ລິ້ງ ສຳຫລັບເຂົ້າຫາ

ບໍລິສັດຈີນທຸ່ມເທ ຫລາຍພັນລ້ານໂດລາ ສ້າງເຂດເສດຖະກິດພິເສດ ທີ່ແຂວງບໍ່ແກ້ວ (ວີດີໂອລາວ/ອັງກິດ)

  • ທອງປານ ເທບວົງສາ

ນາງອຸຍຄໍາ ຜູ້ນຶ່ງທີ່ຖືກຍົກຍ້າຍຈາກບ້ານເດີມຍ້ອນໂຄງການສ້າງສາ ໄປຢູ່ບ້ານທີ່ສ້າງໃຫ້ຢູ່ໃໝ່ ແລະຈົ່ມທຸກວ່າບ້ານຫລັງໃໝ່ບໍ່ມີດິນພຽງພໍປູກຜັກຢູ່ກິນ ບໍ່ມີຕົ້ນໄມ້ ແລະຮ້ອນເອົ້າຫລາຍ

ຢູ່​ໃກ້ໆ​ເຂດ​ສາມຫລ່ຽມທອງ​ຄໍາ​ທີ່​ມີ​ຊື່​ສຽງ ບ່ອນ​ທີ່ຊາຍ​​ແດນ ມຽນມາ ລາວ ​​ແລະ​ໄທ ມາບັນ ຈົບຄົບ​ກັນ ບໍລິສັດ​ຈີນ​ບໍລິສັດ​ນຶ່ງມີ​ແຜນການ​ທີ່​ປັບ​ປ່ຽນ​ພື້ນທີ່​ປ່າດົງ ​ແລະພື້ນ​ທີ່ປູກຝັງອັນ ກ້ວາງໃຫຍ່ ຊຶ່ງ​ຄັ້ງ​ນຶ່ງເຄີຍ​​ເປັນ​ເຂດ​​ຄ້າ​ຝິ່ນ​ນັ້ນ ໃຫ້​ເປັນ​ແຫ​ລ່ງດຶງ​ດູດນັກ​ທ່ອງ​ທ່ຽວ. ບໍລິສັດ​ Kings Romans ກ່າວ​ວ່າ ຕົນ​ກໍາລັງສ້າງ​ເຂດ​ເສດຖະກິດ​ໃໝ່​ຂື້ນ​ມາ ຊຶ່ງ​ພາກສ່ວນນຶ່ງແມ່ນ ຈະອິງໃສ່​​ກາ​ຊິ​ໂນ ຫລືສະຖານທີ່ຫລິ້ນການພະນັນຫລັງໃຫຍ່ ທີ່​ສ່ອງ​ແສງສະຫວ່າງເຫລື້ອມ ງາມ​ຕານັ້ນ ເປັນຫລັກ. Daniel Schearf ຜູ້​ສື່​ຂ່າວ​ວີ​ໂອ​ເອ ລາຍ​ງານມາ ­­ຈາກ​​​ແຂວງ​ບໍ່​ແກ້ວ ສປປ ລາວ ຊຶ່ງ​ທອງປານ​ຈະ​ນໍາ​ມາສະ​ເໜີ​ທ່ານ​.

ເບິ່ງວີດີໂອ ພາສາລາວ:

ບ່ອນຫລິ້ນການ​ພະນັນ​ ຫລືກາສິ​ໂນ ທີ່​ດໍາ​ເນີນ​ການ​ໂດຍ​ບໍລິສັດຈີນ Kings Romans ນັ້ນ
ແມ່ນ​ເປັນແຫ່ງ​ນຶ່ງໃນບັນດາສະຖານ​ທີ່​ທີ່ໂດດເດ່ນ​ສະດຸດ​ຕາ ​ສົ່ງແສງຍິບຍັບ ງາມ​ອະ​ລ່າມ​ຕາ
ທີ່ຕັ້ງ​ຢູ່​ໃນເຂດສາມຫລ່ຽມ​ຄໍາ ​ແຄມແມ່​ນໍ້າຂອງທາງຝັ່ງລາວ.

ບໍລິສັດ Kings Romans ​ໄດ້​ເຊັນ​ສັນຍາ​ເຊົ່າ 99​ ປີ ກັບ​ລັດຖະບານ​ລາວ ​ເພື່ອ​ພັດທະນາ
​ແລະ​ຕັ້ງ​ເຂດ​ເສດຖະກິດ​ພິ​ເສດ ​ຕາມ​ພື້ນ​ທີ່​ຊົນນະບົດ​ອັນ​ຍາວ​ຢຽດ ທີ່​ມີ​ໜ້າດິນ​ກ້ວາງກວ່າ
100 ກິ​ໂລ​ແມດ​ມົນທົນ.

​ແຜນການ​ດັ່ງ​ກາວ​ ແມ່ນໃຫຍ່ໂຕ​ພໍ​ສົມຄວນ. ເຈົ້າໜ້າທີ່ຄົນນຶ່ງຂອງບໍລິສັດ ຊີ້ໄປໃສ່ແຜນຜັງ ພ້ອມກັບອະທິບາຍວ່າ:

ບ່ອນ​ນີ້​ຈະເປັນ​ສະໜາມ​ບິນ. ບ່ອນ​ນີ້ຈະ​ເປັນເຂດ​ອຸດສາຫະກໍາ. ບ່ອນ​ນີ້​ຈະ​ເປັນ
​ສະພານ​ເຊຶ່ອມ​ໂຍງ​ກັບ​ໄທ​ແລະ​ມຽນມາ
. ​ໂຄງການ​ທັງ​ໝົດນີ້​ຈະ​ສ້າງ​ສໍາ​ເລັດ​ລົງ​
ພາຍ​ໃນ 20 ປີ​ຕໍ່ໜ້າ.

ສໍາລັບ​ຕອນ​ນີ້ ສະໜາມ​ບິນ​ໃນ​ອະນາຄົດ ຍັງ​ເປັນ​ພຽງ​ແຕ່​ຖະໜົນ​ສາຍ​ນຶ່ງ

​ແຕ່​ການ​ກໍ່ສ້າງ​ກໍ​ດໍາ​ເນີນ​ໄປ​ຢ່າງ​ວ່ອງ​ໄວ ​ແລະ​ພວກ​ຄົນ​ງານ​ກໍ​ຖາງ​ປ່າ ​ດຸດຕົ້ນ​ໄມ້ ​ແລະ​ດຸດ​ພູ
​ໃຫ້​ເປັນ​ດິນພຽງ.

ປະຊາຊົນ​ຫລາຍ​ຮ້ອຍ​ຄົນ​ທີ່ຕ້ອງໄດ້​ຍົກຍ້າຍ​ອອກ​ຈາກ​ຖິ່ນ​ຢູ່​ອາ​ໃສ​ຍ້ອນ​ການ​ສ້າງສາ​ນັ້ນ​ ກໍໄດ້​ຖືກ​ຍ້າຍໄປ​ຕັ້ງ​ຖິ່ນ​ຖານ​ຢູ່​ບ່ອນ​ອື່ນ ​ແລະ​ປຸກ​ບ້ານ​ຫລັງ​ໃໝ່​ໃຫ້​ຢູ່ ທີ່ບ້ານ​ສາມຫລ່ຽມ​ຄໍາ ​ທີ່​ຫາ​ກໍ​ເປີດ​ໃໝ່​ໆ​ແຫ່ງນີ້.

​ໃນ​ລະຫວ່າງ​ການງັນ ກຽມສົ່ງສະການ​ ຢູ່ເຮືອນດີຫລັງນຶ່ງເມື່ອໄວໆມານີ້ ພວກ​ຊາວບ້ານ​ໃໝ່ ພາກັນນັ່ງຫລິ້ນ​ໄພ້​ກັນ ​ແລະໂສ​ກັນ​ເລຶ່ອງການ​ດໍາລົງ​ຊີວິດ​ຢູ່ໝູ່​ບ້ານທີ່​ທາງບໍລິສັດສ້າງ​ໃຫ້ນັ້ນ.

ນາງ ອຸ້ຍ​ຄໍາ ກ່າວ​ວ່າ ບໍ່​ມີ​ຕົ້ນ​ໄມ້​ພຽງພໍ ເຮັດໃຫ້ມັນ​ຮ້ອນ​ເອົ້າ​ຫລາຍ​ທີ່​ຈະ​ປູກ​ແນວຢູ່ແນວ​ກິນ. ດຽວ​ນີ້​ລູກ​ເຕົ້າ​ຂອງ​ລາວແມ່ນພາກັນໄປ​ເຮັດ​ໄຮ່​ສວນ​ຢູ່​ຝັ່ງ​ໄທໝົດ ​ເພື່ອ​ຫາ​ເງິນ.

ຢູ່​ບ້ານ​ເກົ່າ ​ເຮົາ​ມີ​ລາຍ​ໄດ້ ​ແຕ່​ບາດ​ມາ​ຢູ່​ບ້ານ​ໃໝ່​ນີ້​ມີ​ແຕ່​ຈ່າຍ​ເງິນ. ​ເຮົາ​ບໍ່​ຮູ້ຈະ​ເອົາ​ຫຍັງ
​ມາ​ຂາຍ​ເພື່ອ​ຫາ​ເງິນ​ລ້ຽງ​ຊີບ. ຢູ່​ນີ້ ​ປູກ​ຫຍັງ​ກະ​ບໍ່​ໄດ້ ພວກ​ເຮົາພະຍາຍາມ​ປູກ​ຜັກ​ກິນ
​ແຕ່​ມັນ​ກໍ​ບໍ່​ງາມ.

​ໃນ​ຂະນະ​ທີ່ ບໍລິສັດ Kings Roman ທໍາການ​ສ້າງສາຕ່າງໆເພື່ອປັບ​ປ່ຽນ​ທິວວະທັດໃໝ່​ຂອງ
​ເຂດສາມຫລ່ຽມ​ຄໍາ​ນັ້ນ ກໍ​ມີ​ວຽກ​ງານ​ໃໝ່​ໃຫ້ເຮັດຢູ່ສໍາລັບ​ ພວກ​ຄົນ​ງານ​ທີ່​ມີ​ຄວາມ​ຊໍານານ
​ຕາມ​ໜ້າ​ວຽກ.

ນາຍກອນ ຈາວ ກັນ ກໍາມະກອນຊາວ​ມຽນມາ ເຮັດ​ວຽກ​ຢູ່​ໃນ​ເຂດ​ເສດຖະກິດ​ພິ​ເສດ​ນີ້ມາ​ໄດ້
​ສາມ​ປີ​ແລ້ວ. ລາວກ່າວວ່າ ​ເຖິງ​ແມ່ນ​ຄ່າ​ຈ້າງ​ຈະ​ສູງ​ກວ່າ​ຢູ່​ບ້ານ​ ​ກໍ​ຈິງ​ຢູ່ ​ແຕ່ມັນ​ກໍ​ມີ​ຄວາມເສຍ
ປຽບ​ຫລາຍ​ຢ່າງ ຊຶ່ງລາວເວົ້າວ່າ:

ຢູ່​ມຽນມາ​ ຂ້ອຍເຮັດ​ໄຮ່​ເຮັດ​ນາ. ມັນ​ເປັນ​ວຽກ​ຂອງ​ຂ້ອຍ​ເອງ ​ແລະ​ຂ້ອຍ​ຕັ້ງເວລາ​ເຮັດ​
ວຽກ​ເອົາ​ເອງ ​ແຕ່​ຢູ່​ນີ້
​ຂ້ອຍ​ມີ​ແຕ່​ເປັນ​ຫ່ວງ​ນໍາ​ຢ້ານ​ຕົກ​ງານ ​ເພາະວ່າ​ຂ້ອຍ​ຊອກ​ວຽກ​ອື່ນ
.​ບໍ່​ໄດ້ ຢູ່​ນີ້
ມີ​ບໍລິສັດ​ດຽວ​ເທົ່ານັ້ນ.

​ໃນ​ຕອນ​ນີ້ ກໍ່າ​ປັ່ນ​ຄ້າຂາຍ ​ແລະ​ຊາວ​ປະມົງ ຄື​ຮູບ​ພາບ​ຂອງ​ການ​ດໍາລົງຊີວິດ​ ຢູ່​ຕາມ​ລໍາ​ແມ່​
ນໍ້າຂອງ​ ໃນເຂດ​ນີ້.

​ແຕ່​ບໍລິສັດ Kings Romans ກໍາລັງ​ພະນັນ ທຸ່ມເທ​ເງິນ​ຫລາຍ​ຮ້ອຍ​ລ້ານ​ໂດ​ລາ ເກັງກໍາໄລວ່າ ​
ໃນ​ບໍ່​ຊ້າ​ນີ້ ​ພວກ​ຄົນ​ລວຍ​ທີ່​ເພີ່ມ​ຫລາຍ​ຂຶ້ນນັບ​ມື້​ຂອງ​ຂົງ​ເຂດ​ເອ​ເຊຍ​ນັ້ນ ກໍ​ຈະ​ເຂົ້າມາ​ຮ່ວມ​ກັບ
​ພວກ​ເຂົາ​ເຈົ້າ​ ໃນ​ຖານະ​ເປັນ​ຂາ​ປະ​ຈໍາ​ຢູ່​ເຂດ​ສາມຫລ່ຽມ​ຄໍາ​ ທີ່​ມີທິວ​ວະທັດ​ສວຍ​ງາມ​ແຕ່​ມີ​ຊື່
​ສຽງ​ບໍ່​ດີ​ນັ້ນ​.

ເບິ່ງວີດີໂອ ພາສາອັງກິດ:

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG