ຄູເວດ ຮ່ວມສົມທົບກັບບັນດາປະເທດພັນທະມິດອຶ່ນໆຂອງຊາ
ອຸດີ ໃນການເອົາບາດກ້າວທາງການທູດ ຕໍ່ອີຣ່ານ ຫລັງຈາກ
ພວກປະທ້ວງທີ່ໂກດແຄ້ນກ່ຽວກັບການປະຫານຊີວິດນັກສອນ
ສາສະໜາ Shi’ite ທີ່ມີຊື່ສຽງຄົນນຶ່ງ ຂອງຊາອຸດີ ອາຣາເບຍ
ໂດຍພາກັນບຸກເຂົ້າໄປ ໃນສະຖານທູດ ຂອງຊາອຸດີ ຢູ່ໃນນະ
ຄອນຫລວງອີຣ່ານ.
ອົງການຂ່າວ KUNA ຂອງທາງການຄູເວດ ກ່າວໃນວັນອັງຄານ
ມື້ນີ້ວ່າ ຄູເວດ ໄດ້ຮ້ອງເອກອັກຄະລັດຖະທູດ ກັບຄືນຈາກນະ
ຄອນເຕຫະຣ່ານແລະກ່າວຢ້ຳເຖິງ ການໃຫ້ຄວາມສະໜັນສະ
ໜູນແກ່ທຸກມາດຕະການທີ່ຊາອຸດີໄດ້ເຮັດໄປເພື່ອຮັກສາຄວາມ
ປອດໄພຂອງຕົນ.
ການເຄື່ອນໄຫວດັ່ງກ່າວໄດ້ມີຂຶ້ນຫລັງຈາກການຕັດສິນໃຈ ໂດຍຊາອຸດີ ອາຣາເບຍ
ບາເຣນ ແລະຊູດານ ໄດ້ຕັດຄວາມສຳພັນທາງການທູດກັບອີຣ່ານ ໃນຂະນະທີ່ ສະຫະ
ລັດອາຣັບເອເມີເຣັສ ໄດ້ຫລຸດລະດັບຄວາມສຳພັນກັບປະເທດດັ່ງກ່າວ. ທັງສີີ່ປະເທດ
ເປັນສະມາຊິກຂອງສັນນິບາດອາຣັບ ຊຶ່ງມີກຳນົດຈະຈັດກອງປະຊຸມພິເສດຂຶ້ນ ໃນວັນ
ອາທິດຈະມາເຖິງນີ້ ເພື່ອສົນທະນາຫາລືກ່ຽວກັບການເຄື່ອນໄຫວ ລະຫວ່າງຊາອຸດີ
ແລະ ອີຣ່ານ.
ປະທານາທິບໍດີອີຣ່ານ ທ່ານ Hassan Rouhani ໄດ້ຕິຕຽນການຕັດສິນໃຈຂອງຊາອຸດີ
ອາຣາເບຍ ທີ່ຕັດຄວາມສຳພັນ ໂດຍກ່າວວ່າ ນັ້ນບໍ່ສາມາດທີ່ຈະປົກປິດ “ການກະທຳຜິດ”
ຂອງຕົນ ໃນການປະຫານຊີວິດ Sheikh Nimr al-Nimr. ລັດຖະບານຊາອຸດີ ໄດ້ປະກາດ
ກ່ຽວກັບການປະຫານຊີວິດ Sheikh Nimr ໃນວັນທີ 2 ມັງກອນຜ່ານມາ ພ້ອມດ້ວຍນັກ
ໂທດອື່ນໆອີກ 46 ຄົນທີ່ພົວພັນກັບການກໍ່ການຮ້າຍ. Sheikh Nimr ເປັນຜູ້ກ້າຕິຕຽນ
ກະສັດຊາອຸດີ.
ສະພາຄວາມໝັ້ນຄົງ ສະຫະປະຊາຊາດ ໄດ້ອອກຖະແຫລງການໃນວັນຈັນວານນີ້
ປະນາມການໂຈມຕີສະຖານທູດຊາອຸດີ ແລະໄດ້ຮຽກຮ້ອງໃຫ້ອີຣ່ານນັບຖືພັນທະສາກົນ
ຂອງຕົນ ໃນການປ້ອງກັນຊັບສົມບັດການທູດ ແລະຮຽກຮ້ອງໃຫ້ທຸກພັກຝ່າຍຈົ່ງສືບຕໍ່ “
ສົນທະນາຫາລືກັນ ແລະເອົາບາດກ້າວເພື່ອຫລຸດຜ່ອນຄວາມເຄັ່ງຕຶງຢູ່ໃນຂົງເຂດ.”
