ເກົາຫລີໃຕ້ເວົ້າວ່າ ຕົນຈະທໍາການຊ້ອມລົບເທື່ອໃໝ່ໂດຍໃຊ້ລູກກະສູນແທ້ ຢູ່ເທິງເກາະດອນແຫ່ງນຶ່ງ ໃກ້ຊາຍຝັ່ງທະເລຂອງເກົາຫລີເໜືອ ຊຶ່ງເປັນການລື້ມຄືນການກະທໍາທີ່ໄດ້ກໍ່ໃຫ້ເກົາຫລີເໜືອທຳການໂຈມຕີດ້ວຍການຍິງປືນໃຫຍ່ ໃສ່ເກາະນຶ່ງຂອງເກົາຫລີໃຕ້ຢ່າງໜັກ ໃນເດືອນແລ້ວນັ້ນ.
ພວກເຈົ້າໜ້າທີ່ທະຫານຖະແຫລງໃນວັນພະຫັດມື້ນີ້ວ່າ ການຊ້ອມລົບຈະເລີ້ມຕົ້ນຂຶ້ນໃນວັນເສົານີ້ ຢ່າງໄວທີ່ສຸດ ຖ້າຫາກດິນຟ້າອາກາດເອື້ອອຳນວຍ. ຄຳປະກາດນີ້ໄດ້ມີຂື້ນທ່າມກາງການລິເລີ້ມທາງການທູດຫລາຍໆບັ້ນ ແນໃສ່ຜ່ອນຄາຍຄວາມເຄັ່ງຕຶງລະຫວ່າງສອງເກົາຫລີ ລວມທັງການຢ້ຽມຢາມນະຄອນຫລວງພຽງຢາງໂດຍນັກການເມືອງສະຫະລັດ ທ່ານ Bill Richardson.
ທະຫານສອງຄົນ ແລະ ພົນລະເຮືອນສອງຄົນ ເສຍຊີວິດໃນຕອນທີ່ເກົາຫລີເໜືອ ລະດົມຍິງໃສ່ເກາະ Yeonpyeong ໃນວັນທີ 23 ພະຈິກ ທີ່ເປັນການຕອບໂຕ້ຕໍ່ການທີ່ເກົາຫລີໃຕ້ທໍາການຊ້ອມລົບຍິງປືນໃຫຍ່ຢູ່ເກາະດັ່ງກ່າວ. ໃນການຊ້ອມລົບຕອນນັ້ນ ເກົາຫລີໃຕ້ບໍ່ໄດ້ແນປືນໃຫຍ່ໄປຍັງທິດທາງທີ່ເປັນແຜ່ນດິນໃຫຍ່ຂອງເກົາຫລີເໜືອ ແຕ່ໄດ້ຍິງໃສ່ເຂດນ່ານນ້ຳ ທີ່ທັງສອງເກົາຫລີ ຕ່າງກໍອ້າງເອົາກຳມະສິດນັ້ນ.
ພວກເຈົ້າໜ້າທີ່ກ່າວຕໍ່ກອງປະຊຸມຖະແຫລງຂ່າວ ທີ່ກະຊວງປ້ອງກັນປະເທດວ່າ ການຊ້ອມລົບຄັ້ງໃໝ່ນີ້ຈະມີຂຶ້ນເວລາໃດເວລານຶ່ງ ໃນລະຫວ່າງວັນເສົາຫາວັນອັງຄານທີ່ຈະມາເຖິງນີ້ ແລະຈະຕິດຕາມມາລຸນຫລັງການຊ້ອມລົບຍິງປືນໃຫຍ່ໂດຍໃຊ້ກະສູນແທ້ ຢູ່ອ້ອມແອ້ມຊາຍຝັ່ງທະເລຂອງເກົາຫລີໃຕ້ ທີ່ດຳເນີນໄປເປັນເວລາ 2 ອາທິດ ແລະຈະສິ້ນສຸດລົງໃນວັນສຸກມື້ອື່ນນີ້.
