ເຈົ້າໜ້າທີ່ ອະວຸໂສ ທ່ານນຶ່ງ ຂອງສະຫະລັດ ກຳລັງຢ້ຽມ ຢາມເກົາຫຼີໃຕ້ ເພື່ອປຶກສາຫາລື ກ່ຽວກັບ ການດຳເນີນ ຄວາມພະຍາຍາມ ເທື່ອລ່າສຸດ ໃນການທີ່ ຈະລົງໂທດ ເກົາຫຼີເໜືອ ຍ້ອນໄດ້ຈົມ ກຳປັ່ນລົບ ເກົາຫຼີໃຕ້.
ລັດຖະມົນຕີ ຊ່ອຍວ່າການ ກະຊວງການ ຕ່າງປະເທດ ຂອງສະຫະລັດ ທ່ານ KURT CAMPBELL ໄດ້ພົບປະ ກັບລັດຖະມົນຕີ ການຕ່າງປະເທດ YU MYUNG HWAN ແລະເຈົ້າໜ້າທີ່ ອື່ນໆອີກ ຂອງເກົາຫຼີໃຕ້ ທີ່ກຸງໂຊລ ໃນວັນພະຫັດມື້ນີ້ ເພື່ອປະສານ ຄວາມພະຍາຍາມ ໃນການຫາທາງ ໃຫ້ສະພາ ຄວາມໝັ້ນຄົງ ອົງການສະຫະປະຊາຊາດ ປະນາມເກົາຫຼີເໜືອ ທີ່ໄດ້ຈົມ ກຳປັ່ນລົບ CHEONAN ຂອງເກົາຫຼີໃຕ້ ເມື່ອວັນ ທີ 26 ມີນາຜ່ານມາ.
ຄະນະສືບສວນ ຂອງນາໆຊາດ ສະຫລຸບວ່າ ເຮືອດຳນໍ້າ ຂອງເກົາຫຼີເໜືອ ເປັນຜູ້ຍິງ ລະເບີດຕໍປີໂດ ໂຈມຕີ ກຳປັ່ນລົບ ເກົາຫຼີໃຕ້.
ທ່ານ CAMPBELL ກ່າວຕໍ່ ພວກນັກຂ່າວວ່າ ສະຫະລັດ ແມ່ນມຸ່ງໝັ້ນ ທີ່ຈະສະແດງ ໃຫ້ເຫັນວ່າ ການເປັນພັນທະມິດ ຂອງຕົນ ກັບເກົາຫຼີໃຕ້ ແມ່ນຍັງ ແໜ້ນໜຽວ ໃນໄລຍະ ທີ່ຫລໍ່ແຫຼມນີ້.
