ລິ້ງ ສຳຫລັບເຂົ້າຫາ

ອົງການ MEG ຮ່ວມກັບຫໍສະໝຸດ ເກລ ບໍເດິນ ຈັດງານວາງສະແດງຊ້າງ ເພື່ອສະຫຼອງ ມູນມໍລະດົກ ຄົນອາເມຣິກັນ ເຊື້ອສາຍເອເຊຍ


ຍານາງນີນາ ສີຫາລາດ ຈາກອົງການ Multicultural Education ເມືອງແອລຈິນ ລັດອິລລີນອຍ.


ອົງການ Multicultural Education ທີ່ເອີ້ນຫຍໍ້ວ່າ MEG ຮ່ວມກັບຫ້ອງສະໝຸດເກລ ບໍເດິນ (Gail Borden) ໃນເຂດເມືອງແອລຈິນ ລັດອິລລີນອຍ ໄດ້ນຳເອົາຮູບຊ້າງອອກມາຕັ້ງສະແດງ ເພື່ອເປັນການສະເຫຼີມສະຫຼອງມູນມໍລະດົກຂອງຊາວອາເມຣິກັນເຊື້ອສາຍເອເຊຍແລະຊາວເກາະຊາວດອນຈາກເຂດມະຫາ ສະໝຸດປາຊີຟິກ ໃນເດືອນພຶດສະພາ ຊຶ່ງເປັນການຮັບຮູ້ເຖິງການປະກອບສ່ວນເຂົ້າໃນປະຫວັດສາດ ວັດທະນະທຳ ແລະ ຜົນສຳເລັດຂອງສະຫະລັດ ໂດຍຄົນອາເມຣິກັນເຊື້ອສາຍເອເຊຍ.

ຍານາງນີນາ ສີຫາລາດ ຈາກອົງການ Multicultural Education ໃນເມືອງແອລຈິນ ກ່າວກ່ຽວກັບເລື້ອງນີ້ວ່າ:


“ແຕ່ລະປີ ພວກຂ້ານ້ອຍກໍໄດ້ຮ່ວມມື ກັບໄລແບຣຣີ ຢູ່ແອລຈີນໜີ້ ແຕ່ລະປີ ພວກເຮົາຈະເອົາເດັກນ້ອຍໄປຟ້ອນ ເພື່ອເຜີຍແຜ່ວັດທະນະທຳລາວ ປີນີ້ມາເປັນໂຄວິດນໍ ສະມາຄົມເຮົາກໍບໍໄດ້ເຮັດຫຍັງ ພວກເຮົາມີນ້ອງຊ້າງທີ່ເປັນແຮງບັນດານໃຈຈາກມິສຢູນີເວີດລາວປີ 2019​ ຊຶ່ງໄດ້ໄປປະກວດຢູ່ແອັດແລນຕ້າ ນ້ອງຊ້າງນີ້ກໍເປັນສັນຍາລັກຂອງປະເທດລາວແລະພວກຂ້ານ້ອຍກໍໄດ້ເອົານ້ອງຊ້າງໜີ້ມາໂຊຢູ່ໄລແບຣຣີ.”

ຍານາງນີນາກ່າວຕື່ມວ່າ ທາງອົງການ Multicultural Education ພ້ອມດ້ວຍຄະນະຫໍສະໝຸດເກລບໍເດິນຍັງຈະຈັດການສຳພາດກັບຍານາງເມ ວິຈິດຕາ ພອນວິໄລ ມິສຢູນີເວີສລາວປີ 2019 ກ່ຽວກັບຊຸດປະຈຳຊາດ “ນ້ອງຊ້າງ” ພ້ອມດ້ວຍຜູ້ຈັດການ Tot Lina ໃນວັນຈັນທີ 10 ພຶດສະພາຈະມານີ້. ສຳລັບແຂກຜູ້ມີກຽດ ທີ່ມາຮ່ວມການເປີດງານຢູ່ຫ້ອງສະໝຸດເມື່ອວັນທີ 3 ພຶດສະພາ ຜ່ານມານີ້ ຍານາງນີນາ ກ່າວວ່າ:


“ພວກຂ້ານ້ອຍ ກໍໄດ້ເຊີນແອລຈິນເມເຢີ ແລະກໍມີແອລຈິີນ ເຄົາເຊິລແມນ ແລະ ກໍມີເຄົາເຊີລວໍແມນ ແລະກໍມີຫົວໜ້າຂອງໄລແບຣຣີ ແລະກໍມີພີ່ນ້ອງຄົນລາວຮຸ້ນຜູ້ໃຫຍ່ເພິ່ນມາຊ່ອຍໃຫ້ກຳລັງໃຈພວກຂ້ານ້ອຍນຳ.”

ຍານາງນີນາເວົ້າວ່າ ຊ້າງໂຕນີ້ ຈະຕັ້ງຢູ່ໃນຫ້ອງສະໝຸດເລີຍ ຖ້າຜູ້ໃດຢູ່ໃກ້ແຖວແອລຈິນ ຫຼືຢາກໄປເບິ່ງຊ້າງທີ່ວາງສະແດງຢູ່ຫ້ອງສະໝຸດ ເກລບໍເດິນ ເຂົ້າໄປກໍຈະເຫັນໂລດ ຊຶ່ງເປັນໂຕໃຫຍ່ໆ ຕັ້ງຢູ່ທາງກາງຫ້ອງສະໝຸດເລີຍ.

ທ່ານອາດຈະມັກເລື້ອງນີ້ຄືກັນ

XS
SM
MD
LG