ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ຊາວເຄີດ ພາກັນສະຫຼອງ ໄຊຊະນະ ທີ່ເຂົ້າຍຶດເອົາ ເມືອງ Kobani ຄືນມາໄດ້


ຊາວເຄີດພາກັນສະຫລອງໄຊຊະນະ ຈາກການເຂົ້າຍຶດເອົາ ເມືອງ Kobnai ຄືນມາໄດ້.
ຊາວເຄີດພາກັນສະຫລອງໄຊຊະນະ ຈາກການເຂົ້າຍຶດເອົາ ເມືອງ Kobnai ຄືນມາໄດ້.

ພວກ​ນັກ​ລົບ​ຊາວເຄີ​ດ ​ໄດ້​ຂະຫຍາ​ຍການ​ບຸກ​ໂຈມ​ຕີ​ຂອງ​ເຂົາ​
ເຈົ້າ​ໃນ​ວັນ​ອັງຄານ​ວານ​ນີ້ ຕໍ່​ທີ່​ໝັ້ນກຸ່ມລັດອິສລາມໃກ້​ກັບ
​ເມື​ອງ Kobani ນຶ່ງ​ມື້​ຫລັງ​ຈາກກ່າວອ້າງ ວ່າ ​ຕົນເຂົ້າ​ຍຶດ​ເອົາ​
ເມືອງ​ທີ່​ມີ​ການ​ສູ້​ລົບ​ກັນ ຢູ່ໃນ​ຊາຍ​ແດນ​ຂອງ​ຊີ​ເຣຍ ໃກ້ກັບ​
ເທິ​ກີນັ້ນ ຄືນໄດ້ແລ້ວ.

ພວກຊາວ​ເຄີ​ດກ່າວ​ວ່າ ​ເຂົາ​ເຈົ້າ​ໄດ້​ເຂົ້າຄວບຄຸມ​ບ້ານ ທີ່​ຢູ່
​ໃກ້ໆເມືອງ Qarag Hlanj ຊຶ່ງການ​ອ້າງ​ດັ່ງກ່າວ ໄດ້ຮັບ​ຢືນ
ຢັນ​ໂດຍກຸ່ມສິ້ງຊອມສິດທິມະນຸດໃນຊີ ເຣຍທີ່ມີຫ້ອງການ
ຢູ່ອັງກິດ. ການ​ສູ້​ລົບ​ຂອງ​ຊາວ​ເຄີ​ດ ກັບ​ພວກ​ນັກລົບກຸ່ມ
ລັດ ອິສລາມເພີ້ມທະວີຄວາມຮ້າຍ​ແຮງ​ຂຶ້ນຄືກັນ ຢູ່​ທີ່ບ້ານ
Shiran​.

ບັນດາ​ເຈົ້າ​ໜ້າ​ທີ່ສະຫະລັດ ​ໃຫ້ການອະທິບາຍຕໍ່ການກ່າວອ້າງຂອງຊາວເຄີດ ກ່ຽວກັບ
ເມືອງ Kobani ​ໂດຍ​ເວົ້າ​ວ່າ ຊາວ​ເຄີ​ດ​ໄດ້​ຄວບ​ຄຸມ​ປະ​ມານ 90 ​ເປີ​ເຊັນ​ຂອງ​ເມືອງດັ່ງກ່າວ
ຫລັງ​ຈາກ​ໄດ້ສູ້ລົບກັນ​ຢ່າງ​ຮ້າຍ​ແຮງມາເປັນເວລາ 4 ເດືອນ. ສ່ວນ​ໃຫຍ່​ຂອງເມືອງຊຶ່ງຄັ້ງ
​ນຶ່ງມີ​ພົນລະ​ເມືອງ​ເຖິງ 200,000 ຄົນນັ້ນ​ໄດ້ຖືກເພພັງຈາກ​ການ​ສູ້​ລົບ.

​ເຈົ້າ​ໜ້າ​ທີ່​ຂັ້ນ​ສູງ ກະຊວງ​ຕ່າງປະ​ເທດ​ຄົນ​ນຶ່ງ ​ໄດ້​ກ່າວ​ຕໍ່​ບັນດາ​ນັກ​ຂ່າວ​ ທີ່​ນະຄອນຫລວງ
ວໍຊິງ​ຕັນວ່າ ກຸ່ມລັດ​ອິສລາມ “​ພວກເຂົາໄດ້​ຮັບຄຳສັ່ງ ຫລື​ວ່າແຕກ ຖັນແຖວກັນແທ້ໄດ້​ເລີ້ມ​
ຖອນກຳລັງ” ອອກໄປຈາກ​ເມືອງ Kobani ແລ້ວ.

​ເຈົ້າ​ໜ້າ​ທີ່​ຄົນດັ່ງກ່າວ ກ່າວ​ເພີ້​ມ​ເຕີມ​ວ່າ ​ເຖິງ​ຢ່າງ​ໃດ​ກໍ​ດີ ມັນ​ຍັງ​ໄວ​ເກີ​ນ​ໄປ​ທີ່​ຈະປະກາດ
ວ່າ “ການ​ປະຕິບັດ​ງານ​ເປັນ​ຜົນສຳ​ເລັດ.”

ຊາວເມືອງ Kobani ຈຳນວນ​ນ້ອຍໆຈຸນຶ່ງ ​ໄດ້ພາກັນ​ສະຫລອງ​ໄຊຊະນະ ຊຶ່ງຫລາຍ​ພັນ
​ຄົນ​ໄດ້​ພາກັນ​ຫລົບໜີ​ໄປ​ຢູ່​ສູນ​ອົບ​ພະ​ຍົບ​ໃນ​ເທີ​ກີ ​ໄດ້​ເລີ້ມພາກັນ​ກັບ​ຄືນ​ເຂົ້າ​ໄປສູ່​ເມືອງ
ໃນ​ວັນ​ອັງຄານ​ວານ​ນີ້. ພວກ​ນັກ​ລົບຊາວ​ເຄີ​ດ​ໄດ້​ຊັກ​ທຸງຊາດ ເຂົາ​ເຈົ້າຂຶ້ນ ​ແລະ​ວາງ​ທ່າ​
ຖ່າຍຮູບ​ຢູ່​ຕາມ​ຖະໜົນ​ທີ່​ຫັກ​ພັງ. ​ແຕ່ເຈົ້າ​ໜ້າ​ທີ່​ຄົນ​ນຶ່ງ ຮຽກຮ້ອງ ​ໃຫ້ພວກ​ຊາວ​ເມືອງ
Kobani ພາກັນ​ລໍຖ້າອີກ​ລະຍະ​ນຶ່ງກ່ອນ ​ເພາະ ວ່າ​ ເມືອງດັ່ງກ່າວຍັງບໍ່ມີ​ອາຫານ ນໍ້າ ​
ໄຟຟ້າ ຫລື​ຢາ​ປົວ​ພະຍາດເທື່ອ.

ກຳລັງ​ຮັກສາ​ຄວາມ​ປອດ​ໄພ​ເທິ​ກີ ​ໄດ້​ຍິງລະເບີດນໍ້າ​ຕາ​ເຂົ້າໃສ່ ​ເພື່ອ​ປ້ອງ​ກັນບໍ່ໃຫ້ຊາ​ວ​
ເຄີ​ດ ປະມານ 1,000 ຄົນ​ຂ້າມ​ຊາຍ​ແດນ​ເຂົ້າ​ໄປ​ສົມທົບ​ການ​ສະຫຼອງ ທີ່​ເມື​ອງ Kobani.

KOBANI-
please wait
Embed

No media source currently available

0:00 0:01:34 0:00

XS
SM
MD
LG