໍ່ໂຄງການເຂື່ອນໄຟຟ້າ
ເຊປຽນ-ເຊນໍ້ານ້ອຍໃນແຂວງອັດຕະປືມາໂດຍຕະຫຼອດ ເພາະເຊື່ອວ່າຈະສົ່ງຜົນກະ
ທົບຢ່າງຮຸນແຮງ ທັງຕໍ່ສັງຄົມ ແລະ ສິ່ງແວດລ້ອມທຳມະຊາດໃນ ລາວ ແລະ ລຸ່ມແມ່
ນໍ້າຂອງ ເນື່ອງຈາກເປັນໂຄງການທີ່ຈະປ່ຽນແປງສະພາບແວດລ້ອມທຳມະຊາດຂອງ
ແມ່ນໍ້າໃນ ລາວ ເຖິງ 3 ສາຍ ໂດຍການຜະລິດໄຟຟ້າດ້ວຍການຜັນນໍ້າຈາກເຊປຽນ
ໄປຍັງເຊນໍ້ານ້ອຍ ແລ້ວກະປ່ອຍລົງສູ່ເຊກອງ ແລະ ລົງໄປສູ່ແມ່ນໍ້າຂອງຕາມລຳດັບ
ນັ້ນ ມັນເປັນການເພີ່ມປະລິມານນໍ້າຈາກລະດັບທຳມະຊາດຂອງແມ່ນໍ້າແຕ່ລະສາຍ
ທັງຍັງມີຄວາມແຕກຕ່າງກັນທາງດ້ານລະບົບນິເວດວິທະຍາອີກດ້ວຍ.

ທາງດ້ານທ່ານ ຄຳມະນີ ອິນທິລາດ ລັດຖະມົນຕີວ່າການກະຊວງພະລັງງານ ແລະ ບໍ່
ແຮ່ ຖະແຫຼງວ່າການແຕກຂອງເຂື່ອນໄຟຟ້າເຊປຽນ-ເຊນໍ້ານ້ອຍໃນຄັ້ງນີ້ເກີດຈາກ
ການກໍ່ສ້າງທີ່ບໍ່ໄດ້ມາດຕະຖານ ຊຶ່ງທາງການ ລາວ ຈະດຳເນີນການສືບສວນສອບ
ສວນເພື່ອຊອກຫາພະຍານ ແລະ ຫຼັກຖານຕ່າງໆ ສຳລັບນຳໃຊ້ປະກອບການດຳເນີນ
ມາດຕະການຕ່າງໆ ເພື່ອເອົາຜິດກັບກຸ່ມຜູ້ລົງທຶນໃນໂຄງການຕໍ່ໄປ.

ທ່ານ ຄຳມະນີ ຢືນຢັນດ້ວຍວ່າ ໄຟນໍ້າຖ້ວມໄດ້ເກີດຂຶ້ນຢ່າງກະທັນຫັນໃນຕອນກາງ
ຄືນຂອງວັນທີ 23 ກໍລະກົດ 2018 ໂດຍເປັນຜົນກະທົບຈາກພາຍຸເຊິ່ນຕິງ ຊຶ່ງເຮັດໃຫ້
ປະລິມານນໍ້າຝົນລົ້ນອ່າງນໍ້າຂອງເຂື່ອນໄຟຟ້າເຊປຽນ-ເຊນໍ້ານ້ອຍ ແລະ ເກີດການ
ແຕກຕັ້ງແຕ່ເວລາ 20 ໂມງຂອງວັນທີ 23 ກໍລະກົດດັ່ງກ່າວແລ້ວກໍໄຫຼເຂົ້າຖ້ວມເມືອງ
ສະໜາມໄຊຢ່າງໜັກໜ່ວງ ແລະ ດ້ວຍຜົນກະທົບທີ່ເກີດຂຶ້ນຢ່າງກວ້າງຂວາງ ກໍຍັງ
ເຮັດໃຫ້ລັດຖະບານ ລາວ ຕ້ອງປະກາດໃຫ້ເຂດດັ່ງກ່າວເປັນພື້ນທີ່ປະສົບໄພພິບັດສຸກ
ເສີນລະດັບຊາດຢ່າງເປັນທາງການ ນັບຕັ້ງແຕ່ວັນທີ 24 ກໍລະກົດ 2018 ເປັນຕົ້ນມາ
ຈົນເຖິງປັດຈຸບັນນີ້ອີກດ້ວຍ.

ໂຄງການເຂື່ອນໄຟຟ້າເຊປຽນ-ເຊນໍ້ານ້ອຍ ເປັນການຮ່ວມທຶນລະຫວ່າງບໍລິສັດ SK
ວິສະວະກຳ ແລະ ກໍ່ສ້າງຂອງເອກະຊົນ ລາວ ກັບລັດວິສາກະກິດຖືຫຸ້ນລາວ (Lao
Holding) ພ້ອມດ້ວຍບໍລິສັດ Western Power ຈາກ ເກົາຫຼີໃຕ້ ແລະ ກຸ່ມບໍລິສັດໄຟ
ຟ້າຣາດຊະບູຣີ ຈຳກັດ (ມະຫາຊົນ) ຂອງ ໄທ ດ້ວຍສັດສ່ວນການຮ່ວມທຶນ 26 ເປີ
ເຊັນ- 24 ເປີເຊັນ- 25 ເປີເຊັນຂອງມູນຄ່າການລົງທຶນລວມ 1,020 ລ້ານໂດລາ ໂດຍ
ມີກຳນົດກໍ່ສ້າງແລ້ວສຳເລັດໃນປີ 2019 ມີກຳລັງຕິດຕັ້ງ 410 ເມກະວັດ ໂດຍ 90 ເປີ
ເຊັນຈະສົ່ງອອກໄປ ໄທ ຕະຫຼອດອາຍຸສຳປະທານ 27 ປີ ແລະ 10 ເປີເຊັນຈະຂາຍ
ໃຫ້ລັດວິສາຫະກິດໄຟຟ້າ ລາວ ເພື່ອຕອບສະໜອງການຊົມໃຊ້ໃນ ລາວ.

ເບິ່ງຄວາມເຫັນ (4)

ຟໍຣັມສະແດງຄວາມເຫັນ ກ່ຽວກັບເລື່ອງນີ້ ອັດແລ້ວ

ທ່ານອາດຈະມັກເລື້ອງນີ້ຄືກັນ

XS
SM
MD
LG