ລິ້ງ ສຳຫລັບເຂົ້າຫາ

ວັນອາທິດ, ໑໔ ເມສາ ໒໐໒໔

ນັກຊ່ຽວຊານ ກ່າວວ່າ ນະໂຍບາຍຂອງທ່ານທອງລຸນ ເລຂາທິການໃຫຍ່ ຄົນໃໝ່ຂອງພັກ ປປລ ຈະບໍ່ມີການປ່ຽນແປງຫຍັງຫຼາຍ


ທ່ານທອງລຸນ ສີສຸລິດ ຖືກເລືອກເປັນເລຂາທິການໃຫຍ່ ຂອງພັກ ປປລ ເມື່ອວັນທີ 15 ມັງກອນຜ່ານມານີ້.
ທ່ານທອງລຸນ ສີສຸລິດ ຖືກເລືອກເປັນເລຂາທິການໃຫຍ່ ຂອງພັກ ປປລ ເມື່ອວັນທີ 15 ມັງກອນຜ່ານມານີ້.

ທ່ານທອງລຸນ ສີສຸລິດ ໄດ້ຖືກເລືອກເປັນເລຂາທິການໃຫຍ່ ຂອງຄະນບໍລິຫານງານສູນ ກາງພັກປະຊາຊົນປະຕິວັດລາວສະໄໝທີ 11 ທີ່ນະຄອນຫຼວງວຽງຈັນ.

ກອງປະຊຸມໃຫຍ່ເປັນເວລາ 3 ມື້ ທີ່ເລີ້ມມາແຕ່ວັນພຸດແລະປິດລົງໃນຕອນບ່າຍຂອງມື້ວັນສຸກແລ້ວ ຍັງໄດ້ເລືອກເອົາກຳມະການກົມການເມືອງໃໝ່ຂອງພັກ 13 ຄົນ ໂດຍມີສະມາຊິກເພີ້ມຂຶ້ນ 2 ຄົນ ຈາກກຳມະການກົມການເມືອງຊຸດເກົ່າທີ່ມີຢູ່ 11 ຄົນ ແຕ່ບໍ່ມີຊື່ເລຂາທິການໃຫຍ່ຂອງພັກຄົນເກົ່າ ພ້ອມທັງເປັນປະເທດ ທ່ານບຸນຍັງ ວໍລະຈິດ ຮວມຢູ່ນຳ.

ຕໍ່ຄຳຖາມທີ່ວ່າ ທ່ານທອງລຸນ ເລຂາທິການໃຫຍ່ຂອງພັກຄົນໃໝ່ ຈະນຳພາປະເທດໄປໃນທິດທາງໃດນັ້ນ ຮອງສາສະດາຈານອຽນ ແບດ (Ian Baird) ຈາກມະຫາວິທະຍາໄລ Wisconsin-Madison ໃຫ້ຄວາມເຫັນວ່າ:


"ເພາະວ່າທອງລຸນກະຕ້ອງໄດ້ເປັນເລຂາທິການໃຫຍ່ຂອງພັກເດເນາະ ແລະກາຊິເປັນປະທານປະເທດເດເນາະ ຕາມທີ່ເຄີຍເປັນຜ່ານມາ ແລະກາຄິດວ່າ ໜ້າຈະເນັ້ນນະໂຍ ບາຍຄືເກົ່າ ຄືລາວປະຕິບັດຕອນທີ່ລາວເປັນນາຍົກນີ້ໜາ ເພາະວ່າປະຊາຊົນລາວຫຼາຍໆຄົນກໍເຫັນດີເຫັນ ພ້ອມກັບເພິ່ນ ທຽບກັບນາຍົກລັດຖະມົນຕີຄົນອື່ນ ໃນໄລຍະຜ່ານມາ ຍ້ອນວ່າລາວເຮັດແບບທັນສະໄໝກວ່າເກົ່າ ໃນຫຼາຍໆດ້ານເນາະ ແຕ່ວ່າໃນດ້ານນະໂຍບາຍເນາະ ຄືຊິບໍ່ໄດ້ປ່ຽນຫຼາຍປານໃດຕາມທີ່ເບິ່ງນີ້ໜາ ແຕ່ກໍຍັງບໍ່ທັນແນ່ໃຈຄືກັນ ເພາະວ່າຕ້ອງໄດ້ເບິ່ງນາຍົກລັດຖະມົນຕີຄືກັນວ່າ ຊິເປັນຜູ້ໃດແລະກາຊິມີຄວາມຄຶດຄືແນວໃດ ໃນໄລຍະຕໍ່ໄປ."

ນອກນັ້ນ ກອງປະຊຸມຮອບປະຖົມມະເລີກ ໃນອາທິດແລ້ວນີ້ ຍັງໄດ້ເລືອກເອົາ ຄະນະເລຂາສູນກາງພັກຈຳນວນ 9 ຄົນ ພ້ອມທັງໄດ້ເລືອກເອົາທ່ານບຸນທອງ ຈິດມະນີເປັນຜູ້ປະຈຳການ ແລະຄະນະກວດກາສູນກາງພັກ ທີ່ປະກອບດ້ວຍສະມາຊິກ 7 ຄົນ ນຳພາໂດຍທ່ານຄຳພັນ ພົມມະທັດ.

ການເລືອກເອົາຄະນະນຳພາຊຸດໃໝ່ນີ້ ແມ່ນມີຂຶ້ນກ່ອນການເລືອກຕັ້ງສະພາແຫ່ງຊາດ ແລະຄະນະລັດຖະບານຢູ່ລາວ ຊຶ່ງຄາດວ່າຈະມີຂຶ້ນ ໃນກາງເດືອນກຸມພາ ແລະຫຼັງຈາກການເລືອກຕັ້ງແລ້ວ ສະມາຊິກສະພາແຫ່ງຊາດຊຸດໃໝ່ ໃນກອງປະຊຸມຮອບປະຖົມມະເລີກ ກໍຈະເລືອກເອົາປະທານປະເທດ ແລະນາຍົກລັດຖະມົນຕີ ແລະໃຫ້ການອະນຸມັດຕໍ່ຄະນະລັດຖະບານຊຸດໃໝ່ ຂອງລາວ.

XS
SM
MD
LG