ລັດຖະບານ ກຽກກິດສະຖານ ກ່າວໃນວັນອາທິດມື້ນີ້ວ່າ ຕົນກຳລັງສົ່ງພວກທະຫານສຳຮອງໄປຍັງເຂດວຸ້ນວາຍ
ໃນພາກໃຕ້ຂອງປະເທດ ໃນຂະນະທ່ີການຍິງປືນຕໍ່ສູ້ກັນດຳເນີນໄປເປັນຄືນທີສາມລຽນຕິດ ຊຶ່ງໄດ້ຍັງຜົນເຮັດໃຫ້
ປະຊາຊົນເສຍຊີວິດໄປແລ້ວຫລາຍເຖິງ 80 ຄົນ ແລະ ຫລາຍກວ່າ 1 ພັນຄົນຕື່ມອີກ ໄດ້ຮັບບາດເຈັບ.
ລັດຖະບານຊົ່ວຄາວຂອງກຽກກິດສະຖານ ໄດ້ໃຫ້ສິດອຳນາດໃນການຍິງຄົນຮ້າຍຕາຍກັບທີ່ໄດ້ ແກ່ກຳລັງຮັກສາ
ຄວາມປອດໄພຂອງຕົນ ຫລັງຈາກເກີດຄວາມວຸ້ນວາຍ ລະຫວ່າງຊົນກຸ່ມນ້ອຍ Uzbek ແລະ ຊາວ Kyrgyz ໃນ
ເມືອງ Osh ແລະ Jalalabad ໃນພາກໃຕ້ຂອງປະເທດ.
ກຽກກິດສະຖານຊຶ່ງເຄີຍເປັນສະທາລະນະລັດນຶ່ງຂອງອະດີດສະຫະ
ພາບໂຊວຽດ ໄດ້ຮ້ອງຂໍໄປຍັງຣັດເຊຍໃນວັນເສົາວານນີ້ ໃຫ້ສົ່ງທະຫານໄປຊ່ອຍທັບມ້າງຄວາມວຸ້ນວານທ່ີເກີດຂຶ້ນ
ລະຫວ່າງຊົນເຜົ່ານັ້ນ ແຕ່ແທນທ່ີຈະສົ່ງທະຫານໄປ ລັດເຊຍໄດ້ສົ່ງການຊ່ອຍເຫລືອທາງດ້ານມະນຸດສະທຳໄປຊ່ອຍ.
ອົງການຂ່າວ Reuters ກ່າວວ່າ ປະທານາທິບໍດີ Dmitri Medve-Dev ກຳລັງຕິດຕາມສະຖານະການດັ່ງກ່າວຢ່າງໃກ້ຊິດ
ແລະຈະນຳເລື້ອງນີ້ຂຶ້ນມາໂອ້ລົມສົນທະນາກັນໃນວັນຈັນມື້ອື່ນ ເວລາທ່ານພົບປະກັບໜ່ວຍຮັກສາຄວາມປອດໄພ ພາຍໃຕ້
ການນຳພາຂອງກຸງມອສກູຂອງພວກສະທາລະນະລັດເກົ່າ ຂອງອະດີດສະຫະພາບໂຊວຽດ ທ່ີເອີ້ນວ່າ ອົງການສົນທິສັນຍາ
ວ່າດ້ວຍຄວາມປອດໄພຮ່ວມກັນນັ້ນ.
