ນາຍົກລັດຖະມົນຕີລາວ ສັ່ງປິດໂຮງເລື່ອຍ 1,206 ແຫ່ງ ທີ່ກ່ຽວຂ້ອງໃນການລັກລອບ
ຕັດ ແລະຄ້າໄມ້ຜິດກົດໝາຍ ໂດຍມີບັນດາພະນັກງານພັກລັດ ເຂົ້າໄປມີສ່ວນໄດ້ຮັບ
ຜົນປະໂຫຍດດັ່ງກ່າວດ້ວຍ.
ທ່ານຈະເລີນ ເຢຍປາວເຮີ ລັດຖະມົນຕີ ແລະໂຄສົກລັດຖະບານລາວ ຖະແຫລງຢືນ
ຢັນວ່າ ທ່ານທອງລຸນ ສີສຸລິດ ນາຍົກລັດຖະມົນຕີ ໄດ້ມີຄຳສັ່ງໃຫ້ປິດໂຮງເລື່ອຍ 1,206
ແຫ່ງໃນປີ 2017 ທີ່ຜ່ານມາ ເນື່ອງຈາກມີສ່ວນກ່ຽວຂ້ອງໃນການລັກລອບຕັດ ແລະ
ຄ້າໄມ້ໂດຍຜິດກົດໝາຍ ແລະໃນນີ້ກໍເປັນໂຮງເລື່ອຍທີ່ດຳເນີນກິດຈະການໂດຍບໍ່ໄດ້ຂໍ
ອະນຸຍາດຕາມລະບຽບກົດໝາຍເຖິງ 1,186 ແຫ່ງ ສ່ວນອີກ 20 ແຫ່ງກໍໄດ້ເຂົ້າໄປລັກ
ລອບຕັດໄມ້ໃນເຂດປ່າສະຫງວນແຫ່ງຊາດ ຊຶ່ງການທີ່ບັນດາເຈົ້າຂອງໂຮງເລື່ອຍສາ
ມາດດຳເນີນການໄດ້ຄືແນວນີ້ກໍເພາະວ່າ ພະນັກງານພັກລັດໄດ້ເຂົ້າໄປມີສ່ວນໄດ້ຮັບ
ຜົນປະໂຫຍດດ້ວຍນັ້ນເອງ.
ຕໍ່ບັນຫາດັ່ງກ່າວ ທ່ານສົມມາດ ພົນເສນາ ລັດຖະມົນຕີວ່າການກະຊວງຊັບພະຍາກອນ
ທຳມະຊາດ ແລະສິ່ງແວດລ້ອມ ກໍຍອມຮັບວ່າໄດ້ສົ່ງຜົນກະທົບຕໍ່ການຈັດຕັ້ງປະຕິບັດແຜນການຟື້ນຟູປ່າໄມ້ ແລະສະພາບແວດລ້ອມທຳມະຊາດ ໃນລາວຢ່າງຫຼີກລ້ຽງບໍ່ໄດ້
ໂດຍສະເພາະແມ່ນການຈັດຕັ້ງປະຕິບັດແຜນການໄດ້ດຳເນີນ ໄປຢ່າງຊັກຊ້າ ແລະບໍ່ມີ
ປະສິດທິພາບ ເນື່ອງຈາກພະນັກງານພັກລັດ ທີ່ມີໜ້າທີ່ໂດຍກົງໃນວຽກງານດັ່ງກ່າວນີ້
ຍັງຂາດຄວາມຮັບຜິດຊອບທັງຕໍ່ໜ້າທີ່ຂອງພວກຕົນ ແລະຕໍ່ຜົນປະໂຫຍດຂອງປະເທດ
ຊາດ ທັງຍັງບໍ່ຊື່ສັດສຸດຈະລິດດ້ວຍ ດັ່ງທີ່ ທ່ານສົມມາດ ໄດ້ຢືນຢັນວ່າ :
“ສະມາຊິກພັກຈຳນວນນຶ່ງຍັງຈົງຈຽມ ແລະເກງໃຈບໍ່ທັນກ້າຫານພຽງພໍໃນການຕຳ
ນິຕິຊົມຊຶ່ງກັນ ແລະກັນ ບໍ່ທັນມີມາດຕະການແກ້ໄຂບັນຫາຫຍໍ້ທໍ້ຊຳ້ເຮື້ອ ໃຫ້ໄດ້ຢ່າງ
ຂາດຕົວເຖິງມີກະຍັງບໍ່ໜັກແໜ້ນເທົ່າທີ່ຄວນ ຍັງບໍ່ທັນເປັນປົກກະຕິ ກ້າວໄກມະຫາ
ຊົນ ການລົງຮາກຖານ ລົງໃກ້ຊິດຕິດແທດທ້ອງຖິ່ນບໍ່ທັນທົ່ວເຖິງ ຍັງມີຫາງສຽງທາງ
ດ້ານຄວາມບໍລິສຸດ ສັດຊື່ ບໍ່ມີຄວາມໂປ່ງໃສໃນການຄຸ້ມຄອງ ແລະໃຊ້ຈ່າຍງົບປະ
ມານ ບໍ່ປະຢັດມັດທະຍັດ ຫຼິ້ນກິນຟຸມເຟືອຍ ທັດສະນະພົວພັນທາງດ້ານສັງຄົມ ບໍ່
ທັນເປັນແບບຢ່າງໃຫ້ແກ່ມະຫາຊົນ.”
ທັງນີ້ລັດຖະບານລາວໄດ້ວາງແຜນການເພີ້ມການປົກຫູ້ມຂອງປ່າໄມ້ໃຫ້ໄດ້ 37,000
ເຮັກຕາຕໍ່ປີໂດຍແນໃສ່ການເພີ້ມຄວາມໜາແໜ້ນຂອງປ່າໄມ້ໃຫ້ເຖິງ 70 ເປີເຊັນ ຂອງ
ພື້ນທີ່ທັງໝົດຕາມແຜນຍຸດທະສາດປ່າໄມ້ແຫ່ງຊາດເຖິງປີ 2020 ໂດຍການຊຸກຍູ້ໃຫ້
ປູກຕົ້ນໄມ້ໃນເຂດອ່າງໂຕ່ງຂອງເຂື່ອນໄຟຟ້າ ແລະເຂດຄອງຊົນລະປະທານຕ່າງໆນັ້ນ
ຖືເປັນພື້ນທີ່ສຳຄັນທີ່ຈະຕ້ອງປູກຕົ້ນໄມ້ໃຫ້ໄດ້ຫຼາຍທີ່ສຸດ.
ແຕ່ຢ່າງໃດກໍຕາມທ່ານລ່ຽນ ທິແກ້ວ ລັດຖະມົນຕີວ່າການກະຊວງກະສິກຳ ແລະປ່າໄມ້
ກໍໄດ້ໃຫ້ທັດສະນະ ລັບປະເມີນວ່າ ສະພາບປ່າໄມ້ຂອງລາວໃນປັດຈຸບັນຍັງມີຄວາມ
ໜາແໜ້ນເຫຼືອຢູ່ປະມານ 40 ເປີເຊັນຂອງພື້ນທີ່ທັງໝົດ ໝາຍຄວາມວ່າໃນລະຍະນັບ
ແຕ່ປີ 2017-2020 ລັດຖະບານລາວກໍຈະຕ້ອງເພີ່ມການປົກຫູ້ມຂອງປ່າໄມ້ໃຫ້ໄດ້ໃນ
ອັດຕາສະເລ່ຍ 10 ເປີເຊັນຕໍ່ປີ ໃນທຸກຂະ ແໜງໃນທົ່ວປະເທດ ໂດຍເຂດທີ່ລັດຖະບານ
ຖືເປັນພື້ນທີ່ເປົ້າໝາຍສຳຄັນທີ່ຈະຕ້ອງຈັດຕັ້ງປະຕິບັດເພື່ອໃຫ້ບັນລຸເປົ້າໝາຍໃຫ້ໄດ້ກໍ
ຄືເຂດປ່າສະຫງວນແຫ່ງຊາດ ຊຶ່ງກໍຍັງປາກົດວ່າໄດ້ມີການລັກລອບເຂົ້າໄປຕັດໄມ້ຢູ່
ເລື້ອຍມາ.
ທັງນີ້ໂດຍອົງການອະນຸລັກສິ່ງແວດລ້ອມ Global Witness ລາຍງານວ່າ ເຂດທີ່ມີ
ການລັກລອບຕັດໄມ້ຫຼາຍທີ່ສຸດກໍຄືເຂດທີ່ຕິດຕໍ່ຊາຍແດນກັບຫວຽດນາມ ຊຶ່ງລວມເຖິງ
ເຂດປ່າສະຫງວນແຫ່ງຊາດນາກາຍໃນແຂວງຄຳມ່ວນ ຊຶ່ງບັນດານາຍທຶນ ແລະພະນັກ
ງານລັດຈຳນວນນຶ່ງໄດ້ຮວມກັນ ວ່າຈ້າງປະຊາຊົນລາວໃນເຂດທ້ອງຖິ່ນໃຫ້ພາກັນເຂົ້າ
ໄປລັກລອບຕັດໄມ້ເປັນເຂດປ່າສະຫງວນແຫ່ງຊາດ ນາກາຍ ແລ້ວກໍລັກລອບຂົນໃນ
ເວລາກາງຄືນເພື່ອສົ່ງອອກໄປຊາຍແດນດ້ານຫວຽດນາມຕາມລຳດັບ.
ທາງດ້ານທ່ານສຸຊາດ ໄຊຍະກຸມມານ ຫົວໜ້າກົມປ່າໄມ້ ກະຊວງກະຊິກຳ ແລະປ່າໄມ້
ໃຫ້ການຍອມຮັບວ່າເປັນການຍາກ ແລະເປັນສິ່ງທີ່ທ້າທາຍຫຼາຍທີ່ຈະເພີ້ມການປົກຫຸ້ມ
ຂອງປ່າໄມ້ໃນລາວໃຫ້ໄດ້ເຖິງ 70 ເປີເຊັນຂອງພື້ນທີ່ທັງໝົດໃນປີ 2020 ເພາະການຈັດ
ຕັ້ງປະຕິບັດນັບແຕ່ປີ 2005 ເປັນຕົ້ນມາໄດ້ປະເຊີນບັນຫາຫຼາຍດ້ານທີ່ລວມເຖິງບັນ
ຫາການປະສານງານ ລະຫວ່າງໜ່ວຍງານຂອງລັດຖະບານດ້ວຍ.
