ລັດຖະບານລາວຈະປະກາດໃຫ້ປີ 2018 ເປັນປີທ່ອງທ່ຽວລາວ ໂດຍມີເປົ້າໝາຍທີ່ຈະ
ດືງດູດເອົານັກທ່ອງທ່ຽວຊາວຕ່າງຊາດໃຫ້ໄດ້ເຖິງ 5 ລ້ານຄົນ ແລະເພີ່ມຂຶ້ນເປັນ 6
ລ້ານຄົນໃຫ້ໄດ້ກາຍໃນປີ 2020.
ທ່ານບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫລງຂ່າວ ວັດທະນາທຳ
ແລະທ່ອງທ່ຽວຖະແຫລງຢືນຢັນວ່າ ຄະນະລັດຖະບານລາວໄດ້ມີມະຕິຕົກລົງ ແລະ
ເຫັນດີທີ່ຈະປະກາດໃຫ້ປີ 2018 ເປັນປີທ່ອງທ່ຽວລາວຢ່າງເປັນທາງການແລ້ວໃນຄະ
ນະນີ້ ໂດຍໄດ້ມອບໝາຍໃຫ້ກະຊ່ວງຖະແຫລງຂ່າວ ວັດທະນາທຳ ແລະທ່ອງທ່ຽວຮັບ
ຜິດຊອບການ ຕຽມຄວາມພ້ອມໃນທຸກໆດ້ານ ຮວມທັງການປະສານງານກັບທຸກໆ
ພາກສ່ວນໃນທົ່ວປະເທດ ດັ່ງທີ່ທ່ານບໍ່ແສງຄຳ ໄດ້ໃຫ້ການຢືນຢັນວ່າ:
“ໃນປີ 2018 ນີ້ ພວກເຮົາໄດ້ສະເໜີນໍາລັດຖະບານ ແລະກໍໄດ້ເຫັນດີນຳກັນວ່າ
ຈະປະກາດເປັນປີທ່ອງທ່ຽວລາວ ສະນັ້ນໃນປີ 2018 ກໍຈະມີຫລາຍກິດຈະການ
ພ້ອມກັນສະເຫລີມສະຫລອງປີທ່ອງທ່ຽວນີ້ໃນທົ່ວປະເທດ ແລະພວກເຮົາກໍຈະໄດ້
ພ້ອມກັນກັບບັນດາພະແນກການທີ່ກ່ຽວຂ້ອງ ກັບທຸກທ້ອງຖິ່ນ ທຸກແຂວງເພື່ອຈະ
ຊຸກຍູ້ ຄຸ້ມຄອງດູແລ ທັງກວດກາ ທັງເບິ່ງຕິດຕາມນຳກັນເພື່ອເຮັດໃຫ້ບັນດາກິດຈະ
ກຳການເຄື່ອນໄຫວຕ່າງໆເຫລົ່ານີ້ໄດ້ຮັບຜົນດີ ແລະຢູ່ໃນຂອບຂອງບັນດາຍຸຕິກຳ
ທີ່ໄດ້ວາງໄວ້.”
ທ່ານບໍ່ແສງຄຳ ບອກວ່າເປົ້າໝາຍສຳຄັນຂອງການປະກາດປີການທ່ອງ ທ່ຽວລາວໃນ
ປີ 2018 ແລະຈະຕໍ່ເນື່ອງໄປຈົນເຖິງປີ 2020 ດ້ວຍນັ້ນກໍຄືການດຶງດູດເອົາຊາວຕ່າງ
ຊາດໃຫ້ເດີນທາງເຂົ້າມາທ່ອງທ່ຽວໃນລາວ ໃຫ້ເພີ່ມຂຶ້ນຢ່າງຕໍ່ເນື່ອງ ໂດຍສະເພາະ
ແມ່ນປີ 2020 ຊຶ່ງເປັນປີສິ້ນສຸດຂອງການຈັດຕັ້ງປະຕິບັດແຜນການພັດທະນາເສດຖະ
ກິດ ແລະສັງຄົມແຫ່ງຊາດໄລຍະ 5 ປີ ຄັ້ງທີ 8 ນັ້ນ ກໍໄດ້ມີການວາງເປົ້າໝາຍທີ່ດືງດູດ
ເອົານັກທ່ອງທ່ຽວຊາວຕ່າງຊາດໃຫ້ໄດ້ເຖິງ 6 ລ້ານຄົນ ຊຶ່ງຈະເຮັດໃຫ້ພາກການທ່ອງ
ທ່ຽວ ແລະບໍລິການມີລາຍຮັບຮວມເຖິງ 953 ລ້ານໂດລາສະຫະລັດ ໃນປີ 2020 ດັ່ງ
ກ່າວ.
ທາງການລາວໄດ້ວາງແຜນການພັດທະນາໄວ້ໃນ 3 ໜ້າວຽກດ້ວຍກັນ ກໍຄືການ
ຄຸ້ມຄອງການທ່ອງທ່ຽວ ການໂຄສະນາການທ່ອງທ່ຽວ ການພັດທະນາແຫລ່ງທ່ອງ
ທ່ຽວແລະສະຖານທີ່ບໍລິການຕ່າງໆທີ່ສະດວກສະບາຍ ແລະຮັບປະກັນຄວາມປອດ
ໄພໃຫ້ກັບນັກທ່ອງທ່ຽວໄດ້ຢ່າງຄັກແນ່ ຮວມທັງມີບ່ອນພັກເຊົາສຳລັບນັກທ່ອງ
ທ່ຽວຊາວຕ່າງຊາດ ຢ່າງພຽງພໍກັບຄວາມຕ້ອງການທີ່ເພີ່ມຂຶ້ນດ້ວຍ.
ທັ້ງນີ້ໂດຍການທຸລະກິດບໍລິການ ແລະທ່່ອງທ່ຽວໃນລາວມີໂຮງແຮມ ແລະບ້ານພັກທັງ
ໝົດ 1,926 ແຫ່ງທີ່ມີຈຳນວນຫ້ອງພັກຮວມ 32,960 ຫ້ອງໃນປີ 2011 ແລະເພີ່ມຂຶ້ນ
ເປັນ 2,426 ແຫ່ງມີຈຳນວນຫ້ອງພັກຮວມ 44,600 ກວ່າຫ້ອງໃນປີ 2015 ແລະເພີ່ມ
ຂຶ້ນເປັນ 2,540 ກວ່າແຫ່ງມີຈຳນວນຫ້ອງພັກກວ່າ 50,000 ຫ້ອງໃນປີ 2016 ທັງຍັງ
ຄາດວ່າຈຳນວນຫ້ອງພັກຈະເພີ່ມຂຶ້ນເປັນ 60,000 ຫ້ອງໃນປີ 2020 ອີກດ້ວຍ.
ໂດຍການມີຈຳນວນຫ້ອງພັກເພີ່ມຂຶ້ນດັ່ງກ່າວນີ້ ຍັງເຮັດໃຫ້ການທຸລະກິດບໍລິການ
ແລະການທ່ອງທ່ຽວໃນລາວສາມາດຮອງຮັບນັກທ່ອງທ່ຽວຊາວຕ່າງຊາດ ໄດ້ເພີ່ມຂຶ້ນ
ທຸກປີອີກດ້ວຍກໍຄືຈາກ 2.7 ລ້ານກວ່າຄົນໃນປີ 2011 ເປັນ 4.1 ລ້ານກວ່າຄົນໃນປີ
2014 ແລະຫລາຍກວ່າ 4.3 ລ້ານຄົນໃນປີ 2015 ທັງຍັງເຮັດໃຫ້ການທຸລະກິດການ
ບໍລິການຂອງລາວ ມີລາຍຮັບເພີ່ມຂຶ້ນຈາກ 400 ລ້ານໂດລາໃນປີ 2011 ແລະ 560
ລ້ານໃນປີ 2014 ເປັນຫລາຍກວ່າ 670 ລ້ານສະຫະລັດໃນປີ 2016 ສ່ວນໃນປີ 2017
ຄາດວ່າຈະມີນັກທ່ອງທ່ຽວຊາວຕ່າງຊາດເດີນທາງເຂົ້າມາໃນລາວ 4.5 ລ້ານຄົນ ແລະ
ເພີ່ມຂຶ້ນເປັນ 5 ລ້ານຄົນໃນປີ 2018 ຕາມລຳດັບ.
ພ້ອມກັນນີ້ ຈຳນວນນັກທ່ອງທ່ຽວຊາວຕ່າງຊາດ ແລະລາຍຮັບດັ່ງກ່າວ ຍັງຖືເປັນສະ
ພາວະທີ່ເພີ່ມຂຶ້ນຈາກປີີ 2012 ໃນອັດຕາສະເຫລ່ຍເຖິງ 60% ຕາມລຳດັບຊຶ່ງເປັນຜົນ
ຈາກການພັດທະນາໃນຫລາຍດ້ານ ເພື່ອອຳນວຍຄວາມສະດວກໃຫ້ແກ່ນັກທ່ອງທ່ຽວ
ເຊັ່ນ ຮ້ານອາຫານ ການບິນການຂົນສົ່ງ ແລະການບໍລິການນຳທ່ຽວ ດັ່ງຈະເຫັນໄດ້ຈາກ
ການທີ່ລາວມີບໍລິສັດທ່ອງທ່ຽວຫລາຍກວ່າ 340 ບ່ອນໃນປັດຈຸບັນ.
ນອກນັ້ນລັດຖະບານລາວຍັງໄດ້ໃຫ້ຄວາມສຳຄັນເປັນພິເສດ ໃນການເສີມສ້າງຄວາມ
ຮ່ວມມືດ້ານການທ່ອງທ່ຽວກັບປະເທດເພື່ອນບ້ານ ໂດຍຫລ້າສຸດ ລັດຖະມົນຕີດ້ານ
ການທ່ອງທ່ຽວຂອງມຽນມາ ລາວ ໄທ ກຳປູເຈຍ ແລະຫວຽດນາມ ກໍໄດ້ຕົກລົງກັນຢູ່ທີ່
ນະຄອນເນປີດໍຂອງມຽນມາ ເພື່ອເສີມຂະຫຍາຍການຮ່ວມມືໃນດ້ານທ່ອງທ່ຽວຢ່າງ
ຮອບດ້ານ ດ້ວຍການພັດທະນາ 5 ປະເທດໃຫ້ເປັນເປົ້າໝາຍດຽວກັນ ເພື່ອຮອງຮັບ
ນັກທ່ອງທ່ຽວທັງໃນອາຊຽນ ແລະຈາກພູມີພາກອື່ນໃນທົ່ວໂລກໃຫ້ໄວທີ່ສຸດ.
