ອໍານາດການປົກຄອງເມືອງມໍລະດົກໂລກຫລວງພະບາງ ວາງແຜນການ ທີ່ຈະພັດ
ທະນາເມືອງຫລວງພະບາງ ໃຫ້ເປັນເມືອງແຫ່ງວັດທະນະທໍາອັນດີງາມແຫ່ງຊາດ
ລາວ ແລະກ້າວໄປສູ່ເມືອງພັດທະນາລະດັບໂລກ.
ທ່ານອິນທະວອນ ພົມມະຈັນ ຮອງເຈົ້າເມືອງຫລວງພະບາງ ຖະແຫລງຢືນຢັນວ່າ
ເປົ້າໝາຍທີ່ສໍາຄັນ ໃນການພັດທະນາເມືອງມໍລະດົກໂລກຫລວງພະບາງໃນໄລຍະ
ຕໍ່ໄປກໍຄືການພັດທະນາ ໃຫ້ເປັນເມືອງແຫ່ງວັດທະນະທໍາ ອັນດີງາມແຫ່ງຊາດລາວ
ແລະກ້າວໄປສູ່ເມືອງພັດທະນາຂະໜາດໃຫຍ່ ທີ່ໄດ້ມາດຕະຖານລະດັບໂລກຢ່າງ
ແທ້ຈິງ ດ້ວຍການສົ່ງເສີມຮີດຄອງປະເພນີ ແລະວັດທະນະທໍາ ອັນດີງາມຂອງປະຊາ
ຊົນບັນດາເຜົ່າ ໃນແຂວງຫລວງພະບາງໃຫ້ສືບທອດຕໍ່ໄປຢ່າງຍືນຍາວ ດັ່ງທີ່ທ່ານ
ນາງອິນທະວອນ ໃຫ້ການອະທິບາຍວ່າ:
“ສິ່ງໂດດເດັ່ນແມ່ນການຈັດເທດສະການບຸນຕ່າງໆ ເຊັ່ນບຸນປີໃໝ່ລາວ ບຸນຫໍ່ເຂົ້າ
ປະດັບດິນ, ບຸນຊ່ວງເຮືອເດືອນເກົ້າ, ບຸນອອກພັນສາໄຫລເຮືອໄຟ, ບຸນອະເປ
ເຈົາຂອງຊົນເຜົ່າມົ້ງ ແລະບຸນກະເລີ່ ຂອງຊົນເຜົ່າຂຶມມຸ, ການສ້າງຊີວິດດ້ານວັດ
ທະນາທໍາຢູ່ຮາກຖານກໍມີການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ແລະກໍາລັງ
ສ້າງເງື່ອນໄຂ ເພື່ອໃຫ້ເມືອງຫລວງພະບາງໄດ້ເປັນເມືອງວັດທະນາທໍາ ເມືອງທໍາອິດ
ຂອງແຂວງຫລວງພະບາງ ພ້ອມທັງສຸມໃສ່ພັດທະນາຢ່າງຮອບດ້ານເພື່ອໃຫ້ໄດ້ຮັບ
ຮອງເປັນເມືອງພັດທະນາ ແລະສ້າງເປັນນະຄອນ ຫລວງໃນຕໍ່ໜ້ານີ້.”
ໃນສົກປີ 2015-2016 ທີ່ຜ່ານມາ ການຂະຫຍາຍຕົວທາງເສດຖະກິດໃນແຂວງ
ຫລວງພະບາງ ຢູ່ທີ່ອັດຕາສະເລ່ຍ 8.4 ເປີເຊັນ ຊຶ່ງເມື່ອສົມທົບກັບການຂະຫຍາຍ
ຕົວ ໃນດ້ານບໍລິການ ແລະທ່ອງທ່ຽວໂດຍປະກົດວ່າມີຊາວຕ່າງຊາດຫຼາຍກວ່າ
450,000 ຄົນທີ່ເດີນທາງມາທ່ອງທ່ຽວໃນເມືອງມໍລິດົກໂລກຫຼວງພະບາງນັ້ນໄດ້
ເຮັດໃຫ້ລາຍໄດ້ສະເລ່ຍຂອງປະຊາຊົນລາວ ໃນແຂວງຫຼວງພະບາງເພີ່ມສູງຂຶ້ນເປັນ
ຫຼາຍກວ່າ 1,768 ໂດລາຕໍ່ປີ. ສ່ວນປະຊາຊົນລາວ ໃນເຂດບ້ານພັດທະນາ ຫຼື ທີ່
ມີການ ພັດທະນາລະບົບພື້ນຖານໂຄງຫລ່າງຢ່າງດີແລ້ວນັ້ນ ກໍມີລາຍໄດ້ສະເລ່ຍ
ສູງເຖິງ 3,000 ຫາ 4,000 ໂດລາຕໍ່ຄົນ ຕໍ່ປີ.
ທາງດ້ານ ວາລະສານ Wanderlust Travel ຊຶ່ງເປັນວາລະສານດ້ານການທ່ອງທ່ຽວ
ຊັ້ນນຳ ຂອງໂລກໃນປະເທດ ອັງກິດ ໄດ້ສະເໜີລາຍງານການສຳຫຼວດຄວາມຄິດ
ເຫັນຂອງ ບັນດາສະມາຊິກວາລະສານປະຈຳປີ 2016 ວ່າເມືອງມໍລະດົກໂລກຫຼວງ
ພະບາງ ໄດ້ຖືກຈັດໃຫ້ຢູ່ໃນອັນດັບທີ 8 ທີ່ຊາວຕ່າງຊາດຕ້ອງການເດີນທາງໄປຢ້ຽມ
ຢາມຫຼາຍ ທີ່ສຸດໂດຍໄດ້ຮັບຄະແນນນິຍົມທີ່ລະດັບ 94.67 ເປີເຊັນ ສ່ວນອັນດັບທີ
1-3 ນັ້ນກໍຄື ເມືອງ Hoi An ຂອງຫວຽດນາມ, ເມືອງ Tromso ຂອງປະເທດ ນໍເວ
ແລະ ເມືອງ ພຸກາມ ຂອງ ມຽນມາ ທີ່ໄດ້ຄະແນນນິຍົມທີ່ລະດັບ 98.5, 97.33 ເປີເຊັນ ແລະ 96.92 ເປີເຊັນຕາມລຳດັບ.
ການທີ່ເມືອງຫຼວງພະບາງຖືກຈັດໃຫ້ຢູ່ອັນທີ 8 ຂອງໂລກ ໃນຖານະທີ່ເປັນເມືອງຍອດ ນິຍົມຂອງນັກທ່ອງທ່ຽວດັ່ງກ່າວນີ້ຖືເປັນການຕົກຕ່ຳລົງເຖິງ 7 ອັນດັບ ເນື່ອງຈາກວ່າ
ໃນປີ 2015 ທີ່ຜ່ານມາ ເມືອງຫຼວງພະບາງຖືກຈັດໃຫ້ຢູ່ອັນດັບທີ 1 ໃນຖານະເມືອງ ຍອດນິຍົມທີ່ສຸດຂອງນັກ ທ່ອງທ່ຽວ ຫາກແຕ່ວ່າສະພາບການດັ່ງກ່າວນີ້ກໍນັບເປັນ ເລື່ອງປົກກະຕິໄປແລ້ວ ສຳລັບເມືອງ ຫຼວງພະບາງ ດັ່ງຈະເຫັນໄດ້ຈາກການຖືກຈັດ ໃຫ້ຢູ່ອັນດັບທີ 1 ຂອງໂລກໃນປີ 2006-2008 ກັບໃນປີ 2010-2012 ແລະ ປີ 2015 ຊຶ່ງກໍຄືເມືອງຫຼວງພະບາງ ໄດ້ເສຍແຊັມໃຫ້ເມືອງອື່ນໆ ໃນປີ 2009, ປີ 2013-2014
ແລະ ປີ 2016 ນັ້ນເອງ.
ແຕ່ຢ່າງໃດກໍຕາມ, ພະແນກຖະແຫຼງຂ່າວວັດທະນະທຳ ແລະທ່ອງທ່ຽວແຂວງຫຼວງ
ພະບາງ ຄາດໝາຍວ່າໃນຕະຫຼອດປີ 2017 ຈະມີຊາວຕ່າງຊາດຫຼາຍກວ່າ 5 ແສນ ຄົນທີ່ຈະເດີນທາງ ມາທ່ອງທ່ຽວເມືອງມໍລະດົກໂລກຫຼວງພະບາງ ໂດຍເພີ່ມຂຶ້ນຈາກ
ປີ 2016 ທີ່ມີຊາວຕ່າງຊາດ ເດີນທາງມາທ່ອງທ່ຽວໃນເມືອງມໍລະດົກໂລກຫຼວງພະບາງ 450,000 ກວ່າຄົນນັ້ນກໍຄິດເປັນອັດ ຕາສະເລ່ຍເກີນກວ່າ 20 ເປີເຊັນ ໝາຍຄວາມ ວ່າໃນແຕ່ລະປີມີນັກທ່ອງທ່ຽວ ຊາວຕ່າງຊາດເດີນທາງມາເມືອງມໍລະດົກໂລກເພີ່ມ
ຂຶ້ນເຖິງເກືອບ 1 ແສນກວ່າຄົນນັ້ນເອງ.
ປັດໃຈທີ່ດຶງດູດໃຫ້ຊາວຕ່າງຊາດເດີນທາງມາທ່ອງທ່ຽວໃນເມືອງມໍລະດົກໂລກຫຼວງ
ພະບາງເພີ່ມຂຶ້ນຢ່າງຕໍ່ເນື່ອງກໍເພາະວ່າ ຊາວເມືອງຫຼວງພະບາງຍັງຮັກສາໄດ້ທັງວັດ
ທະນະທຳ ຮີດຄອງປະເພນີ, ວິຖີຊີວິດດັ່ງເດີມ, ປະຫວັດສາດ ແລະທຳມະຊາດ ອັນ
ສວຍງາມ ທັງຍັງສາມາດປະຕິບັດຕາມສົນທິສັນຍາທີ່ຕົກລົງໄວ້ກັບອົງການ UNESCO ກ່ຽວກັບການປົກປັກຮັກສາມໍລະດົກໄດ້ຢ່າງເຄັ່ງຄັດ ເຊັ່ນການກໍ່ສ້າງ ແລະ ບູລະນະສ້ອມແປງເຮືອນ, ອາຄານວັດ ແລະສະຖານທີ່ຕ່າງໆພາຍໃນແຂວງທີ່ຈະ ຕ້ອງໄດ້ຮັກສາຮີດຄອງອັນດີງາມຂອງພໍ່ແມ່ ປະຊາຊົນ ແລະ ສິ່ງດັ່ງເດີມທີ່ເປັນ
ເອກະລັກ ໄວ້ຢ່າງຄົບຖ້ວນ.
