ທ່ານຜູ້ຟັງທີ່ເຄົາຣົບ ໃນລາຍການສຽງເພງຈາກແດນໄກ ຂອງວີໂອເອ ສຳລັບແລງ
ວັນອາທິດມື້ນີ້ ວັນນະສອນ ຈະນຳເອົາເພງລາວ ມາສະເໜີທ່ານ ກະລຸນາເຂົ້າສູ່
ລາຍການຂອງເຮົາໄດ້ນະບັດນີ້
ສະບາຍດີ ແຟນເພງທຸກໆທ່ານ ມາພົບກັບວັນນະສອນ ອີກເຊັ່ນເຄີຍ ໃນຄໍ່າຄືນ
ຂອງວັນອາທິດ ພ້ອມກັບເພງມ່ວນໆ ໃນລາຍການສຽງເພງຈາກແດນໄກຂອງ VOA
ຄ່ຳຄືນນີ້ ເພງຕາມຄຳຂໍຂອງນ້ອງວຽງໄຊ ຫຼວງສະອາດ ທີ່ຂຽນມາຂໍຟັງເພງຜ່ານ
ທາງເຟສບຸກວ່າເພງຫຍັງ ກໍໄດ້ວ່າຊັ້ນ ສະນັ້ນ ເອື້ອຍວັນນະສອນຈຶ່ງຈະຂໍພາທ່ານ
ຜູ້ຟັງຢ້ອນກັບຄືນໄປຫາເພງດັງໃນອະດີດ ຊຶ່ງຫຼາຍໆທ່ານຄົງເຂົ້າໃຈວ່າ ເພງເກົ່າໆ
ຂອງລາວນັ້ນ ນັບມື້ ນັບຫາຟັງໄດ້ຍາກ…ຂໍເຊີນມາຟັງເພງ ຊັງຄົນຫຼາຍໃຈ ຂອງ
ກ. ວິເສດ ພ້ອມໆກັນເລີຍ.
ສ່ວນຜູ້ຟັງຊື່ ໂກ້ ບຸນຈະເລີນ ທີ່ຂຽນຂໍ້ຄວາມໄວ້ ໃນວັນທີ 01 ຕຸລາ 2018 ຖາມມາວ່າ
ວິທະຍຸວີໂອເອ ຫຼື ສຽງອາເມຣິກາ ວ່າ ຜູ້ສ້າງແມ່ນຄົນອົບພະຍົບໄປຢູ່ອາເມຣິກາແມ່ນບໍ່? ຄວາມຈິງກໍຄືວ່າ ສະຖານີວິທະຍຸ ວີໂອເອ ຫຼືສຽງອາເມຣິກາ ແມ່ນຂອງລັດຖະບານ
ອາເມຣິກາ ທີ່ມີມາຫຼາຍທົດສະວັດແລ້ວ ຊຶ່ງເປັນແຫຼ່ງນຳສະເໜີຂ່າວໃນທົ່ວໂລກ ປະກອບດ້ວຍຫຼາຍກວ່າ 45 ພາສາ ແລະພະແນກພາສາລາວ ກໍມີອາຍຸມານານກວ່າ
50 ປີ ມາແລ້ວ ຕັ້ງແຕ່ປີ 1962 ເປັນຕົ້ນມາ…ແລະກໍຫວັງວ່າ ທ່ານຜູ້ຟັງຂອງເຮົາຄົງຈະ
ສະນັບສະໜູນ ແລະຮັບຟັງພວກເຮົາຕະຫຼອດໄປ ເພື່ອວ່າ ພະແນກພາສາລາວ ຈະຍັງຄົງ
ຢູ່ຄູ່ຟ້າ ກັບວີໂອເອ, ກັບພວກລູກລາວຫຼານລາວ ຕາບນານເທົ່ານານ…ເອົ໋າ ບັດນີ້ມາຟັງ
ເພງຂອງສິນລະປິນ ນັກຮ້ອງ ນັກດົນຕີແລະນັກແຕ່ງເພງ ໄກຄຳ ອຸດົມ ຈາກລັດຄາລີ
ຟໍເນຍ ໃນບົດເພງ ໄກບ້ານ.
ຂໍປິດທ້າຍລາຍການດ້ວຍເພງ ຄິດເຖິງ ທີ່ຂັບຮ້ອງໂດຍ ບຸນວຽງ ໄຊຍະບຸນຊູ ພັນລະຍາ
ຄົນງາມຂອງອາຈານ ສົມລິດ ໄຊຍະບຸນຊູ ຜູ້ຊຶ່ງເປັນອາຈານ ນັກແຕ່ງເພງດັງ ທີ່ສິນລະ
ປິນຈາກປະເທດໄທ ສຸນາລີ ຣາຊສິມມາ ນຳໄປຂັບຮ້ອງ ໃນບົດເພງ ຮັກເຄິ່ງທາງ
ຂໍຂອບໃຈສຽງຫວານຂອງບຸນວຽງ ແລະອາຈານ ສົມລິດ ໄຊຍະບຸນຊູ ແລະກໍຫວັງວ່າ
ໃນອານາຄົດຂ້າງໜ້າ ພວກເຮົາ ຄົງໄດ້ຮັບຟັງເພງມ່ວນໆ ຈາກບຸນວຽງ ອີກ. ຂໍຝາກ
ຄວາມຄິດເຖິງມາກັບເພງນີ້ ເຖິງທ່ານຜູ້ຟັງ ວ່າ… ຄິດເຖິງ. ຂໍໃຫ້ທຸກໆທ່ານຈົ່ງນອນຫຼັບ
ຝັນຫວານພົບກັນໃໝ່ ໃນສັບປະດາໜ້າ.