ພວກນັກຊ່ຽວຊານນາໆຊາດກຸ່ມນຶ່ງ ເຕືອນວ່າ ບັນຫາຂັດ
ແຍ້ງກ່ຽວກັບເລື່ອງເຂດແດນທາງທະເລ ລະຫວ່າງເກົາຫຼີ
ເໜືອແລະເກົາຫຼີໃຕ້ ໃນຂະນະທີ່ປາກົດວ່າພຽງຢາງພວມ
ກະກຽມໃນການປ່ຽນຜູ້ນຳໃໝ່ນັ້ນ ແມ່ນລະເບີດຂຶ້ນໄດ້
ງ່າຍ ແລະເມື່ອຮວມກັນແລ້ວ ກໍອາດຂະຫຍາຍກາຍເປັນ ສົງຄາມໃຫຍ່ໄດ້.
ກຸ່ມວິກິດການນາໆຊາດ ໄດ້ນຳອອກເຜີຍແຜ່ລາຍງານ
ສະບັບນຶ່ງໃນວັນສຸກມື້ນີ້ ຮຽກຮ້ອງໃຫ້ກຸງພຽງຢາງແລະ
ກຸງໂຊລ ຮັບເອົາການໄກ່ເກ່ຍຂອງນາໆຊາດເພື່ອແກ້ໄຂ
ບັນຫາຂັດແຍ້ງດັ່ງກ່າວ.
ເກົາຫຼີເໜືອ ບໍ່ຮັບຮູ້ເສັ້ນກຳນົດເຂດແດນພາກເໜືອໃນທະເລເຫຼືອງຢູ່ນອກແຄມຝັ່ງທະເລ
ກໍ້າຕາເວັນຕົກຂອງແຫຼມເກົາຫຼີ. ເສັ້ນດັ່ງກ່າວນີ້ໄດ້ກຳນົດຂຶ້ນ ໂດຍກອງບັນຊາການສະຫະ
ປະຊາຊາດພາຍໃຕ້ການນຳພາຂອງສະຫະລັດໃນປີ 1953 ໃນຕອນທ້າຍຂອງສົງຄາມ
ເກົາຫຼີ.
ພວກນັກວິຊາການຂອງເກົາຫຼີໃຕ້ ຄາດການວ່າ ພຽງຢາງໄດ້ເພີ່ມທະວີຄວາມເຄັ່ງຕຶງຂຶ້ນ
ເພື່ອເສີມຂະຫຍາຍພາບພົດຂອງທ້າວກິມຈົງອຸນ ລູກຊາຍຂອງທ່ານກິມຈົງອິລຜູ້ນຳຂອງ
ເກົາຫຼີເໜືອ ທີ່ຈະແຈ້ງວ່າເປັນທາຍາດທາງການເມືອງນັ້ນ.
