ລິ້ງ ສຳຫລັບເຂົ້າຫາ

logo-print

ພ​ະ​ນັກ​ງານ ​ອົງ​ການກວດ​ກາລັດ​ ມີ​ຕຳ​ແໜ່ງ​ຕ່ຳ​ກວ່າ ​​ພະ​ນັກ​ງານພັກ-​ລັດ ​ທີ່​ຖືກກວດ​ສອບ ເປັນສາເຫດ​ ເຮັດ​ໃຫ້​ບໍ່​ມີ​ການ​ລົງ​ໂທດ


ບັນ​ດາ​ພະ​ນັກ​ງານກວດ​ກາ​ພັກ-ລັດ ຂອງ​ອົງ​ການກວດ​ກາ​ລັດ​ຖະ​ບານ ໄດ້​ຮັບ​ການ​ຝຶກ​ອົບ​ຮົມ ໃນ​ວຽກ​ງານ​ການກວດ​ກາ

ພະ​ນັກ​ງານ​ອົງ​ການກວດ​ສອບ​ລັດ​ຖະ​ບານ ມີ​ຕຳ​ແໜ່ງ​ຕ່ຳ​ກວ່າ​ພະ​ນັກ​ງານ​ພັກ-​ລັດ ທີ່​ຖືກກວດ​ສອບ​ຄື​ສາ​ເຫດ​ສຳ​ຄັນ​ທີ່​ເຮັດ​ໃຫ້​ບໍ່​ມີ​ການ​ລົງ​ໂທດ​ຕໍ່​ບັນ​ດາ​ພະ​ນັກ​ງານ​ພັກ-ລັດ ທີ່​ທຸ​ຈະ​ລິດ​ໃນ​ໜ້າ​ທີ່​ຂອງ​ຕົນ.


ທ່ານ​ກົງ​ຈີ້ ຢ່າງ​ຈື ສະ​ມາ​ຊິກ​ສະ​ພາ​ແຫ່ງ​ຊາດ​ລາວ ຈາກ​ແຂວງ​ຜົ້ງ​ສາ​ລີ ຖະ​ແຫລງວ່າ ການ​ທຸ​ຈະ​ລິດ​ຄໍ​ຣັບ​ຊັ້ນ ທີ່​ເພີ້ມ​ຂຶ້ນ​ນັບ​ມື້ ແຕ່​ກໍ​ຍັງ​ປາ​ກົດ​ວ່າ ມີ​ການ​ລົງ​ໂທດ​ຕໍ່​ບັນ​ດາ​ພະ​ນັກ​ງານ​ພັກ-ລັດ ທີ່​ປະ​ຕິ​ບັດ​ໜ້າ​ທີ່​ໂດຍ​ທຸ​ຈະ​ລິດ​ຄໍ​ຣັບ​ຊັ້ນ ໃນ​ລະ​ດັບ​ທີ່​ຕ່ຳຫຼາຍນັ້ນ ກໍ​ຍ້ອ​ນວ່າ ພະ​ນັກ​ງານ​ທີ່​ທຳ​ການກວດ​ສອບ ມີ​ຖາ​ນະ​ຕຳ​ແໜ່​ງ​ຕ່ຳ​ກວ່າ​ພະ​ນັກ​ງານ​ທີ່​ຖືກກວດ​ສອບ​ທັງ​ໃນ​ວົງ​ການ​ພັກ ແລະ​ລັດ​ຖະ​ບານ ດ້ວຍ​ເຫດນີ້ ຈຶ່ງ​ເຮັດ​ໃຫ້​ຜູ້ກວດ​ສອບບໍ່​ມີ​ອຳ​ນາດ ທີ່​ຈະ​ລົງ​ໂທດ​ຕໍ່​ພະ​ນັກ​ງານ​ຜູ້​ທີ່​ຖືກກວດ​ສອບ ແລະ​ມີ​ຕຳ​ແໜ່ງ​ສູງກວ່ານັ້ນ​ເອງ ສະ​ນັ້ນ ເພື່ອ​ເປັນ​ການ​ແກ້​ໄຂ​ບັນ​ຫາ​ດັງ​ກ່າວ ຈຶ່ງ​ມີ​ພຽງ​ແຕ່​ການ​ເພີ້ມ​ອຳ​ນາດ​ໃຫ້​ກັບ​ບັນ​ດາ​ພະ​ນັກ​ງານ​ທີ່​ດຳ​ເນີນ​ການກວດ​ສອບ​ການ​ທຸ​ຈະ​ລິດ ໃນ​ວົງ​ການ​ພັກ-ລັດ​ເທົ່າ​ນັ້ນ ດັ່ງ​ທີ່​ ທ່ານ​ກົງ​ຈີ້ໃຫ້​ການ​ຢືນ​ຢັນ​ວ່າ:

“ເຫດ​ຜົນ​ທີ່​ພວກ​ເຮົາ​ພົບ​ເຫັນ​ບັນ​ຫາ ແລ້ວ​ປະ​ຕິ​ບັດ​ບໍ່​ໄດ້ ເຮັດ​ໃຫ້​ປະ​ຊາ​ຊົນ​ເຮັດ​ໃຫ້​ສັງ​ຄົມ​ຂາດ​ຄວາມ​ເຊື່ອ​ຖືນີ້ ຍ້ອນ​ວ່າ ດ້ານ​ການ​ຈັດ​ຕັ້ງ​ບໍ່​ສອດ​ຄ້ອງ​ປານ​ໃດ ຍ້ອນ​ວ່າ ຜູ້​ໄປ​ກວດ​ການີ້ ມີ​ຕຳ​ແໜ່ງ​ຕ່ຳ​ກວ່າ ເບື້ອງ​ພັກ​ກະ​ຄື​ກັນ ເບື້ອງ​ລັດ ກະ​ຄື​ກັນ ເພາະ​ສະ​ນັ້ນ ເພື່ອ​ໃຫ້​ຊັດ​ເຈນ ເພື່ອ​ໃຫ້​ສາ​ມາດ​ແກ້​ໄຂ ບັນ​ຫາ​ໄດ້​ນີ້ ອາດ​ຈະ​ພິ​ຈາ​ລະ​ນາ ເພື່ອ​ໃຫ້​ຜູ້ກວດ​ການີ້ ມີ​ອຳ​ນາດ​ສູງກວ່າ”

ທາງ​ດ້ານ ທ່ານ​ນາງວຽງ​ທອງ ສີ​ພັນ​ດອນ ປະ​ທານ​ອົງ​ການກວດ​ສອບ​ແຫ່ງ​ລັດ ຖະ​ແຫລງ​ຢືນ​ຢັນ​ວ່າ ການ​ທຸ​ຈະ​ລິດ ໂດຍ​ບັນ​ດາ​ພະ​ນັກ​ງານ​ລັດ ຍັງ​ເກີດ​ຂຶ້ນ​ຢ່າງກວ້າງ​ຂວາງ ເພາະ​ໄດ້​ມີ​ການ​ຮ່ວມ​ມື​ກັນ​ຢ່າງ​ເປັນ​ຂະ​ບວນ​ການ ໃນ​ທຸກ​ລະ​ດັບ ດັ່ງ​ກໍ​ລະ​ນີ​ການ​ຂາຍ​ໄມ້​ຂອງ​ລັດ​ໃນ​ລາ​ຄາ ທີ່​ຕ່ຳ​ກວ່າ​ຄວາມ​ເປັນ​ຈິງ ແລະ​ບໍ່​ຖືກ​ຕ້ອງ​ຕາມ​ລະ​ບຽບ​ການ​ປະ​ມູນ ເຮັດ​ໃຫ້​ລັດ​ຖະ​ບານ​ເສຍ​ຫາຍ​ໄປ​ຢ່າງຫຼວງຫຼາຍ ທັງ​ຍັງ​ກວດ​ພົບ​ວ່າ ມີ​ພະ​ນັກ​ງານ​ລັດ​ນຳ​ເອົາ​ເງິນ​ລາຍ​ໄດ້​ຂອງ​ລັດ​ໄປ​ຝາກ​ກັບ​ທະ​ນາ​ຄານ​ເອ​ກະ​ຊົນ ເພື່ອ​ຍັກ​ຍອກ​ເອົາ​ດອກ​ເບ້ຍ​ໄປ​ເປັນ​ຜົນ​ປະ​ໂຫຍດ​ຂອງ​ຕົນ ຈຶ່ງ​ເຮັດ​ໃຫ້​ຈະ​ຕ້ອງ​ເພີ້ມ​ຄວາມ​ເຂັ້ມ​ງວດ​ເຂົ້າ​ໃນ​ການກວດ​ສອບ​ການ​ປະ​ຕິ​ບັດ​ໜ້າ​ທີ່​ຂອງ​ພະ​ນັກ​ງານລັດ ທັງ​ຢູ່​ຂັ້ນສູນ​ກາງ ແລະ​ຂັ້ນ​ທ້ອງ​ຖິ່ນ​ໃນ​ທົ່ວ​ປະ​ເທດ​ຢ່າງ​ຈິງ​ຈັງ.

ທ່ານ​ນາງວຽງ​ທອງ ຢືນ​ຢັນ​ດ້ວຍ​ວ່າ ການ​ທຸ​ຈະ​ລິດ ທີ່​ເປັນ​ການ​ຮ່ວມ​ມື​ລະ​ຫວ່າງ​ພະ​ນັກ​ງານ​ລັດ ກັບ​ທຸ​ລະ​ກິດ​ເອ​ກະ​ຊົນ​ນັ້ນ ຖື​ເປັນ​ສາ​ເຫດ​ສຳ​ຄັນ​ທີ່​ເຮັດ​ໃຫ້​ລັດ​ຖະ​ບານ​ລາວ ໄດ້​ສູນ​ເສຍ​ລາຍ​ຮ​ຮັບຫຼາຍ​ຂຶ້ນ​ນັບ​ມື້ ທັງ​ຍັງ​ກວດ​ພົບ​ວ່າ ມີ​ພະ​ນັກ​ງານ​ທີ່​ກ່ຽວ​ຂ້ອງບໍ່​ສົ່ງ​ລາຍ​ຮັບ​ຈາກ​ສ່ວຍ​ສາ​ອາ​ກອນ ແລະ​ຊັບ​ສິນ​ຕ່າງໆ​ຂອງ​ລັດ​ ເຂົ້າ​ງົບ​ປະ​ມານ​ຂອງ​ລັດ ຫຼາຍກວ່າ 999 ຕື້​ກີບ ແລະ​ກວ່າ 67 ລ້ານ​ໂດ​ລາ ຊຶ່ງ​ເຮັດ​ໃຫ້​ມີ​ການ​ລົງ​ໂທດ​ທາງວິ​ໄນ​ຕໍ່​ພະ​ນັກ​ງານ​ລັດ 849 ຄົນ ດຳ​ເນີນ​ຄະ​ດີ​ໃນ​ສານ 113 ຄົນ ໃນ​ນີ້​ສານ​ຕັດ​ສິນ​ໂທດ​ແລ້ວ 55 ຄົນ ເກັບ​ເງິນ​ຄືນ​ມາ​ໄດ້ 26.5 ຕື້​ກີບ ກັບ 17 ລ້ານ​ໂດ​ລາ ແລະ​ໄດ້​ຍົກ​ເລີກ​ສຳ​ປະ​ທານ​ໂຄງ​ກາ​ນາ​ຮ່ວມ​ທຶນ​ຂອງ​ເອ​ກະ​ຊົນ​ລາວ ກັບ​ຊ​າວ​ຕ່າງ​ຊາດ​ທີ່​ພົວ​ພັນ ໃນ​ການ​ທຸ​ຈະ​ລິດ​ດັ່ງ​ກ່າ​ວ​ຈຳ​ນວນ 315 ລາຍ​ໃນ​ປີ 2019 ທີ່​ຜ່ານ​ມາ.

ສ່ວນ​ຄະ​ນະ​ກຳ​ມະ​ການ​ຕ້ານ​ການ​ສໍ້​ລາດ​ບັງ​ຫລວງ​ແຫ່ງ​ຊາດ​ລາວ ລາຍ​ງານ​ວ່າ ປີ 2017-2019 ໄດ້​ກວດ​ພົບ​ໂຄງ​ການ​ລົງ​ທຶນ​ຂອງ​ລັດ​ຖະ​ບານ 209 ໂຄງ​ການ ທີ່​ຈັດ​ຕັ້ງ​ປະ​ຕິ​ບັດ​ບໍ່​ຖືກ​ລະ​ບຽບ​ການ​ຈັດ​ຊື້-ຈັດ​ຈ້າງ ໃນ​ນີ້ແບ່ງ​ເປັນ 103 ໂຄງ​ການ​ທີ່ບໍ່​ໄດ້​ຈັດ​ການ​ປະ​ມູນ ແລະ 106 ໂຄງ​ການ​ທີ່​ຈັດ​ການ​ປະ​ມູນບໍ່​ຖືກ​ກົດ​ໝາຍ​ທີ່​ເຮັດ​ໃຫ້​ລັດ​ຖະ​ບາ​ນາລາວ ເສຍ​ຫາຍຫຼາຍກວ່າ 5,331 ຕື້​ກີບ ສ່ວນ​ການ​ຍົກ​ເວັ້ນ​ອາ​ກອນ​ນຳ​ເຂົ້າ​ນ້ຳ​ມັນ​ໃຫ້​ກັບ​ບໍ​ລິ​ສັດ​ຕ່າງ​ຊາດ​ທີ່​ລົງ​ທຶນ​ໃນ​ລາວ ກໍ​ເຮັດ​ໃຫ້​ລັດ​ຖະ​ບານ​ ສູນ​ເສຍ​ດ້ານ​ລາຍ​ຮັບ​ໄປ​ກວ່າ 2,407 ຕື້​ກີບ ແລະ​ກວດ​ພົບ​ຜູ້​ກະ​ທຳ​ຜິດ​ທີ່​ເປັນ​ການ​ຮ່​ວມ​ມື​ລະ​ຫວ່າງ ພະ​ນັກ​ງານ​ລັດ ກັບ​ນັກ​ທຸ​ລະ​ກິດ 1,258 ຄົນ ໃນ​ນີ້ ແບ່ງ​ເປັນ​ພະ​ນັກ​ງາງນ​ລັດ​ເຖິງ 970 ຄົນ ແລະ​ນັກ​ທຸ​ລະ​ກິດ​ເອ​ກະ​ຊົນ 315 ຄົນ.

ສ່ວນ​ອົງ​ການ​ເພື່ອ​ຄວາມ​ໂປ່ງ​ໃສ​ສາ​ກົນ ຫຼື Transparency International ລາຍ​ງານ​ວ່າ ລັດ​ຖະ​ບານ​ລາວ ມີ​ຄວາມ​ໂປ່ງ​ໃສ​ໃນ​ການ​ບໍ​ລິ​ຫານ​ງານ​ພຽງ 29 ຄະ​ແນນ​ຈາກ 100 ຄະ​ແນນ​ໃນ​ປີ 2019 ເທົ່າ​ກັບ ໃນ​ປີ 2018 ຊຶ່ງ​ໝາຍ​ຄວາມ​ວ່າ ໃນ​ຈຳ​ນວນ​ນັກ​ທຸ​ລະ​ກິດ​ຊາວ​ຕ່າງ​ຊາດ​ທີ່​ລົງ​ທຶນ​ໃນ​ລາວ​ທຸກໆ 100 ຄົນນັ້ນ ມີ​ຢູ່ 29 ຄົນ​ທີ່ເຫັນ​ວ່າ ບໍ່​ມີ​ການ​ທຸ​ຈະ​ລິດ​ຄໍ​ຣັບ​ຊັ້ນ ໃນ​ວົງ​ການ​ພັກ-ລັດ​ຖະ​ບານ​ລາວ ໃນ​ຂະ​ນະ​ດຽວ​ກັນ ກໍ​ມີ​ນັກ​ທຸ​ລະ​ກິດ​ຊາວ​ຕ່າງ​ຊາດ​ທີ່​ລົງ​ທຶນ​ໃນ​ລາວ ເຖິງ 71 ຄົນໃນ 100 ຄົນ ເຫັນ​ວ່າ ມີ​ການ​ທຸ​ຈະ​ລິດ​ຄໍ​ຣັບ​ຊັ້ນ ຢ່າງກວ້າງ​ຂວາງ ແລະ​ເຮັດ​ໃຫ້​ລັດ​ຖະ​ບານ​ລາວ ຕ້ອງ​ສູນ​ເສຍ​ລາຍ​ຮັບ​ໄປ​ຢ່າງ​ຫຼວງຫຼາຍ​ໃນ​ແຕ່​ລະ​ປີ.

ເບິ່ງຄວາມເຫັນ

ທ່ານອາດຈະມັກເລື້ອງນີ້ຄືກັນ

XS
SM
MD
LG