ຫລັງຈາກໄດ້ໂຈະການຊ້ອມລົບຂອງຕົນໄວ້ໃນວັນເສົາວານນີ້
ເກົາຫລີໃຕ້ກ່າວວ່າ ແມ່ນຍ້ອນດິນຟ້າອາກາດບໍ່ດີ ແລະບໍ່
ແມ່ນຍ້ອນຄວາມກົດດັນທາງການທູດ ທີ່ໄດ້ຖ່ວງເວລາໃນ
ການຊ້ອມລົບຍິງປືນໃຫຍ່ຈາກເຂດເກາະແນວໜ້າ ທີ່ຖືກເກົາ ຫລີເໜືອຍິງປືນໃຫຍ່ ມາໃສ່ໃນເດືອນຜ່ານມານັ້ນ.
ຂະນະດຽວກັນ ຈີນກໍໄດ້ຮຽກໂຕເອກອັກຄະລັດຖະທູດຈາກ
ທັງສອງປະເທດເຂົ້າພົບໃນວັນເສົາວານນີ້ ເພື່ອສະແດງ
ເປັນຫ່ວງ ກ່ຽວກັບແຜນການຊ້ອມລົບຂອງເກົາຫລີໃຕ້ແລະ
ຄໍາປະຕິຍານຂອງເກົາຫລີເໜືອ ທີ່ຈະໂຈມຕີເກົາຫລີໃຕ້ຄືນ
ໜັກກວ່າເມື່ອເດືອນຜ່ານມາ ຖ້າຫາກເກົາຫລີໃຕ້ ຍັງຈະທໍາການຊ້ອມລົບຕໍ່ໄປຢູ່.
ທາງຝ່າຍຣັດເຊຍກໍໄດ້ຮຽກຮ້ອງໃຫ້ຈັດກອງປະຊຸມສຸກເສີນ ຂອງສະພາຄວາມໝັ້ນຄົງອົງ
ການສະຫະປະຊາຊາດ ຊຶ່ງຈະເລີ່ມໄຂຂື້ນໃນວັນອາທິດມື້ນີ້. ທ່ານ Vitaly Churkin ເອກອັກຄະລັດຖະທູດຣັດເຊຍປະຈໍາອົງການສະຫະປະຊາຊາດກ່າວວ່າ ສະພາຄວາມໝັ້ນຄົງ
ແມ່ນຈະຕ້ອງສົ່ງສັນຍານ ໃຫ້ຍັບຍັ້ງຊັ່ງໃຈ ໄປຍັງທັງສອງເກົາຫລີ ແລະຊ່ວຍເປີດໃຫ້ມີການ
ເຄື່ອນໄຫວທາງດ້ານການທູດກ່ຽວກັບເລື້ອງນີ້ ແລະຣັດເຊຍໄດ້ສະແດງຄວາມເປັນຫ່ວງຢ່າງ
ໜັກ ກ່ຽວກັບແຜນການຊ້ອມລົບ ໃຊ້ລູກປືນແທ້ ທີ່ເກົາຫລີໃຕ້ວາງແຜນໄວ້ນັ້ນ.
