ລັດຖະບານລາວ ຈະເພີ່ມເງິນອຸດໜູນການຄອງຊີບເພື່ອເຮັດໃຫ້ພະນັກງານລັດໃນທົ່ວປະເທດມີລາຍໄດ້ຂັ້ນພື້ນ ຖານບໍ່ຕໍ່າກວ່າ 2,200,000 ກີບຕໍ່ຄົນຕໍ່ເດືອນ ພາຍໃນໄຕມາດທີ່ 1 ຂອງປີ 2025.
ທ່ານສອນໄຊ ສີພັນດອນ ນາຍົກລັດຖະມົນຕີ ຢືນຢັນວ່າລັດຖະບານຈະເພີ່ມເງິນອຸດໜູນການຄອງຊີບແລະປັບເພີ່ມເງິນເດືອນພື້ນຖານໃຫ້ພະນັກງານລັດຖະກອນທຸກຄົນ ເພື່ອໃຫ້ສອດຄ່ອງກັບສະພາບການຕົວຈິງ ຊື່ງຈະເຮັດໃຫ້ພະນັກງານລັດມີລາຍໄດ້ລວມທີ່ລະດັບພື້ນຖານບໍ່ຕໍ່າກວ່າ 2,200,000 ກີບຕໍ່ຄົນຕໍ່ເດືອນ ໂດຍຈະປະຕິບັດໃຫ້ໄດ້ໄວທີ່ສຸດ ກໍຄືພາຍໃນໄຕມາດທີ່ 1 ຂອງປີ 2025.
ທັ້ງນີ້ ລັດຖະບານລາວໄດ້ເພີ່ມເງິນອຸດໜູນຄ່າຄອງຊີບໃຫ້ກັບພະນັກງານລັດທຸກຄົນມາແລ້ວ 2 ຄັ້ງໆລະ 150,000 ກີບຕໍ່ເດືອນ ໃນປີ 2023 ຊື່ງເຮັດໃຫ້ພະນັກງານລັດມີເງິນເດືອນຂັ້ນຕ່ຳທີ່ລະດັບ 1,850,000 ກີບຕໍ່ເດືອນ ນັບແຕ່ເດືອນມັງກອນປີ 2024 ເປັນຕົ້ນມາ ແຕ່ເນື່ອງຈາກວ່າເງິນກີບຍັງສືບຕໍ່ອ່ອນຄ່າລົງ ໃນຂະນະທີ່ອັດຕາເງິນເຟີ້ແມ່ນສູງກວ່າ 25% ແລະດັດຊະນີລາຄາການບໍລິໂພກກໍຍັງສູງເກິນກວ່າ 249% ໃນຊ່ວງເດືອນມັງກອນ-ກັນຍາ 2024 ແລະບໍ່ມີທີທ່າວ່າຈະຫຼຸດລົງໃນໄວໆນີ້ດ້ວຍແລ້ວ ຈຶ່ງເຮັດໃຫ້ການເພີ່ມເງິນອຸດຫນູນດັ່ງກ່າວມັນບໍ່ພຽງພໍສໍາລັບການດໍາລົງຊີວິດທີ່ແທ້ຈິງຂອງພະນັກງານລັດໃນປັດຈຸບັນ ສະນັ້ນຈຶ່ງຈະຕ້ອງປັບເພີ່ມເງິນອຸດໜູນຂຶ້ນອີກໃຫ້ໄວທີ່ສຸດ ແຕ່ບັນຫາກໍຄືລັດຖະບານຈະມີງົບປະມານຍ່າງພຽງພໍສໍາລັບການເພີ່ມດັ່ງກ່າວຫລືບໍ່ ດັ່ງທີ່ ທ່ານ ສອນໄຊ ໄດ້ໃຫ້ການຍືນຍັນວ່າ
“ລາຍຈ່າຍສ່ວນໃຫຍ່ແມ່ນສຸມໃສ່ລາຍຈ່າຍບູລິມະສິດຂອງລັດຖະບານເປັນຕົ້ນແມ່ນການເບີກຈ່າຍເງິນເດືອນ ເງິນອຸດໜູນຄ່າຄອງຊີບໃຫ້ແກ່ພະນັກງານ, ລັດຖະກອນ, ທະຫານ, ຕຳຫຼວດ, ພະນັກງານບໍານານ ແລະ ຜູ້ເສຍອົງຄະ ລວມທັງການປະຕິບັດເງິນອຸດຫນູນສໍາລັບຄູອາສາສະຫມັກ. ໄດ້ຢົກເງິນເດືອນຂັ້ນຕ່ຳສຸດຂອງພະນັກງານລັດຖະກອນໃນປີ 2024 ໄດ້ທີ່ລະດັບ 1,850,000 ກີບຕໍ່ຄົນຕໍ່ເດືອນ, ຄາດຫມາຍວ່າໃນປີ 2025 ພວກເຮົາຈະພະ ຍາຍາມປັບເພີ່ມຂຶ້ນໃຫ້ໄດ້ຕໍ່າສຸດທີ່ລະດັບ 2,200,000 ກີບຕໍ່ຄົນຕໍ່ເດືອນ.”
ພາຍໃຕ້ສະພາບການດັ່ງກ່າວ ຈຶ່ງບໍ່ພຽງແຕ່ຈະເຮັດໃຫ້ລັດຖະບານຕ້ອງເລື່ອນແຜນການເພີ່ມເງິນອຸດໜູນດັ່ງກ່າວ ໂດຍບໍ່ມີກຳນົດທີ່ຊັດເຈນເທົ່ານັ້ນ ຫາກແຕ່ວ່າຍັງຕ້ອງໄດ້ເລື່ອນແຜນການຫລຸດຜ່ອນບັນຫາການຂາດທຶນຂອງລັດວິສາຫະກິດໄຟຟ້າລາວ (EDL) ໂດຍການປັບເພີ່ມອັດຕາຄ່າໄຟຟ້າໃຫ້ສອດຄ່ອງກັບຕົ້ນທຶນຕົວຈິງອີກດ້ວຍ ດັ່ງເຈົ້າຫນ້າທີ່ຂັ້ນສູງໃນຄະນະລັດຖະບານລາວ ຍືນຍັນວ່າ
“ສຳລັບຂໍ້ສະເໜີຂໍອະນຸມັດເພີ່ມເງິນອຸດໜູນຄ່າຄອງຊີບໃຫ້ພະນັກງານໃນຂະແໜງທຸລະກິດ. ກອງປະຊຸມແມ່ນເຫັນດີດ້ານຫລັກການ ແລະ ມອບໃຫ້ກະຊວງແຮງງານ ແລະ ສະຫວັດດີການສັງຄົມ ຮ່ວມກັບຂະແໜງການທີ່ກ່ຽວຂ້ອງ ເພື່ອຮັບປະກັນວ່ານະໂຍບາຍດັ່ງກ່າວສາມາດຈັດຕັ້ງປະຕິບັດໄດ້ ສຳລັບໂຄງສ້າງລາຄາໄຟຟ້າໃໝ່ ໄລຍະ 2024-2028 ກອງປະຊຸມໄດ້ຊີ້ນຳໃຫ້ ກະຊວງພະລັງງານແລະບໍ່ແຮ່ ຄົ້ນຄວ້າວິທີການກຳນົດໂຄງປະກອບລາຄາໄຟ ຟ້າທີ່ເຫມາະສົມກັບສະພາບການຈິງຂອງເສດຖະກິດ ແລະ ສັງຄົມ”
ໂດຍອັດຕາສ່ວນຂອງຈໍານວນພະນັກງານລັດຕໍ່ປະຊາກອນລາວໃນປະຈຸບັນນີ້ ຍູ່ທີ່ອັດຕາສູງກວ່າ 2,4%, ເຊິ່ງເປັນອັດຕາສ່ວນທີ່ສູງສຸດໃນອາຊຽນ. ທັງຍັງເຮັດໃຫ້ຕ້ອງນຳໃຊ້ງົບປະມານສຳຫລັບເງິນເດືອນ ແລະ ເງິນນະໂຍບາຍໃຫ້ແກ່ພະນັກງານລັດຖະກອນໃນອັດຕາສ່ວນເກີນກວ່າ 60% ຂອງງົບປະມານທັງໝົດຂອງລັດຖະບານລາວໃນແຕ່ ລະປີ. ທັ້ງຍັງມີທ່າອຽງເພີ່ມຂຶ້ນທຸກປີດ້ວຍນັ້ນ, ຈຶ່ງເຮັດໃຫ້ລັດຖະບານລາວຕ້ອງໄດ້ຈຳກັດໂຄຕ້າການບັນຈຸພະນັກ ງານໃໝ່ໃຫ້ຫນ້ອຍລົງ ພາຍໃຕ້ເປົ້າໝາຍການຫຼຸດອັດຕາສ່ວນຂອງພະນັກງານລັດຕໍ່ປະຊາກອນລາວລົງເປັນ 2,2% ໃນປີ 2025.
ຟໍຣັມສະແດງຄວາມຄິດເຫັນ