ສ​ປ​ປ ລາວ ແລະ​ກຳ​ປູ​ເຈຍ ​ເສີມຂະຫຍາຍ ​ການ​ຮ່ວມ​ມື ຫຼາຍໆ​ດ້ານ

ສ​ປ​ປ ລາວ ແລະ​ກຳ​ປູ​ເຈຍໄດ້​ຕົກ​ລົງທີ່​ຈະຂະຫຍາຍການຮ່ວມ
ມືກັນໃນຫລາຍໆດ້ານ ໃນລະຫວ່າງກອງປະຊຸມຂອງຄະນະກຳ
ມາທິການຮ່ວມ ​ວ່າ​ດ້ວຍການຮ່ວມມື​ສອງ​ຝ່າຍ ລາວ-ກຳປູເຈຍ
ຄັ້ງ​ທີ 12 ຢູ່ນະຄອນສຽມຣຽບ ປະເທດກຳປູເຈຍ ເມື່ອວັນທີ 23
ຫາ 24 ມັງກອນ ຜ່ານມານີ້.

​ເຂົ້າ​ຮ່ວມກອງປະຊຸມຄັ້ງ​ນີ້ ຝ່າຍລາວແມ່ນນຳໂດຍ ທ່ານທອງລຸນສີສຸລິດ ຮອງນາຍົກລັດ
ຖະມົນຕີ ແລະລັດຖະມົນຕີການຕ່າງປະເທດ ສປປ ລາວ ສ່ວນກຳປູເຈຍແມ່ນນຳໂດຍ
ທ່ານ Hor Namhong ຮອງນາຍົກລັດຖະມົນຕີ ລັດ​ຖະ​ມົນຕີ​ກາ​ນ​ຕ່າງ​ປະ​ເທດແລະ​ຮ່ວມ
ມື​ສາ​ກົນ.

ໃນ​ກອງ​ປະ​ຊຸມ​ຄັ້ງ​ນີ້ ທັງ​ສອງ​ຝ່າຍ​ໄດ້​ຕົກ​ລົງ​ກັນ ​ກ່ຽວ​ກັບ​ການ​ເປີດ​ດ່ານ​ສາ​ກົນ ໜອງນົກຂຽນ
- Trapaing Kreal ​ຕິດ​ຕາມ​ເບິ່ງ​ການຈັດ​ຕັ້ງ​ປະຕິບັດລະ​ບຽບ​ການ​ຂອງ​ຂໍ້​ຕົກ​ລົງ​ປີ 1995
ກ່ຽວກັບ​ການ​ຮ່ວມ​ມື​ ໃນ​ການ​ພັດ​ທະ​ນາ​ແບບ​ຍືນ​ຍົງ ໃນ​ເຂດ​ອ່າງ​ແມ່​ນ້ຳ​ຂອງ ເພີ້ມ​ການຂົນ
​ສົ່ງ​ທາງລົດ​ແຕ່​ສຽມ​ຣຽບ​ຫາ​ປາກ​ເຊ ແຕ່​ພະ​ນົມ​ເປັນ​ຫາ​ປາກ​ເຊ ແລະເປີດ​ຖ້ຽວ​ບິນໂດ​ຍ​ກົງ​
ແຕ່​ປາກ​ເຊ​ຫາ​ສຽມ​ຣຽບ ສ້າງ​ຕັ້ງ​ຄະ​ນະ​ກຳ​ມາ​ທິ​ການ​ເພື່ອ​ສຶກ​ສາເບິ່ງຄວາມ​ເປັນ​ໄປ​ໄດ້​
ໃນ​ການ​ສ້າງ​ຂົວ​ທີ່​ຊາຍ​ແດນ​ລາວ-ກຳ​ປູ​ເຈຍ ເພື່ອ​ເຊື່ອມ​ຕໍ່​ແຂວງ​ພະ​ວິ​ຫານ ແລະ​ຈຳ​ປາ​ສັກ
ເພີ້ມ​ການສະ​ແດງ​ສິນ​ຄ້າ​ຂອງລາວ​ຢູ່​ກຳ​ປູ​ເຈຍ ແລະສົ່ງ​ເສີມ​ໃຫ້ນັກ​ທ່ອງທ່ຽວ​ກຳ​ປູ​ເຈຍ ​
ເຂົ້າ​ໄປ​ທ່ຽວ​ໃນ​ລາວເພີ້ມ​ຂຶ້ນ ເປີດ​ດ່ານ​ຊາຍ​ແດນ​ແຫ່ງ​ໃໝ່ເພື່ອ​ສົ່ງ​ເສີມການ​ຄ້າ​ແລະ​ການ​
ທ່ອງ​ທ່ຽວ ຂະ​ຫ​ຍາຍ​ກາ​ນ​ໃຫ້​ທຶນ​ການ​ສຶກ​ສາ​ລະ​ຫວ່າງ​ກັນ ແລະ​ແລກ​ປ່ຽນ​ໃນ​ດ້ານ​ກິ​ລາ
ນັບ​ແຕ່​ລະ​ດັບ​ຊາດ ລົງ​ຫາ​ລະ​ດັບ​ທ້ອງ​ຖິ່ນ.

​ນອກນັ້ນ ສປປ ລາວ ແລະກຳປູເຈຍ ຍັງໄດ້​ຫາ​ລື​ກັນ ​ກ່ຽວ​ກັບ​ແຜນ​ການ​ທີ່​ຈະເປີດກົງສຸນ
ໃຫຍ່​ຂຶ້​ນ ທີ່​ແຂວງຈຳປາສັກຂອງ​ລາວ ແລະແຂວງສຽມ​ຣຽບຂອງ​ກຳ​ປູ​ເຈຍ​ຫລື​ແຂວງ​ອື່ນໆ
ເພື່ອອຳນວຍຄວາມສະດວກໃນການຢ້ຽມຢາມ ລະຫວ່າງປະຊາຊົນສອງປະເທດ ພ້ອມທັງ
ເປັນການຊຸກຍູ້ການທ່ອງທ່ຽວ ແລະການລົງທຶນນຳດ້ວຍ.

ພ້ອມນີ້ ທັງ​ສອງ​ຝ່າຍ ຍັງ​ມີ​ຄວາມ​ໝາຍ​ໝັ້ນ​ທີ່​ຈະ​ສະ​ກັດ​ກັ້ນ​ແລະ​ຄວບ​ຄຸມກິດ​ຈະ​ກຳ​ ທີ່​ຜິດ​
ກົດ​ໝາຍ​ຕ່າງໆ ໃນ​ການ​ລັກ​ລອບ​ຕັດ​ໄມ້ ​ແລະ​ການ​ຄ້າ​ສັດ​ປ່າ ຢູ່ ໃນ​ບໍ​ລິ​ເວນ​ຊາຍ​ແດນ.

ພ້ອມນີ້ ທາງກອງປະຊຸມຍັງໄດ້ຕົກລົງກັນທີ່ຈະເປັນເຈົ້າພາບຈັດກອງປະຊຸມຄະນະກຳມາ
ທິການຮ່ວມຊາຍແດນ ລາວ-ກຳປູເຈຍຄັ້ງທີ 6 ຂຶ້ນທີ່ກຸງພະນົມເປັນ ໃນວັນທີ 26 ຫາ 27
ກຸມພາຈະມານີ້.