ລັດຖະບານລາວ ມີລາຍຮັບຈາກການໃຫ້ສຳປະທານທີ່ດິນກວ້າງ
ກວ່າ 570,000 ເຮັກຕາໃນທົ່ວປະເທດ ຄິດເປັນມູນຄ່າລວມພຽງ
ແຕ່ 19 ລ້ານ 5 ແສນດອນລາ ເທົ່ານັ້ນ ໃນຕະຫລອດແຜນການ
ປີ 2013-2014 ທີ່ຜ່ານມາ.
ເຈົ້າໜ້າທີ່ຂັ້ນສູງ ໃນກະຊວງການເງິນ ເປີດເຜີຍວ່າ ໃນຕະຫລອດ
ແຜນການປະຈຳປີ 2013-2014 ທີ່ຜ່ານມາ ລັດຖະບານລາວ ມີ
ລາຍຮັບຈາກການອະນຸຍາດ ໃຫ້ສຳປະທານທີ່ດິນ ເພື່ອການປູກພືດອຸດສາຫະກຳຕ່າງໆເຊັ່ນ ຢາງພາລາ ແລະ ໄມ້ວິກຄິດເປັນມູນຄ່າລວມ 19 ລ້ານ 5 ແສນດອນລາ ຊຶ່ງຖືເປັນລາຍຮັບ
ທີ່ຕ່ຳຫຼາຍ ເມື່ອທຽບກັບພື້ນທີ່ ສຳປະທານລວມ ທີ່ກວ້າງກວ່າ 570,000 ເຮັກຕາ ໃນທົ່ວ
ປະເທດ.
ໂດຍສາເຫດທີ່ເຮັດໃຫ້ລັດຖະບານລາວ ມີລາຍຮັບທີ່ຕ່ຳຫຼາຍດັ່ງກ່າວ ກໍເພາະວ່າ ໄດ້ມີການປະເມີນຄ່າເຊົ່າ ຫຼື ຄ່າສຳປະທານ ທີ່ດິນໃນອັດຕາທີ່ຕ່ຳກວ່າຄວາມເປັນຈິງ ຊຶ່ງສ່ວນໃຫຍ່ ກໍເປັນການປະເມີນຄ່າ ສຳປະທານໂດຍພະນັກງານຂອງລັດຖະບານ ໃນລະດັບທ້ອງຖິ່ນ ຂອງແຕ່ລະເຂດແຂວງ.
ສ່ວນເຈົ້າໜ້າທີ່ຂັ້ນສູງ ໃນກະຊວງຊັບພະຍາກອນທຳມະຊາດ ແລະສິ່ງແວດລ້ອມ ຢື່ນຢັນ
ວ່າການກວດກາໃນຕະຫລອດແຜນການປີຜ່ານມາພົບວ່າ ມີພື້ນທີ່ສຳປະທານພຽງ 44,500 ເຮັກຕາ ເທົ່ານັ້ນ ທີ່ໄດ້ມີການປະເມີນຄ່າສຳປະທານຢ່າງຖືກຕ້ອງຕາມລະບຽບກົດໝາຍ ຊຶ່ງໝາຍຄວາມວ່າ ໄດ້ມີການທຸດຈະລິດ ເກີດຂຶ້ນໃນການປະເມີນຄ່າສຳປະທານທີ່ດິນສ່ວນໃຫຍ່ ຫຼື ກວ້າງກວ່າ 525,500 ເຮັກຕາ ນັ້ນເອງ.
ແຕ່ຢ່າງໃດກໍຕາມ ທ່ານເພັດສາຄອນ ຫລວງອາໄພ ຮອງຫົວໜ້າ
ຫ້ອງວ່າການລັດຖະບານລາວ ຖະແຫລງຢືນຢັນວ່າ ທາງການ
ລາວ ຍັງສືບຕໍ່ດຳເນີນການກວດກາ ບັນດາໂຄງການ ທີ່ໄດ້ຮັບ
ສຳປະທານທີ່ດິນ ຈາກລັດຖະບານ ເພື່ອໃຫ້ແລ້ວສຳເລັດພາຍໃນ
ປີ 2015 ຕາມຄຳສັ່ງເລກທີ 13 ຂອງນາຍົກລັດຖະມົນຕີລາວ ລົງ
ວັນທີ 11 ມິຖຸນາ2012 ທີ່ມອບໝາຍໃຫ້ກະຊວງການເງີນ ກະຊວງ
ແຜນການ ແລະການລົງທຶນ ກະຊວງຊັບພະຍາກອນທຳມະຊາດ
ແລະສິ່ງແວດລ້ອມ ຮັບຜິດຊອບຮ່ວມກັນ.
ຍິ່ງໄປກວ່ານັ້ນ ຄຳສັ່ງດັ່ງກ່າວ ຂອງນາຍົກລັດຖະມົນຕີລາວ ກໍຍັງ
ໄດ້ຫ້າມທຸກພາກສ່ວນຂອງ ລັດຖະບານ ບໍ່ໃຫ້ມີການອະນຸຸຍາດ ສຳປະທານໂຄງການຂຸດຄົ້ນແຮ່ທາດ ຫຼື ສຳປະທານທີ່ດິນ ເພື່ອປູກພືດຕ່າງໆເພີ້ມຂຶ້ນ ໃນ
ຕະຫລອດລະຍະ ຂອງການກວດກາ ກໍຄືຈົນເຖິງທ້າຍປີ 2015 ອີກດ້ວຍ.
ແຕ່ຢ່າງໃດກໍຕາມ ຫ້ອງການສະພາແຫ່ງຊາດລາວ ລາຍງານວ່າ ໃນລະຍະກວ່າ 3 ປີ
ມານີ້ສະພາແຫ່ງຊາດ ໄດ້ຮັບການຮ້ອງຮຽນຈາກ ປະຊາຊົນລາວຈຳນວນຫຼາຍກວ່າ
5,000 ກໍລະນີ ຊຶ່ງສ່ວນໃຫຍ່ ເປັນບັນຫາຂັດແຍ້ງກ່ຽວກັບສິດໃນການຖືຄອງທີ່ດິນ ແລະ
ທີ່ຢູ່ອາໄສ ໂດຍມີທັງຄວາມຂັດແຍ້ງ ລະຫວ່າງພາກ ປະຊາຊົນດ້ວຍກັນ ຄວາມຂັດແຍ້ງ
ລະຫວ່າງ ປະຊາຊົນ ກັບບໍລິສັດເອກະຊົນລາວ ແລະ ບໍລິສັດຕ່າງຊາດ ຕະຫລອດຈົນຂໍ້
ຂັດແຍ້ງ ລະຫວ່າງປະຊາຊົນ ກັບລັດຖະບານ ດັ່ງເຈົ້າໜ້າທີ່ຂັ້ນສູງ ປະຈຳຫ້ອງວ່າການ
ສະພາແຫ່ງຊາດ ໄດ້ໃຫ້ການຢືນຢັນວ່າ:
“ເລື້ອງບັນຫາທີ່ດິນນີ້ ກະຍັງເປັນບັນຫາ ທີ່ວ່າ ມີຄວາມສົນໃຈ ແລະ ເປັນຫ່ວງ
ເປັນໃຍ ຂອງສັງຄົມ ເວົ້າເຖິງທີ່ດິນ ມັນຕ້ອງເວົ້າເຖິງ ການພົວພັນເຖິງປ່າ ແລ້ວ
ກະພົວພັນເຖິງບ່ອນວ່າ ການຈັບຈອງນັບແຕ່ ພວກເຮົາໄດ້ມີການຈັດສັນແບ່ງດິນ
ແບ່ງປ່າ ໃຫ້ພໍ່ແມ່ປະຊາຊົນ ໄດ້ຄຸ້ມຄອງນຳໃຊ້ນັ້ນ ແລະພ້ອມດຽວກັນນັ້ນ ບັນຫາ
ດັ່ງກ່າວ ກະຍັງເປັນຊ່ອງວ່າງ ເກີດມີການຊື້ສິດນຳໃຊ້ທີ່ດິນ ຈາກປະຊາຊົນ ກະ
ລາມໄປຮອດບ່ອນວ່າປ່າສະຫງວນ.”
ໂດຍໃນປັດຈຸບັນນີ້ ທາງການລາວທັງໃນຂັ້ນສູນກາງ ແລະ ລະດັບທ້ອງຖິ່ນໄດ້ອະນຸຍາດ
ສຳປະທານທີ່ດິນ ໃຫ້ແກ່ເອກະຊົນລາວ ແລະ ຕ່າງຊາດໄປແລ້ວ 1,281 ສັນຍາ ຊຶ່ງແບ່ງ
ເປັນການອະນຸຍາດ ຈາກລະດັບສູນກາງຈຳນວນ 45 ສັນຍາໃນເນື້ອທີ່ 113,281 ເຮັກຕາ ສ່ວນຂັ້ນແຂວງອະນຸຍາດ 1,213 ສັນຍາ ໃນເນື້ອທີ່ 158,813 ເຮັກຕາ ແລະອີກ 23 ສັນຍາ ເປັນການສຳຫລວດເພື່ອພິຈາລະນາ ອອກໃບອະນຸຍາດ ໃນເນື້ອທີ່ກວ້າງກວ່າ 3 ໝື່ນເຮັກຕາ ໃນທົ່ວປະເທດ ຊຶ່ງຍັງບໍ່ລວມເຖິງເຂດສຳປະທານ ການຂຸດຄົ້ນແຮ່ທາດ ໃນທົ່ວປະເທດລາວ
ແຕ່ຢ່າງໃດ.
