ວັນທີ 21 ມິຖຸນາ ເປັນການເລີ່ມຕົ້ນລະດູຮ້ອນ ຢູ່ໃນສະຫະລັດອະເມຣິກາ ກໍຄືຝຣັ່ງແລະ
ປະເທດຕາເວັນຕົກອື່ນໆ ຊຶ່ງຢູ່ທີ່ປະເທດຝຣັ່ງນັ້ນ ປະຊາຄົມລາວມີການຈັດສະຫຼອງລະດູ
ຮ້ອນກັນໃນຫຼາຍໆຮູບແບບ ອີງຕາມທ່ານ ຈັນທະຣາ ອຸເທນສັກດາ ປະທານຈັດງານສະ
ແດງດົນຕີ ປະກອບກັບການແຂງຂັນກິລາຂອງສະມາຄົມນ້ອງໃໝ່ ຊຶ່ງງານຄັ້ງນີ້ ຈະມີຂຶ້ນ
ກົງກັບວັນທີ 2 ກໍລະກົດນີ້ ຕາມທີ່ທ່ານ ຈັນທະຣາ ໄດ້ໂອ້ລົມສູ່ VOA ຟັງ ດັ່ງໃນບົດ
ສໍາພາດຕໍ່ໄປນີ້:
ທ່ານ ຈັນທະຣາ ອະທິບາຍໃຫ້ຟັງວ່າການສະແດງດົນຕີຄັ້ງນີ້ແມ່ນໄດ້ຮວມເອົາພຽງແຕ່
9 ສິນລະປິນລາວຢູ່ໃນຝຣັ່ງທີ່ມີຜົນງານແລ້ວແລະກໍມີຜົນງານທີ່ກໍາລັງຈະອອກມາໃນ
ໄວໆນີ້. ແຕໍກໍບໍ່ໄດ້ໝາຍຄວາມວ່ານັກຮ້ອງ, ນັກສິນລະປິນລາວຢູ່ໃນຝຣັ່ງ ມີພຽງແຕ່ເທົ່ານີ້.
ຄັ້ງນີ້ຖືວ່າເປັນຄັ້ງທໍາອິດທີ່ທາງປະຊາຄົມລາວທີ່ປະເທດຝຣັ່ງໄດ້ຈັດງານມະຫະກໍາການ
ດົນຕີແລະກິລາຂຶ້ນ ກໍເລີຍຢາກຈະໃຫ້ເປັນການເລີ່ມຕົ້ນທີ່ມີຄຸນນະພາບ ແຕ່ໂຄງການ
ໃນອະນາຄົດນັ້ນ ກໍຈະໄດ້ຮວມເອົານັກຮ້ອງ, ນັກສິນລະປິນຢູ່ໃນປະເທດຝຣັ່ງ ແລະແຖວ
ເອີຣົບມາຮວມກັນ ຊຶ່ງກໍຈະເປັນການປະກອບສ່ວນກັບຊາວລາວໃນຕ່າງປະເທດ, ບໍ່ວ່າຈະ
ເປັນສະຫະລັດ, ອອສເຕຣເລຍແລະແມ່ນກະທັງລາວນໍາ. ສ່ວນສິນລະປິນສາວ ຣັດຕະ
ນະພອນ ສຸກສະຫວັນ ຊຶ່ງກໍເປັນນຶ່ງໃນຈໍານວນ 9 ຄົນນັ້ນ ກໍໄດ້ໃຫ້ VOA ສໍາພາດແລະ
ສະແດງເຖິງຄວາມຮູ້ສຶກຂອງລາວ ທີ່ໄດ້ເຂົ້າປະກອບສ່ວນ ຊຶ່ງຣັດຕະນະພອນໄດ້ສະແດງ
ຄວາມຮູ້ສຶກຂອງນາງວ່າ:
/ຟັງຄໍາຕອບຂອງ ຣັດຕະນະພອນ ສຸກສະຫວັນ/
ຊາວລາວໃນຕ່າງແດນ ບໍ່ວ່າຈະຢູ່ໃສ, ຈະຢູ່ສະຫະລັດຫຼືຢູ່ຝຣັ່ງ, ອອສເຕຣເລຍ ກໍບໍ່ໄດ້
ແຕກຕ່າງກັນ ຍັງຮັກສາເຄົ້າມູນ, ພາສາ, ການດົນຕີຕ່າງໆໄວ້ໃຫ້ຄົນຮຸ່ນຫຼັງທີ່ເກີດໃໝ່
ໃຫຍ່ລຸນໃນຕ່າງແດນໄດ້ຮັກສາໄວ້ສືບທອດຕໍ່ໄປໃຫ້ພວກເຂົາເຈົ້າຮູ້ວ່າ ຕົວເອງແມ່ນໃຜ
ແລະມາຈາກໃສ ຊຶ່ງທ່ານຈັນທະລາ ອຸເທນສັກດາ ອະທິບາຍວ່າ ສະມາຄົມໃນຝຣັ່ງມີ
ຫຼາຍກວ່າ 40 ສະມາຄົມດ້ວຍກັນ ຊຶ່ງຕ່າງກໍມີຈຸດປະສົງແລະວິທີເກັບຮັກສາວັດທະນະທໍາ
ທີ່ແຕກຕ່າງກັນອອກໄປ ທັງນີ້ທັງນັ້ນ ກໍແມ່ນເພື່ອຄົງໄວ້ຊຶ່ງຄວາມເປັນລາວນັ້ນໄວ້ ຊຶ່ງທ່ານ
ຈັນທະຣາ ກ່າວສະລຸບໄວ້ດັ່ງນີ້:
