ລິ້ງ ສຳຫລັບເຂົ້າຫາ

logo-print

​ລາວ ແລະ ​ຈີນ ຈະ​ເລີ່​ມ ການ​ຮ່ວມ​ມືອອກ​ອາກາດ ທາງໂທລະພາບ ໃນ​ທ້າຍ​ເດືອນ​ພຶດສະພາ​ນີ້


ຜູ້ອຳນວຍການສະຖານີໂທລະພາບແຫ່ງຊາດລາວ ແລະ ໂທລະພາບສູນກາງຂອງຈີນ ຮ່ວມກັນລົງມືເຊັນສັນຍາ

ສະຖານີ​ໂທລະພາບ​ແຫ່ງ​ຊາດ​ລາວ ກັບ​ໂທລະພາບ​ສຸນ​ກາງຂອງ​ຈີນ ຈະ​ເລີ່​ມຈັດຕັ້ງປະຕິບັດ​ການ​ຮ່ວມ​ມື ​ໃນ​ການ​ອອກ​ອາກາດ​ລາຍ​ການ​ຕ່າງໆ​ ຂອງ​ຈີນ​ທາງ​ໂທລະພາບ​ແຫ່ງ​ຊາດ​ລາວ ​ໃນ​ທ້າຍ​ເດືອນ​ພຶດສະພາ​ນີ້.

ພິທີ​ເປີດ​ໂຄງການ​ຮ່ວມ​ມື​ໃນ​ການ​ພັດທະນາ​ວຽກ​ງານ​ໂທລະພາບ ລະຫວ່າງ​ໂທລະພາບ​ສູນ​ກາງຂອງ​ຈີນ​ປະຈຳ​ແຂວງ​ຢຸນໜານ ກັບ​ໂທລະພາບ​ແຫ່ງ​ຊາດ​ລາວ ​ໄດ້​ມີ​ຂຶ້ນຢ່າງ​ເປັນ​ທາງ​ ກາ​ນ​ເມື່ອ​ບໍ່​ນານ​ມາ​ນີ້​ຢູ່ນະຄອນຫຼວງ​ວຽງ​ຈັນ ​ໂດຍ​ມີ​ທ່ານ​ເສິນ ຮ່າວ ​ເຈົ້າ​ແຂວງ​ຢຸນໜານ ກັບ​ທ່ານ​ບໍ່​ແສງ​ຄຳ ວົງ​ດາລາ ລັດຖະມົນຕີ​ວ່າການ​ ກະຊວງ​ຖະ​ແຫລ​ງຂ່າ​ວ ວັດທະນະທຳ ​ແລະ​ທ່ອງ​ທ່ຽວ ​ເປັນ​ປະທານ​ໃນ​ພິທີ​ຮ່ວມ​ກັນ.

​ໂດຍ​ພາຍ​ໃຕ້​ການ​ຮ່ວມ​ມື​ດັ່ງກ່າວນີ້ ​ໂທລະພາບ​ສູນ​ກາງຂອງ​ຈີນ ຈະ​ເປັນ​ຝ່າຍ​ຜະລິ​ດ ລາຍການ​ຕ່າງໆ ​ເຊັ່ນ​ລາຍການ​ລະຄອນ ລາຍການ​ກາ​ຕູນ ​ແລະ​ລາຍການ​ສາລະ​ຄະດີ ກ່ຽວ​ກັບ​ການ​ພັດທະນາ​ດ້ານ​ກະສິກຳ​ຂອງ​ຈີນ​ ທີ່​ໄດ້​ຮຽບຮຽງ ​ແລະ​ພາກ​ເປັນ​ພາສາ​ລາວ​ແລ້ວນັ້ນ ມາ​ອອກ​ອາກາດ​ທາງ​ໂທລະພາບ​ແຫ່ງ​ຊາດ​ລາວ ​ເປັນ​ປະຈຳ​ທຸກ​ວັນ ນັບ​ແຕ່​ທ້າຍ​ເດືອນ​ພຶດສະພາ 2015 ນີ້ ​ເປັນຕົ້ນ​ໄປ.

ທາງ​ດ້ານ​ທ່ານບຸນເຈົ້າ ພິຈິດ ຜູ້ອຳນວຍການ ​ໂທລະພາບ​ແຫ່ງ​ຊາດ​ລາວ ​ໄດ້​ໃຫ້ການ​ຢືນຢັນ​ວ່າ ການ​ຮ່ວມ​ມື​ລະຫວ່າງ​ໂທລະພາບ​ແຫ່ງ​ຊາດລາວ ກັບ ​ໂທລະພາບ​ສູນ​ກາງຂອງ​ຈີນ​ດັ່ງກ່າວນີ້ ຖື​ເປັນ​ສ່ວນ​ໜຶ່ງ ຂອງ​ການ​ຮ່ວມ​ມື​ຍຸດ​ທະ​ສາດ​ຮອບດ້ານ​ ລະຫວ່າງ​ສອງ​ຊາດ​ລາວ-ຈີນ ພາຍ​ໃຕ້​ເປົ້າໝາຍ​ເພື່ອ​ເປັນ​ການ​ເພີ່ມ​ສີສັນ ​ແລະ​ຄວາມ​ບັນ​ເທີງ​ໃຫ້​ບັນດາ​ຜູ້​ຊົມ​ໂທລະພາບ​ແຫ່ງ​ຊາດ​ລາວ ທັງ​ກໍ​ຍັງ​ເປັນ​ການ​ຍົກ​ສູງ​ຄວາມ​ເຂົ້າ​ໃຈ​ມິດຕະພາບ ການ​ຮ່ວມ​ມື ແລະ​ການ​ແລກປ່ຽນ​ໃນ​ວຽກ​ງານ​ຖະ​ແຫລ​ງຂ່າວ​-ວັດທະນະທຳ ລະຫວ່າງ​ລາວ​ກັບ​ຈີນ​ໃຫ້​ໃກ້ຊິດ​ຫຼາຍ​ຂຶ້ນນັບ​ມື້​ອີກ​ດ້ວຍ.

ນອກຈາກ​ການ​ຮ່ວມ​ມື ​ກັບ​ໂທລະ​ພາບ​ສູນ​ກາງຂອງ​ຈີນ ປະຈຳ​ແຂວງ​ຢຸນໜານ​ດັ່ງກ່າວ ​ໂທລະພາບ​ແຫ່ງ​ຊາດ​ລາວ ກໍ​ຍັງ​ໄດ້​ລົ​ງນາມ​ໃນ​ບົດ​ບັນທຶກ​ຄວາມ​ເຂົ້າ​ໃຈ​ວ່າ ດ້ວຍ​ການ​ຮ່ວມ​ມືດ້ານ​ຂໍ້​ມູນ​ຂ່າວສານ ຮ່ວມ​ກັບ​ສະຖານີ​ໂທລະພາບ​ສູນ​ກາງ ປະຈຳ​ແຂວງ​ກວາງ​ສີ​ຂອງ​ຈີນ​ອີກ​ດ້ວຍ ທັງ​ນີ້ ​ໂດຍ​ຝ່າຍ​ຈີນ​ຕົກລົງ​ຈະ​ໃຫ້ການ​ຊ່ວຍ​ເຫຼື​ອ​ໂທລະພາບແຫ່ງ​ຊາດ​ລາວ​ ​ໃນ​ການ​ພັດທະນາ​ຄຸນ​ນະພາ​ບຂໍ້​ມູນ​ຂ່າວສານ ​ແລະ​ເຕັກນິກ​ການ​ອອກ​ອາກາດ ​ໃນ​ລະບົບ Digital ຢ່າງ​ສົມບູນ​ພາຍ​ໃນ​ປີ 2015 ດ້ວຍ​ເງິນ​ທຶນ​ກວ່າ 130 ລ້ານດອນ​ລາ.

​ແຕ່​ກໍ​ເປັນ​ທີ່​ໜ້າ​ສັງ​ເກດ​ວ່າ ການ​ລົງ​ນາມ​ໃນ​ຄວາມ​ຮ່ວມ​ມື​ດັ່ງກ່າວ​ນີ້ ​ໄດ້​ມີ​ຂຶ້ນ​ໃນ​ຂະນະ​ທາງ​ການ​ລາວ ກຳລັງ​ພະຍາຍາມ​ດຳ​ເນີນ​ມາດ​ຕະການ​ກວດກາ​ການ​ນຳ​ໃຊ້​ສື່​ສັງຄົມ (Social Media) ​ໃນ​ລະບົບ Internet ທີ່​ມີ​ການ​ຮັບ​ສົ່ງ​ຂໍ້​ມູນ​ຂ່າວສານ ລະຫວ່າງ​ກັນ​ຕະຫຼອດ​ເວລາ​ນັ້ນ ​ໂດຍ​ທີ່​ທາງ​ການ​ລາວ​ຈະ​ມີ​ການ​ເພີ່ມ​ມາດ​ຕະການ​ກວດກາ ຢ່າງ​ເຂັ້ມງວດ​ໃຫ້​ຫຼາຍ​ກວ່າ​ເກົ່າ ​ເນື່ອງ​ຈາກ​ເຫັນ​ວ່າ ​ໄດ້​ມີ​ການ​ນຳໃຊ້​ສື່​ສັງຄົມ​ໄປ​ໃນ​ທາງ​ ທີ່​ບໍ່​ສ້າງ​ສັນ​ຫຼາຍ​ຂຶ້ນ ທັງ​ຍັງ​ມີ​ການ ​ໃຫ້ຂໍ້​ມູນຂ່າວສານ​ທີ່​ບໍ່​ມີ​ມູນ​ຄວາມ​ຈິງ​ອີກ​ດ້ວຍ.

ຍິ່ງ​ໄປ​ກວ່າ​ນັ້ນ ຈາກ​ການ​ດຳ​ເນີນ​ມາດ​ຕະການ​ກວດກາ ​ໃນໄລຍະ​ທີ່​ຜ່ານ​ມາ ກໍ​ຍັງ​ພົບ​ວ່າ ມີ​ການ​ນຳ​ໃຊ້​ສື່​ສັງຄົມ ອິນ​ເຕີ​ເນັດ ​ໄປໃນ​ການ​ວິພາກ​ວິຈານ​ທາງ​ການເມືອງ ​ແລະໃສ່​ຮ້າຍ​ປ້າຍ​ສີກາ​ນນຳ ໃນ​ພັກ ​ແລະ​ລັດ​ຖະບານ​ລາວ​ອັນ​ຈະ​ສົ່ງ​ຜົນ​ກະທົບ​ຕໍ່​ຄວາມ​ໝັ້ນຄົງ​ແຫ່ງ​ຊາດ ​ໄດ້​ອີກ​ດ້ວຍ​ເພາະສະນັ້ນ ຈຶ່ງ​ຈະ​ຕ້ອງ​ມີ​ການ​ດຳ​ເນີນ​ມາດ​ຕະການ​ປິດ​ກັ້ນສື່​ສັງຄົມ​ດັ່ງກ່າວ​ຢ່າງ​ເຂັ້ມງວດ ​ໃນ​ໄລຍະ​ຕໍ່​ໄປ​ນີ້ ດັ່ງ​ທີ່​ທ່ານ​ຫຽມ ພົມມະຈັນ ລັດຖະມົນຕີ​ວ່າການ ກະຊວງ​ໄປສະນີ ​ແລະ​ໂທລະ​ຄົມມະນາຄົມ ​ໄດ້​ຖະ​ແຫລ​ງຢືນຢັນ​ວ່າ:

“​ໃນ​ການ​ໃຊ້​ສື່​ສັງຄົມ Online ນີ້ ຜົນ​ປະ​ໂຫຍດນີ້ ກໍ​ເພື່ອ​ເປັນ​ຂໍ້​ມູນ ​ແລະ​ແບ່ງ​ຂໍ້​ມູນ​ຄວາມ​ຮູ້ ສາລະ​ຕ່າງໆ​ ການ​ໂຄສະນາ​ເຜີຍ​ແຜ່​ປະຊາສຳພັນ ລະຫວ່າງ​ບຸກຄົນ​ກັບ​ບຸ​ກຄົນ ລະຫວ່າງ​ອົງການກັບອົງການ ​ແລະ​ບັນດາ​ນັກ​ທຸລະ​ກິດ ກໍ​ຄື​ການ​ຄ້າ​ແຕ່​ຖ້າ​ຫາກ​ບັນຊີ​ໃດ ຫຼື​ວ່າ​ຜູ້​ໃດ ຂໍ້ຄວາມໃດ ທີ່​ມັນ​ເປັນ​ໄພ​ແກ່​ສັງຄົມ ​ເປັນ​ໄພ​ແກ່​ຜູ້ອື່ນ ​ແລະ​ປະ​ເທດ​ຊາດ​ຫັ້ນ ພວກ​ເຮົາ​ຈະ​ຕັດ​ເປັນ​ກໍລະນີ​ໄປ.”

ການ​ນຳ​ໃຊ້​ສື່​ສັງຄົມ​ດ້ວຍ​ລະບົບ ອິນ​ເຕີ​ເນັດ​ໃນ​ລາວ ​ໄດ້ເພີ່ມ​ຂຶ້ນຢ່າງ​ໄວ​ວາ ນັບ​ແຕ່​ປີ 2010 ທີ່​ລາວ​ໄດ້​ເລີ້ມ​ນຳ​ໃຊ້​ລະບົບ​ສື່ສານ 3G ​ແລະ​ໄດ້​ຍົກ​ລະດັບ​ເປັນ​ລະບົບ 4G ນັບ​ຈາກ​ປີ 2012 ​ເປັນຕົ້ນມາ ຊຶ່ງ​ກໍ​ປາກົດ​ວ່າ ມີ​ຜູ້ນຳ​ໃຊ້​ໂທລະສັບ​ມື​ຖື​ແລ້ວ ​ຫຼາຍ​ກວ່າ 4.3 ລ້ານ​ຄົນ ຫຼື 65 ​ເປີເຊັນ ຂອງ​ປະຊາກອນ​ທັງ​ໝົດ​ໃນ​ປັດຈຸບັນ ​ໂດຍ​ໃນ​ນີ້​ກໍ​ມີ​ຢູ່​ຫຼາຍ​ກວ່າ 8 ​ແສນ​ຄົນ​ທີ່​ນຳ​ໃຊ້​ສື່​ສັງຄົມ ອິນ​ເຕີ​ເນັດ ​ແລະ​ເພີ່ມ​ຂຶ້ນ​ເປັນ​ຫຼາຍ​ກວ່າ 1 ລ້ານ​ຄົນ​ນັບ​ແຕ່​ທ້າ​ຍປີ 2014 ​ເປັນຕົ້ນມາ.

ຍິ່ງ​ໄປ​ກວ່າ​ນັ້ນ ການ​ທີ່​ທາງ​ການ​ລາວ​ກຳນົດ ທີ່​ຈະ​ສົ່ງ​ດາວ​ທຽມ​ດວງ​ທຳ​ອິດ​ທີ່​ລົງທຶນ​ໂດຍ​ບໍລິສັດ​ຈີນ ​ໃນໂອກາດ​ສະ​ເຫລີມສະຫລອງ ການ​ສະຖາປະນາ ສປປ ລາວ​ຄົບຮອບ 40 ປີ ​ໃນ​ທ້າຍ​ປີ 2015 ນັ້ນ ກໍ​ຍັງ​ຈະ​ເຮັດ​ໃຫ້ການ​ຊົມ​ໃຊ້​ສື່​ສັງຄົມ ອິນ​ເຕີ​ເນັດ ​ໃນ​ລາວ​ມີ​ຄວາມ​ທັນ​ສະ​ໄໝ ​ແລະ ຂະຫຍາຍ​ກວ້າງຂຶ້ນອີກ​ດ້ວຍ.

ເບິ່ງຄວາມເຫັນ (30)

ຟໍຣັມສະແດງຄວາມເຫັນ ກ່ຽວກັບເລື່ອງນີ້ ອັດແລ້ວ

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ
XS
SM
MD
LG