ລິ້ງ ສຳຫລັບເຂົ້າຫາ

logo-print

ການ​ຜະ​ລິດ​ ໃນ​ດ້ານ​ແຮ່​ທາດ​ຂອງ ລາວ ຫຼຸດ​ລົງ​ເກີນກວ່າ 18 ເປີ​ເຊັນ ແຕ່ການ​ຜະ​ລິດ​ ດ້ານ​ພະ​ລັງ​ງານ ​ເພີ່ມ​ຂຶ້ນ​ເຖິງ 154 ເປີ​ເຊັນ


ບໍ່​ຄຳ ພູ​ເບ້ຍ.

ການ​ຜະ​ລິດ​ໃນ​ດ້ານ​ແຮ່​ທາດ​ຂອງ ລາວ ຫຼຸດ​ລົງ​ເກີນກວ່າ 18 ເປີ​ເຊັນ​ໃນ​ຂະ​ນະ​ທີ່​ການ​ຜະ​ລິດ​ດ້ານ​ພະ​ລັງ​ງານ​ເພີ່ມ​ຂຶ້ນ​ເຖິງ 154 ເປີ​ເຊັນ​ທັງ​ຍັງ​ຈະ​ສືບ​ຕໍ່​ເພີ່ມ​ຂຶ້ນ​ອີກ​ໃນ​ຕະຫຼອດ​ແຜນ​ການ​ພັດ​ທະ​ນາ​ໄລ​ຍະ 5 ປີ​ໃນ​ຊ່ວງ​ປີ 2016-2020 ນີ້.


ທ່ານ ຄຳ​ມະ​ນີ ອິນ​ທິ​ລາດ​ ລັດ​ຖະ​ມົນ​ຕີ​ວ່າ​ການ​ກະ​ຊວງ​ພະ​ລັງ​ງານ ແລະ ບໍ່​ແຮ່ ຍອມ​ຮັບ​ວ່າ​ການ​ຜະ​ລິດ​ພາກ​ພະ​ລັງ​ງານ​ໄຟ​ຟ້າ ແລະ ການ​ຂຸດ​ຄົ້ນ​ແຮ່​ທາດ​ນັບ​ຈາກ​ປີ 2016 ເປັນ​ຕົ້ນ​ມາ ແລະ ຈະ​ສິ້ນ​ສຸດ​ການ​ຈັດ​ຕັ້ງ​ປະ​ຕິ​ບັດ​ແຜນ​ການ​ພັດ​ທະ​ນາ​ໄລ​ຍະ 5 ປີ​ໃນ​ທ້າຍ​ປີ 2020 ຄາດ​ການ​ວ່າ​ຈະ​ມີ​ມູນ​ຄ່າ​ການ​ຜະ​ລິດ​ລວມ​ເຖິງ 130,520 ຕື້​ກີບ ເພີ່ມ​ຂຶ້ນ 35 ເປີ​ເຊັນ ທຽບ​ໃສ່​ປີ 2011- 2015 ຫາກ​ແຕ່​ວ່າ​ໃນ​ນີ້​ກໍ​ເປັນ​ການ​ເພີ່ມຂຶ້ນ​ໃນ​ພາກ​ພະ​ລັງ​ງານ​ເຖິງ 154 ເປີ​ເຊັນ ສ່ວນ​ການ​ຜະ​ລິດ​ໃນ​ພາກ​ຂຸດ​ຄົ້ນ​ແຮ່​ທາດ​ນັ້ນ​ກັບຫຼຸດ​ລົງ​ເຖິງ 18.69 ເປີ​ເຊັນ ທຽບ​ໃສ່​ໄລ​ຍະ​ດຽວ​ກັນ ທັງ​ຍັງ​ເປັນ​ສາ​ເຫດ​ສຳ​ຄັນ​ທີ່​ເຮັດ​ໃຫ້​ການ​ຜະ​ລິດ​ໃນ​ພາກ​ພະ​ລັງ​ງານ ແລະ ບໍ່​ແຮ່ຫຼຸດ​ລົງ​ຈາກ​ອັດ​ຕາ​ສ່ວນ 17.1 ເປີ​ເຊັນ​ຂອງຍອດ​ຜະ​ລິດ​ຕະ​ພັນ​ລວມ​ (GDP) ໃນ​ປີ 2017 ມາ​ເປັນ 16.4 ເປີ​ເຊັນ​ຂອງ GDP ໃນ​ປັດ​ຈຸ​ບັນ​ນີ້​ອີ​ກ​ດ້ວຍ.

ແຕ່​ຢ່າງ​ໃດ​ກໍ​ຕາມ ການ​ສຳຫຼວດ​ຫາ​ແຫຼ່ງ​ແຮ່​ທາດ​ໃນ​ໄລ​ຍະ​ຜ່ານ​ມາ​ພົບ​ວ່າ ລາວ ມີ​ແຫຼ່ງ​ແຮ່​ທາດຫຼາຍກວ່າ 570 ແຫຼ່ງ​ໃນ​ເນື້ອ​ທີ່ກວ້າງກວ່າ 162,104 ກິ​ໂລແມັດ​ມົນ​ທົນ ຫຼື ເກືອບ 70 ເປີ​ເຊັນ ຂອງ​ພື້ນ​ທີ່​ທັງ​ໝົດ​ຊຶ່ງ​ໃນ​ປັດ​ຈຸ​ບັນ​ນີ້​ທາງ​ການ ລາວ ໄດ້​ໃຫ້​ສຳ​ປະ​ທານ​ແກ່​ບໍ​ລິ​ສັດ​ເອ​ກະ​ຊົນ ລາວ ແລະ ຕ່າງ​ຊາດ 649 ລາຍ​ໃນ 942 ກິດ​ຈະ​ການ ທັງ​ນີ້​ໂດຍ​ບໍ​ລິ​ສັດ​ຈາກ ຈີນ ຖື​ເປັນ​ພາກ​ສ່ວນ​ທີ່​ລົງ​ທຶນ​ຂຸດ​ຄົ້ນ​ແຮ່​ທາດ​ໃນ ລາວ ຫຼາຍ​ທີ່​ສຸດ ໃນ​ນີ້​ກໍ​ໄດ້​ມີ​ການ​ຂຸດ​ຄົ້ນ​ຕົວ​ຈິງ​ແລ້ວ 52 ກິດ​ຈະ​ການ 30 ກວ່າ​ກິດ​ຈະ​ການ​ກຳ​ລັງ​ສຳຫຼວດ ແລະ ການ​ຈັດ​ທຳ​ບົດ​ວິ​ພາກ​ເສດ​ຖະ​ກິດ ເພື່ອ​ຂໍ​ອະ​ນຸ​ຍາດ​ຂຸດ​ຄົ້ນ​ຈາກ​ລັດ​ຖະ​ບານ ລາວ ໃນ​ໄວໆ​ນີ້ ໂດຍ​ໂຄງ​ການ​ຂະ​ໜາດ​ໃຫຍ່ ແລະ ມີ​ມູນ​ຄ່າ​ການ​ລົງ​ທຶນຫຼາຍ​ທີ່​ສຸດ​ໃນ ລາວ ກໍຄື​ເໝືອງ​ຄຳ​ຢູ່ ເຊ​ໂປນ ຂອງ​ບໍ​ລິ​ສັດ Lane Xang Mineral ຈຳ​ກັດ​ຈາກ ຈີນ ທີ່​ໄດ້​ເລີ່ມ​ການ​ຜະ​ລິດ​ໃນ​ປີ 2003 ຫາກ​ແຕ່​ປະ​ລິ​ມານ​ແຮ່​ທາດ​ໃນ​ເຂດ​ສຳ​ປະ​ທານ ເໝືອງ​ຄຳເຊ​ໂປນ ຍັງ​ຄົງ​ເຫຼືອ​ໃນ​ຂຸດ​ໄດ້​ຈົນ​ເຖິງ​ທ້າຍ​ປີ 2020 ເທົ່າ​ນັ້ນ ຈຶ່ງ​ເຮັດໃຫ້​ບໍ​ລິ​ສັດ Lane Xang Mineral ໄດ້​ຕັດ​ສິນ​ໃຈ​ເພີ່ມ​ການ​ລົງ​ທຶນ​ເພື່ອ​ຂະ​ຫຍາຍເຂດ​ສຳ​ປະ​ທານ​ຂຸດ​ຄົ້ນ​ແຮ່​ຄຳ ແລະ ທອງ​ແດງ​ຕໍ່​ໄປ​ອີກ 10 ປີ​ເປັນ​ຢ່າງ​ນ້ອຍ.

ໂດຍ​ເໝືອ​ງ​ແຮ່​ເຊ​ໂປນ ໄດ້​ຢຸດ​ການ​ຂຸດ​ຄົ້ນ ແລະ ຜະ​ລິດ​ຄຳ​ນັບ​ແຕ່​ທ້າຍ​ປີ 2013 ເປັນ​ຕົ້ນ​ມາ​ແລ້ວ ຈຶ່ງ​ຍັງ​ເຫຼືອ​ພຽງ​ການ​ຜະ​ລິດ​ທອງ​ແດງ​ໄດ້​ບໍ່​ເຖິງ 80,000 ໂຕນ​ຕໍ່​ປີ​ໃນ​ປັດ​ຈຸ​ບັນ​ນີ້ ສ່ວນ​ການ​ຂຸດ​ຄົ້ນ​ຢູ່​ທີ່​ພູ​ເບ້ຍ​ໃນ​ແຂວງ​ໄຊ​ສົມ​ບູນ ​ຂອງ​ກຸ່ມບ​ໍ​ລິ​ສັດ Pan Australia ນັ້ນ​ໄດ້​ເລີ່ມ​ການ​ຂຸດຄົ້ນ​ແຮ່​ຄຳ, ທ​ອງ​ແດງ ແລະ ເງິນ​ຢູ່​ເຂດ​ພູ​ຄຳ ນັບ​ແຕ່​ປີ 2008 ແລະ ການ​ຂຸດ​ຄ​ຄົ້ນ​ຢູ່​ບ້ານ​ຫ້ວຍ​ຊາຍ​ໃນ​ຊ່ວງ​ປີ 2012-2018 ກໍ​ປາ​ກົດ​ວ່າ​ຜະ​ລິດ​ຄຳ​ໄດ້ 1.2 ລ້ານອອນ, ທອງ​ແດງ 660,000 ໂຕນ, ແຮ່​ເງິນ 8.1 ລ້ານ​ໂຕນ ແລະ ມອບ​ພັນ​ທະ​ໃຫ້​ລັດ​ຖະ​ບານ ລາວ ຫຼາຍກວ່າ 716 ລ້ານ​ໂດ​ລາ ​ແຕ່​ປະ​ຊາ​ຊົນ ລາວ ທີ່​ຖືກ​ກະ​ທົບ​ນັ້ນ​ຍັງ​ໄດ້​ຮັບ​ການ​ຊົດ​ເຊີຍບໍ່​ທັນ​ຄົບ​ຖ້ວນ​ໂດຍ​ເຂດ​ສຳ​ປະ​ທານ​ຂອງ​ບໍ​ລິ​ສັດ ພູ​ເບ້ຍ ມາຍ​ນິງ ຫຼື Pan Australia ທີ່​ພູ​ຄຳ ແລະ ບ້ານ​ຫ້ວຍ​ຊາຍ​ມີ​ເນື້ອ​ທີ່ກວ້າງ​ກວ່າ 2,600 ກິ​ໂລ​ແມັດ​ມົນ​ທົນ ຊຶ່ງກວມ​ເອົາ​ທີ່​ດິນ ແລະ ຂອງ​ປະ​ຊາ​ຊົນ 94 ຄົວ​ເຮືອນ​ດັ່ງ​ທີ່​ເຈົ້າ​ໜ້າ​ທີ່​ຂັ້ນ​ສູງ​ໃນ​ສະ​ພາ​ປະ​ຊາ​ຊົນ​ຂັ້ນ​ແຂ​ວງ​ໄຊ​ສົມ​ບູນ ໄດ້​ໃຫ້​ການ​ຢືນ​ຢັນ​ວ່າ

"ບັນ​ຫາ​ທີ່​ເຂົາ​ເຈົ້າ​ຮ້ອງ​ຮຽນ​ມານີ້ ແມ່ນ​ທາງ​ບໍ​ລິ​ສັດ ພູ​ເບ້ຍ ມາຍ​ນິງ ຍັງ​ບໍ່​ທັນ​ຈ່າຍ​ຄ່າ​ຊົດ​ເຊີຍ​ໃຫ້​ແກ່​ເຂົາ​ເຈົ້າ ບ່ອນ​ທີ່ໆ​ດິນ​ເຂົາ​ເຈົ້າ​ຖືກ​ຜົນ​ກະ​ທົບ ​ໃນ​ບໍ​ລິ​ເວນ​ຂອບ​ເຂດ​ຂອງ​ບໍ​ລິ​ສັດ​ພວກ​ເຮົາ​ກະ​ມີ​ແຕ່​ອີງ​ໃສ່​ກົດ​ໝາຍ​ການ​ຊົດ​ເຊີຍ ໃນ​ປັດ​ຈຸ​ບັນ​ນີ້​ຍັງ​ຢູ່​ໃນ​ຂັ້ນ​ຕອນ​ຂອງ​ທາງ​ຂັ້ນ​ເຈົ້າ​ເມືອງ ແລະ ແຜນ​ການ​ຕ່າງໆ​ໄດ້​ລົງ​ໄປ​ເກັບ​ກຳ​ຂໍ້​ມູນ​ຕື່ມ​ອີກ ແລ້ວ​ກະ​ສົມ​ທົບ​ກັບ​ພາກ​ສ່ວນ​ທີ່​ກ່ຽວ​ຂ້ອງ ກະ​ວ່າ​ພາຍຫຼັງ​ທີ່​ມີ​ການ​ຕິດ​ຕາມກວດ​ກາ ມີ​ການ​ແກ້​ໄຂ​ແນວ​ໃດ​ຫັ້ນ ກະ​ໃຫ້​ລາຍ​ງານ​ສະ​ພາ​ຂອງ​ພວກ​ເຮົາ."

ສ່ວນ​ໃນ​ພາກ​ພະ​ລັງ​ງານ​ຂອງ​ລາວ ໃນ​ປັດ​ຈຸ​ບັນ​ມີ​ແຫຼ່ງ​ຜະ​ລິ​ດ​ພະ​ລັງ​ງານ​ໄຟ​ຟ້າ​ແລ້ວ​ເຖິງ 73 ແຫ່ງ ມີ​ກຳ​ລັງ​ຕິດ​ຕັ້ງ​ລວມ 9,531 ເມ​ກະ​ວັດ ໃນ​ນີ້​ໄດ້​ສົ່ງ​ອອ​ກ​ໄປ​ຂາຍ​ໃຫ້ ໄທ ແລ້ວ​ເຖິງ 5,620 ເມ​ກະ​ວັດ ແລະ ຄາດ​ວ່າ​ຈະ​ເພີ່ມ​ຂຶ້ນ​ເປັນ 7,000 ເມ​ກະ​ວັດ ໃນ​ປີ 2022 ສ່ວນ​ທີ່​ເຫຼືອ​ກໍ​ຈະ​ສົ່ງ​ຂາຍ​ໃຫ້ ກຳ​ປູ​ເຈຍ ແລະ ຫວຽດ​ນາມ 3,200 ເມ​ກະ​ວັດ ກັບ 5,000 ເມ​ກະ​ວັດ​ຕາມ​ລຳ​ດັບ.

ທ່ານອາດຈະມັກເລື້ອງນີ້ຄືກັນ

XS
SM
MD
LG