ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ກີຢິບ ຊຸກຍູ້​ໃຫ້​ບັນດາ​ພັນທະມິດ ​ສ້າງ​ເຂດ​ຫ້າມ​ບິນ​ຢູ່​ພາກ​ຕາ​ເວັນ​ຕົກ​ຂອງ​ຢູ​ເຄຣນ


ບັນດາ​ທະຫານ​ຢູ​ເຄຣນ ນັ່ງ​ຢູ່​ໃນ​ເຮືອ​ລົບ​ຂັບ​ໄລ່​ດ້ວຍ​ຕົນ​ເອງ CAESAR ທີ່​ຜະລິດ​ໂດຍ​ຝຣັ່ງ ຫຼັງ​ຈາກ​ໄດ້​ຍິງ​ໃສ່​ທີ່ຕັ້ງຂອງຣັດ​ເຊຍ, ຢູ່​ໃນ​ເຂດ ໂດເນັສທ, ວັນ​ທີ 27 ມິຖຸນາ 2024.
ບັນດາ​ທະຫານ​ຢູ​ເຄຣນ ນັ່ງ​ຢູ່​ໃນ​ເຮືອ​ລົບ​ຂັບ​ໄລ່​ດ້ວຍ​ຕົນ​ເອງ CAESAR ທີ່​ຜະລິດ​ໂດຍ​ຝຣັ່ງ ຫຼັງ​ຈາກ​ໄດ້​ຍິງ​ໃສ່​ທີ່ຕັ້ງຂອງຣັດ​ເຊຍ, ຢູ່​ໃນ​ເຂດ ໂດເນັສທ, ວັນ​ທີ 27 ມິຖຸນາ 2024.

ເນື່ອງຈາກຂາດ​ລະບົບຕໍ່​ຕ້ານ​ເຮືອບິນ​ທີ່ພຽງພໍ ທີ່ຈະຂັບໄລ່​ການ​ບຸກ​ໂຈມ​ຕີ​ຢ່າງ​ບໍ່​ຢຸດ​ຢັ້ງ​ຂອງ​ຣັດ​ເຊຍ, ຢູ​ເຄຣນ ຈຶ່ງກຳລັງ​ຊຸກຍູ້ໃຫ້​ບັນດາ​ປະ​ເທດ​ພັນທະ​ມິດ​ຢູໂຣບ ສ້າງຕັ້ງເຂດຫ້າມບິນຢູ່​ພາກຕາເວັນຕົກຂອງປະເທດ ໂດຍການຕິດຕັ້ງ ລະບົບປ້ອງກັນໄພທາງອາກາດ​ ​ຢູ່ໃນ​ປະ​ເທດ​ເພື່ອນ​ບ້ານ​ເຊັ່ນໂປ​ແລນ ​ແລະ ໂຣມາເນຍ, ອີງຕາມອົງການຂ່າວ AFP.

ກີຢິບ ຕ້ອງການຈະສ້າງພື້ນທີ່ທີ່ປອດໄພໃນພາກຕາເວັນຕົກຂອງຢູເຄຣນ ບ່ອນທີ່ອຸດສາຫະກໍາ, ພື້ນຖານໂຄງລ່າງພະລັງງານ ແລະພົນລະເຮືອນ ໄດ້ຮັບການປົກປ້ອງຈາກການທໍາລາຍລ້າງຄັ້ງໃຫຍ່ ທີ່ເກີດຈາກການໂຈມຕີ ຂອງຣັດເຊຍໃນຊ່ວງບໍ່ເທົ່າໃດເດືອນທີ່ຜ່ານມາ.

ສະມາຊິກສະພາ ທ່ານ ໂອເລັກຊີ ກອນຈາເຣັນໂກ (Oleksiy Goncharenko) ກ່າວໂດຍອ້າງເຖິງລະບົບປ້ອງກັນໄພທາງອາກາດທີ່ຜະລິດ ໂດຍ ສະຫະລັດວ່າ "ຂ້າພະເຈົ້າບໍ່ເຂົ້າໃຈວ່າເປັນຫຍັງ NATO ຈຶ່ງບໍ່ຕິດຕັ້ງລະ ບົບປ້ອງກັນໄພທາງອາກາດ ເພທຣີອັອຕ (Patriot) ລຽບຕາມແລວຊາຍແດນ ໂປແລນ."

ທ່ານກ່າວຕື່ມວ່າ "ໃນທີ່ສຸດແລ້ວ, ລູກສອນໄຟຂອງຣັດເຊຍ​ກໍໄດ້ເຂົ້າໄປໃນ ເຂດນ່ານຟ້າຂອງໂປແລນ ແລະໂຣມາເນຍ. ສິ່ງນີ້ຈະປົກປ້ອງຊາຍແດນຂອງ ໂປແລນ ແລະໂຣມາເນຍ ແລະຈະສ້າງເຂດທີ່ປອດໄພໃນພາກຕາເວັນຕົກ ແລະພາກໃຕ້ຂອງຢູເຄຣນ".

ການຮ້ອງຂໍດັ່ງກ່າວໄດ້ສະທ້ອນໃຫ້ເຫັນໂດຍເຈົ້າຫນ້າທີ່ພົນລະເຮືອນ ແລະ ທະຫານຂອງຢູເຄຣນຫຼາຍຄົນ ທີ່ໄດ້ໂອ້ລົມກັບອົງ​ການ​ຂ່າວ AFP ໃນ ກີິຢິບ ໃນລະຫວ່າງການເດີນທາງທີ່ຈັດ​ຂຶ້ນໃນອາທິດທີ່ຜ່ານມາໂດຍສະຖາບັນພົວພັນ ສາກົນຂອງຝຣັ່ງ ຫຼື IFRI ແລະສູນນັກວາງແຜນທ້ອງຖິ່ນ New Europe Center.

ອ່ານຂ່າວນີ້ເປັນພາສາອັງກິດ:

ຟໍຣັມສະແດງຄວາມຄິດເຫັນ

ສົດ ລາຍການວິທະຍຸ-ໂທລະພາບ ພາກພາສາລາວ

XS
SM
MD
LG