ເກົາຫຼີເໜືອໄດ້ທຳການຮຽກຮ້ອງຂໍເປີດການເຈລະຈາແບບບໍ່ມີເງື່ອນໄຂກັບເກົາຫຼີໃຕ້ຄືນອີກ
ແລະສະເໜີໃຫ້ຈັດການໂອ້ລົມດັ່ງກ່າວຂຶ້ນພາຍໃນທ້າຍເດືອນນີ້ ຫລືໃນຕົ້ນເດືອນກຸມພາທີ່
ຈະມາເຖິງນີ້.
ຢູ່ໃນຖະແຫລງການທີ່ພິມເຜີຍແຜ່ໂດຍອົງການຂ່າວ KCNA ຂອງທາງການເກົາຫຼີເໜືອໃນ
ວັນເສົາມື້ນີ້ ເກົາຫຼີເໜືອຍັງເວົ້າອີກວ່າຕົນຈະເປີດຫ້ອງການ ການຮ່ວມມືທາງເສດຖະກິດ
ລະຫວ່າງສອງເກົາຫລີ ຢູ່ເຂດອຸດສະຫະກຳ Kaesong ທີ່ໄດ້ຖືກປິດລົງໃນໄລຍະທີ່ມີ
ຄວາມເຄັ່ງຕຶງຢ່າງແຮງໃນປີກາຍນີ້ນັ້ນຄືນອີກ.
ຖະແຫລງການຂອງຄະນະກໍາມະການວ່າດ້ວຍການທ້ອນໂຮມເກົາຫລີເຂົ້າກັນຢ່າງສັນຕິວິທີ
ຫລື Committee for the Peaceful Reunification of Korea ຂອງເກົາຫຼີເໜືອສະ
ບັບນີ້ໄດ້ກ່າວອີກວ່າ ເກົາຫຼີເໜືອສະເໜີຂໍເປີດການເຈລະຈາກັບເກົາຫຼີໃຕ້ໂດຍບໍ່ມີເງື່ອນໄຂ
ອັນໃດ ແລະວ່າເກົາຫຼີໃຕ້ບໍ່ຕ້ອງສົງໃສໃນຄວາມຕັ້ງໃຈ ຫລືເຈດຈຳນົງອັນແທ້ຈິງຂອງຕົນ.
ເກົາຫຼີເໜືອໄດ້ທຳການສະເໜີຄ້າຍຄືກັນໃນຕົ້ນອາທິດນີ້ ແຕ່ວ່າ ເກົາຫຼີໃຕ້ໄດ້ປະຕິເສດຕໍ່
ການສະເໜີດັ່ງກ່າວແລະເວົ້າວ່າເກົາຫຼີເໜືອບໍ່ໄດ້ “ຈິງຈັງ” ກ່ຽວກັບເລື່ອງນີ້.
ກະຊວງທ້ອນໂຮມຊາດຂອງເກົາຫຼີໃຕ້ ເວົ້າໃນວັນພະຫັດຜ່ານມານີ້ວ່າເກົາຫຼີເໜືອໄດ້ໃຊ້ຖ້ອຍ
ຄຳໃນທຳນອງດຽວກັນ ເພື່ອຈຸດປະສົງໃນການໂຄສະນາຊວນເຊື່ອໃນອະດີດຜ່ານມາ.
ໂຄສົກຍິງຄົນນຶ່ງກ່າວວ່າເກົາຫຼີເໜືອຄວນຈະປະຕິບັດຕາມຄຳໝັ້ນສັນຍາຂອງຕົນທີ່ເຄີຍໄດ້
ໃຫ້ໄວ້ໃນປີ 2005 ວ່າຈະກຳຈັດອາວຸດນິວເຄລຍນັ້ນ.
ບໍ່ໄດ້ມີການຈັດເຈລະຈາ 6 ຝ່າຍກັບເກົາລີເໜືອເລີຍນັບແຕ່ປີ 2009 ເປັນຕົ້ນມາ. ແຕ່ນັ້ນ
ມາເກົາຫຼີເໜືອກໍໄດ້ຍິງໂຈມຕີໃສ່ເກາະແຫ່ງນຶ່ງຂອງເກົາຫຼີໃຕ້, ໄດ້ເປີດເຜີຍສະຖານກັ່ນເຊື້ອ
ໄຟນີວເຄລຍທີ່ທັນສະໄໝ ແລະຍັງໄດ້ຖືກກ່າວຫາວ່າ ຍິງກໍ່າປັ່ນຂອງເກົາຫຼີໃຕ້ຫລົ້ມ ຊຶ່ງໄດ້
ເຮັດໃຫ້ລູກເຮືອ 46 ຄົນເສຍຊີວິດໄປ.
