ຄ່ຳຄືນນີ້ ຂໍເຊີນທ່ານມາຮ່ວມມ່ວນຊື່ນກັບລາຍການສຽງເພງຈາກແດນໄກຂອງວີໂອເອ
ໃນການສະຫຼອງປີໃໝ່ 2562 ຮ່ວມກັນ ຊຶ່ງວັນນະສອນ ຈັດຕຽມໄວ້ເພື່ອກ່ອມອາລົມ
ທ່ານແລະອວຍໄຊໃຫ້ພອນທ່ານຜູ້ຟັງ ຈົ່ງມີຄວາມສຸກກາຍສະບາຍໃຈໃນວັນດິຖີຂຶ້ນ
ປີໃໝ່ 2562 ນີ້.
ສະບາຍດີປີໃໝ່ ວັນນະສອນຫວັງວ່າທ່ານຜູ້ຟັງຄົງຈະໄດ້ເລີ້ມມ່ວນຊື່ນກັບການຈະ
ສະຫຼອງປີໃໝ່ປີ 2562 ໄປແດ່ແລ້ວ. ຂໍໃຫ້ປີໃໝ່ປີນີ້ ນຳພາສິ່ງທີ່ດີງາມ ແລະສຸກຊຸ່ມ
ກຸ່ມເຢັນ ຄວາມຈະເລີນຮຸ່ງເຮືອ ລ້ຳລວຍເງິນທອງ ຕ່າງໆນາໆ ເອົາເຮົາມາຟັງເພງ
ມ່ວນໆ ເພື່ອເລີ້ມສະຫຼອງປີໃໝ່ກັນກ່ອນ ຂໍເລີ້ມດ້ວຍເພງ ສະບາຍດີປີໃໝ່ ຂອງ
PTran Production ທີ່ຈັດທຳເພງນີ້ ຊຶ່ງເປັນເພງໃໝ່ ທີ່ຫາກໍໄດ້ຟັງກັນ ເພາະວ່າ
ກໍໄດ້ມີຫຼາຍໆທ່ານພາກັນຈົ່ມວ່າ ພໍປີໃໝ່ແລ້ວ ທາງເຮົາ ກໍມັກຈະເປີດແຕ່ເພງເກົ່າ
ຊຶ່ງກໍຂໍຮັບຮູ້ຕາມຄວາມຈິງ ເພາະວ່າ ເພງປີໃໝ່ລາວນັ້ນ ກໍບໍ່ຄ່ອຍມີຫຼາຍໃຫ້ເລືອກ
ແລະເພງທີ່ຮ້ອງໄດ້ຕິດປາກນັ້ນ ກໍຍິ່ງມີໜ້ອຍ ຂໍເຊີນຟັງເພງນີ້ເພື່ອສະຫຼອງປີໃຫມ່
ພ້ອມໆກັນນີ້ ກໍຂໍໃຫ້ທຸກໆທ່ານ ອອກມາຟ້ອນລຳວົງຮ່ວມກັນ ແລະຂໍໃຫ້ແຟນລາຍ
ການສຽງເພງຈາກແດນໄກທຸກໆທ່ານເລີຍ…ມີຄວາມສຸກສະບາຍໃຈດັ່ງຄວາມໝາຍ
ຂອງເພງນີ້ ສະບາຍດີປີໃໝ່.
ສ່ວນເພງຕໍ່ໄປນີ້ແມ່ນເພງທີ່ ນ້ອງສິດທິພົງ ສີພົມໄຊ ຮຽບຮຽງດົນຕີແລະຮ້ອງເອງສົ່ງມາ
ໃຫ້ ວີໂອເອ ເພື່ອເປີດໃຫ້ແດ່ຄົນລາວ ທີ່ຢູ່ໃນທົ່ວໂລກ ໄດ້ຮັບຟັງກັນ ພ້ອມນີ້ຍັງ
ອວຍພອນໃຫ້ແດ່ພີ່ນ້ອງລາວທັງມວນ ຈົ່ງປະສົບແດ່ຄວາມຈະເລີນກ້າວໜ້າ ເພງນີ້
ມີຊື່ວ່າ ສະບາຍດີປີໃໝ່ ຄືກັນ ທີ່ສິດທິພົງ ບອກມາວ່າ ເພງນີ້ ມີຄວາມໝາຍສຳລັບຜູ້ກ່ຽວ
ເພາະເປັນເພງທີ່ພໍ່ຂອງລາວ ທ່ານບຸນທັມ ສີພົມໄຊ ໄດ້ແຕ່ງໄວ້ ເມື່ອ 40 ກວ່າປີມາແລ້ວ
ຕອນນີ້ ທ່ານກໍໄດ້ຈາກໂລກນີ້ໄປແລ້ວ ເຫຼືອໄວ້ຊຶ່ງຜົນງານການຂຽນ ທີ່ສິດທິພົງ ຢາກໃຫ້
ເພງນີ້ເປັນເພງທີ່ມີຄວາມຊົງຈຳອັນດີງາມຂອງພໍ່ ແລະເປັນເພງທີ່ສົ່ງຄວາມຮູ້ສຶກທີ່ດີ
ໃຫ້ທຸກໆຄົນລາວ ໃນວັນປີໃໝ່ ເອົາໄປຟັງພ້ອມໆກັນເລີຍ.
ຂໍອຳລາທ່ານດ້ວຍເພງກ່ຽວກັບປີໃໝ່ລາວ ມ່ວນໆອີກເພງນຶ່ງ ເປັນບົດເພງທີ່ແຕ່ງ
ໂດຍອາຈານສ. ແສງສິຣິວັນ ແລະຂັບຮ້ອງໂດຍພັນໂນຣັກ ປະຖັມມະວົງ ໃນບົດເພງ
ເຊີ້ງປີໃໝ່ລາວ ທີ່ທາງເຮົາຫາກໍໄດ້ຮັບ ເພື່ອມາຈັດໃຫ້ທັນບຸນປີໃໝ່ ເພື່ອສົ່ງຄວາມສຸກ
ມາກັບສຽງເພງ ວັນນະສອນພ້ອມດ້ວຍຄະນະຂອງວີໂອເອທຸກຖ້ວນໜ້າ ຂໍຖືໂອກາດນີ້
ອວຍໄຊໃຫ້ພອນ ແດ່ທຸກໆທ່ານແລະຂໍໃຫ້ເມສານີ້ ເປັນການເລີ່ມຕົ້ນປີໃໝ່ທີ່ເບີກ
ບານມ່ວນຊື່ນ ປະສົບແຕ່ລາບຍົດ, ສັນລະເສີນ ເງິນຄຳ ພ້ອມທັງ ວັນນະ ສຸກຂະ ພະລະ
ສົມດັງໃຈໝາຍທຸກປະການເຖີ້ນ...ໂຊກດີປີໃໝ່.
