ຮີດຄອງປະເພນີແລະວັດທະນະທໍາອັນດີງາມຂອງຊາວລາວ
ຢ່າງເຊັ່ນບຸນປະເພນີແລະພິທີກໍາຕ່າງໆນັ້ນຍັງຄົງຮັກສາ
ແລະປະຕິບັດສືບທອດ ຈາກບັນພະບຸລຸດຈົນມາຮອດປະຈຸ
ບັນນີ້ ໃຫ້ຄົນຮຸ້ນຫຼັງໄດ້ດໍາເນີນ ຮັກສາເຄົ້າມູນອັນດີງາມ
ສືບທອດຕໍ່ໄປ ຕາບນານເທົ່ານານ. ບຸນປະເພນີສໍາຄັນອັນ
ນຶ່ງທີ່ຊາວລາວປະຕິບັດສະເໝີມາກໍຄື ກຸດສົງການປີໃໝ່ຫຼື
ທີ່ຫຼາຍໆຄົນຮູ້ຈັກກໍຄື ບຸນເດືອນຫ້າ ຊຶ່ງມື້ນີ້ທັງສອງຜູ້ຕາງ
ໜ້າຈາກສູນກາງວັດທະນະທໍາລາວຈາກເມືອງ San
Diego ລັດ California ອັນມີທ່ານ ສົມສັກ ທອງຈັນ
ປະທານພ້ອມດ້ວຍຮອງປະທານ ຍານາງ Dr. ສໍາລອງ
ພົມມະຊູວັນ ໃຫ້ສໍາພາດກັບ VOA ກ່ຽວກັບການຈັດງານສະຫຼອງປີໃໝ່ທີ່ທາງສູນກາງ
ດັ່ງກ່າວທີ່ຈະຈັດຂຶ້ນໃນວັນຢຸດສັບປະດາວັນທີ 2-3 ເມສາທີ່ຈະມາເຖິງນີ້. ຂໍເຊີນຮັບຟັງ
ການສໍາພາດໄດ້ດັ່ງຕໍ່ໄປນີ້.
ການສໍາພາດ /ທ່ານ ສົມສັກ ທອງຈັນ ແລະ ຍານາງ Dr. ສໍາລອງ ພົມມະຊູວັນ/.
ເຖິງແມ່ນວ່າຊາວລາວຈະກະຈັດກະຈາຍໄປຢູ່ໃນຫຼາຍປະເທດໃນໂລກກໍຕາມ ແຕ່ພວກເຂົາ
ເຈົ້າຍັງຄົງຮັກສາແລະກໍາກັບໃຫ້ພວກລູກຫຼານລາວທີ່ເກີດໃໝ່ໃຫຍ່ລຸນໃນຕ່າງປະເທດ
ໃນດິນແດນໃໝ່ທີ່ຫ່າງໄກຈາກມະຕຸພູມຂອງພວກເຂົາເຈົ້ານັ້ນ ຍັງຄົງຮັກສາໄວ້ຊຶ່ງເຄົ້າມູນ
ແລະຮາກເຫງົ້າອັນດີງາມດັ້ງເດີມນີ້ ຊຶ່ງເປັນສິ່ງດຽວທີ່ພວກຊາວລາວອົບພະຍົບໄດ້ນໍາຕິດຕົວ
ມາແລະຈະຄົງຕິດຕົວພວກເຂົາເຈົ້າໄປທຸກຫົນທຸກແຫ່ງ ແລະທາງລາຍການຊາວລາວ
ໃນຕ່າງແດນ ກໍຈະນໍາການສໍາພາດຂອງຫຼາຍປະຊາຄົມ ທັງທີ່ຢູ່ໃນສະຫະລັດແລະຫຼາຍໆທີ່
ໃນໂລກມາສະເໜີທ່ານອີກໃນໂອກາດຕໍ່ໄປ.
ຂໍຄຸນພຣະສີຣັດຕະໄຕຣ ຈົ່ງປົກປັກຮັກສາແລະຄຸ້ມຄອງໃຫ້ພວກທ່ານຈົ່ງມີແຕ່ຄວາມສຸກ
ຄວາມຈະເຣີນ ຕະຫຼອດປີໃໝ່ປີ 2011 ນີ້ ໂຊກດີປີໃໝ່.
