ເກົາຫຼີໃຕ້ກ່າວວ່າ ຕົນຈະເປີດ ການເຈລະຈາທາງທະຫານ ກັບເກົາຫຼີເໜືອໃນສັບປະດານີ້ ຊຶ່ງເປັນການເຈລະຈາເທື່ອທຳ ອິດ ໃນທຳນອງນີ້ ໃນຮອບ ເກືອບ 2 ປີ.
ກະຊວງປ້ອງກັນປະເທດເກົາຫຼີໃຕ້ກ່າວວ່າ ການເຈລະຈາຫາລືດັ່ງກ່າວຈະມີຂຶ້ນໃນວັນພະຫັດ ມື້ອື່ນ ຢູ່ບ້ານສະຫງົບເສິກ ປັນມຸນຈອມ ຊຶ່ງຕັ້ງຢູ່ໃນເຂດປອດທະຫານ ທີ່ແບ່ງຄອມມູນິສ ເກົາຫຼີເໜືອ ອອກຈາກປະຊາທິປະໄຕເກົາຫຼີໃຕ້.
ພຽງຢາງໄດ້ສະເໜີໃຫ້ເປີດການເຈລະຈາ ໃນຕົ້ນເດືອນນີ້. ອຳນາດການປົກຄອງເກົາຫຼີເໜືອ ຢາກສົນທະນາຫາລື ກ່ຽວກັບບັນຫາຂັດແຍ້ງຊາຍແດນທາງທະເລ ຢູ່ນອກບໍລິເວນແຄມຝັ່ງ ທາງກໍ້າຕາເວັນຕົກຂອງແຫຼມເກົາຫຼີ ແລະເລື່ອງໃບປິວຕໍ່ຕ້ານເກົາຫຼີເໜືອ ທີ່ມີການສົ່ງຂ້າມ ຊາຍແດນ ເຂົ້າໄປໃນເກົາຫຼີເໜືອ ໂດຍພວກນັກເຄື່ອນໄຫວ ຊາວເກົາຫຼີໃຕ້ນັ້ນ.
ຄວາມເຄັ່ງຕຶງ ລະຫວ່າງເກົາຫຼີເໜືອ ແລະເກົາຫຼີໃຕ້ ໄດ້ເພີ້ມທະວີຂຶ້ນ ຫຼັງຈາກກຳປັ່ນລົບ ຂອງເກົາຫຼີໃຕ້ລໍານຶ່ງ ໄດ້ຫຼົ້ມຫຼືຈົມນໍ້າ ເຮັດໃຫ້ທະຫານເຮືອ ເກົາຫຼີໃຕ້ 46 ຄົນເສຍຊີວິດ ໃນເດືອນມີນາຜ່ານມາ. ເກົາຫຼີໃຕ້ ໄດ້ຖິ້ມໂທດໃສ່ເກົາຫຼີເໜືອວ່າເປັນຜູ້ຮັບຜິດຊອບຕໍ່ເຫດ ຮ້າຍດັ່ງກ່າວ ແຕ່ພຽງຢາງໄດ້ປະຕິເສດ ຕໍ່ຂໍ້ຫານີ້.
ເກົາຫຼີເໜືອ ໄດ້ເລີ້ມທໍາການສະເໜີຫຼາຍໆຢ່າງຕໍ່ເກົາຫຼີໃຕ້ ໃນໄລຍະສອງສາມອາທິດຜ່ານ ມານີ້ ໃນຄວາມພະຍາຍາມ ເພື່ອລົດຜ່ອນຄວາມເຄັ່ງຕຶງລົງ.
