ເກົາຫລີໃຕ້ຍັງເປີດປະຕູ ສໍາລັບການເຈລະຈາ ກັບເກົາຫລີເໜືອ

ປະທານາທິບໍດີ​ເກົາຫລີ​ໃຕ້​ກ່າວ​ວ່າ ປະຕູ​ຍັງ​ເປີດ​ໄວ້​ຢູ່​ສໍາລັບ​ການ​ໂອ້​ລົມ​ສົນທະນາ​ກັນກັບ​
ກຸງ​ພຽງ​ຢ້າງ ​ແມ່ນ​ແຕ່ໃນ​ຂະນະ​ທີ່ທ່ານ​ໃຫ້​ຄໍາ​ໝັ້ນ​ສັນຍາ​ກ່ຽວ​ກັບ​ຍຸດ​ທະ​ສາດແບບໃໝ່​ໃນ​ການປ້ອງ​ກັນ​ ​ເພື່ອ​ສະ​ແດງ​ໃຫ້​ເກົາຫລີ​ເໜືອ​ເຫັນ​ວ່າ ທາງ​ເກົາຫລີເໜືອ​ຈະຫວັງ​ສິ່ງ​ໃດ​ບໍ່​ໄດ້ ​ຈາກ​ການສ່ຽງ​ໄພ​ທາງ​ດ້ານ​ທະຫານ​ນັ້ນ.

ນອກ​ນີ້ ປະທານາທິບໍດີ​ຫລີ​ມິ​ອຸງພັກ ຍັງ​ໄດ້​ກ່າວໃນ​ຄໍາ​ປາ​ໄສ​ປີ​ໃໝ່ຂອງ​ທ່ານ​ໃນ​ວັນ​ຈັນ​ມື້​ນີ້ວ່າ ຖ້າ​ຝ່າຍ​ເກົາຫລີ​ເໜືອ​ສະ​ແດງໃຫ້​ເຫັນຄວາມ​ຈິງ​ໃຈ​ ທາງ​ຝ່າຍ​ເກົາຫລີ​ໃຕ້​ກໍ​ຕຽມ​ພ້ອມ​ທີ່ຈະ​ຍົກ​ລະດັບການ​ຮ່ວມ​ມື​ໃນ​ດ້ານ​ເສດຖະກິດ​ຂຶ້ນຢ່າງຫລວງຫລາຍ​ກັບ​ກຸງ​ພຽງ​ຢ້າງ​.

ໃນ​ເວລາ​ດຽວ​ກັນ ທ່ານ​ຫລີ ກ່າວ​ວ່າ ​ເກົາຫລີ​ໃຕ້​ຕ້ອງເສີມ​ສ້າງ​ການ​ປ້ອງ​ກັນ​ຂອງຕົນ​ຂຶ້ນ ​ກໍ​ເພື່ອ​ບໍ່​ໃຫ້ ​ເກົາ​ຫລີ​ເໜືອ​ແມ່ນ​ແຕ່ຈະ​ບໍ່​ຄຶດ​ພິຈາລະນາ​ທໍາການ​ໂຈມ​ຕີ​ອີກຄັ້ງ​ໃໝ່​ ຄື​ກັນກັບ​ທີ່ ໄດ້ລະດົມຍິງ​ປືນ​ໃຫຍ່​ໃສ່​ເກາະ Yeonpyeong ​ໃນ​ວັນ​ທີ 23 ພະຈິກ​ຜ່ານມາ​ ຊຶ່ງ​ໄດ້​ເອົາ​ຊີວິດ​ຊາວ​ເກົາຫລີ​ໃຕ້​ໄປ 4 ຄົນ​ນັ້ນ.

ຄໍາ​ປາ​ໄສ​ຂອງ​ທ່ານ​ຫລີ ມີ​ຂຶ້ນ​ໃນ​ເວລາ 2 ມື້​ ຫລັງ​ຈາກ​ສື່​ມວນ​ຊົນ​ເກົາຫລີ​ເໜືອ ພິມ​ເຜີ​ຍແຜ່​ບົດ​ບັນນາທິການ​ສະບັບ​ນຶ່ງ​ທີ່ກ່າວ​ວ່າ ຄວາມ​ເຄັ່ງ​ຕຶງ​ໃນ​ແຫລມ​ເກົາ ຫລີ​ຄວນ​ຈະ​ຖືກ ຜ່ອນ​ຄາຍລົງໃນ​ເວລາ​ອັນ​ໄວ​ເທົ່າ​ທີ່​ເປັນ​ໄປ​ໄດ້. ບົດ​ບັນນາທິ ການ​ສະບັບນີ້​ຍັງ​ຮຽກຮ້ອງ​ໃຫ້​ມີ​ການ​ປຸກ​ລະ​ດົມຢ່າງ​ຕັ້ງໜ້າຫລາຍ​ຂຶ້ນ ​ເພື່ອ​ປັບ ປຸງ​ຄວາມ​ສໍາພັນ​ລະຫວ່າງ​ສອງ​ເກົາຫລີ​ໃຫ້​ດີ​ຂຶ້ນ​ນັ້ນ.

ໃນ​ວັນ​ອັງຄານ​ມື້​ອື່ນ​ນີ້ ທ່ານ Stephen Bosworth ທູດ​ພິ​ເສດ​ສະຫະລັດ​ຈະເດີນທາງ​ໄປ
ຮອດ​ກຸງ​ໂຊລ ​ເພື່ອ​ທໍາ​ການ​ໂອ້​ລົມ​ສົນທະນາ​ກັນ​ເລື້ອງ​ການ​ເອົາ ບາດກ້າວ​ຂັ້ນ​ຕໍ່​ໄປ ​ກ່ຽວ​ກັບ​ວິ​ກິດ​ການ​ເກົາຫລີ​ນີ້. ກະຊວງ​ການ​ຕ່າງປະ​ເທດ​ສະຫະລັດ ກ່າວ​ວ່າ ທ່ານ Bosworth ຈະ​ທໍາ​ການ​ຢ້ຽມ​ຢາມ​ຈີນ ​ແລະ​ຍີ່ປຸ່ນ​ເຊ່ນ ກັນ ຊຶ່ງ​ກະ​ຕຸ້ນ​ໃຫ້​ມີ​ການ​ຄາດຄະ​ເນ​ກັນ​ວ່າ ທ່ານ​ຈະ​ທໍາ​ການ​ໂອ້​ລົມ​ເລື້ອງ​ຊ່ອງ​ທາງໃນ​ການ​ຮື້​ຟື້ນ​ການ​ເຈລະຈາ​ 6 ຝ່າຍ​ຄືນ​ ກ່ຽວ​ກັບ​ໂຄງການ​ນີວເຄລຍຂອງ​ເກົາຫລີ​ເໜືອ​ນັ້ນ.