ກອງທັບເກົາຫລີເໜືອເຕືອນໃນວັນອາທິດມື້ນີ້ວ່າ ຕົນຈະທໍາການຕອບໂຕ້ ຖ້າຫາກການຊ້ອມລົບຂອງເກົາຫລີໃຕ້ທີ່ຈະມີຂຶ້ນໃນຕໍ່ໜ້ານີ້ ລະເມີດເຂດນໍ້າແດນດິນຂອງເກົາຫລີເໜືອ.
ຄໍາປະກາດຂອງອົງການຂ່າວທາງການເກົາຫລີເໜືອໄດ້ເຕືອນພວກປະຊາຊົນໃນເກາະ
5 ແຫ່ງ ໃກ້ໆກັບຊາຍແດນທາງທະເລທີ່ເປັນຈຸດຜິດຖຽງກັນໃນທະເລເຫຼືອງນັ້ນ ໃຫ້ອົບ
ພະຍົບໜີອອກໄປກ່ອນເວລາ 9 ໂມງເຊົ້າ ວັນຈັນມື້ອື່ນ. ຜູ້ປະກາດຂ່າວທາງວິທະຍຸຈາກຸງ
ພຽງຢ້າງເວົ້າວ່າ ຈະມີການໂຈມຕີຕອບໂຕ້ໂດຍທັນທີແລະຢ່າງບໍ່ມີຄວາມເມດຕາ ເຖິງ
ແມ່ນມີລູກປືນຕົກໃສ່ນໍ້າຂອງເກົາຫລີເໜືອແມ່ນແຕ່ລູກດຽວກໍຕາມ ໃນລະຫວ່າງການ
ຊ້ອມລົບນັ້ນ.
ເກົາຫລີໃຕ້ໄດ້ທໍາການຊ້ອມຍິງປືນໃຫຍ່ຂອງຕົນມາເປັນປະຈໍາ ຈາກ 5 ເກາະແນວໜ້າ
ໃກ້ໆກັບຊາຍແດນທີ່ເປັນບັນຫາຂັດແຍ້ງກັນນອກຝ່ັງ ທະເລໃນພາກຕາເວັນຕົກຂອງ
ແຫລມເກົາຫລີ. ການຊ້ອມລົບທີ່ວ່ານີ້ໄດ້ກະຕຸ້ນໃຫ້ເກົາຫລີເໜືອຍິງປືນໃຫຍ່ໃສ່ຂົງເຂດ
ດັ່ງກ່າວໃນເດືອນພະຈິກປີ 2010 ຊຶ່ງໄດ້ເອົາຊີວິດຊາວເກົາຫລີໃຕ້ໄປ 4 ຄົນໃນເກາະ
Yeonpyeong ນັ້ນ.
ອົງການຂ່າວ Yonhap ເຄິ່ງທາງການຂອງກຸງໂຊນ ໄດ້ອ້າງເຖິງເຈົ້າໜ້າທີ່ທ່ານນຶ່ງທີ່ບໍ່
ບອກຊື່ໃຫ້ຮູ້ຂອງຄະນະຫົວໜ້າເສນາທິການຮ່ວມໂດຍກ່າວວ່າ ເກົາຫລີໃຕ້ແລະສະຫະ
ລັດຈະດໍາເນີນການຊ້ອມລົບດ້ວຍລູກປືນແທ້ຕໍ່ຕ້ານເຮືອດໍານໍ້າໃນວັນຈັນມື້ອື່ນນີ້ ເຖິງ
ແມ່ນມີການເຕືອນຈາກເກົາຫລີເໜືອກໍຕາມ.
ບັນດານັກວິເຄາະແລະພວກນາຍທະຫານສະຫະລັດທີ່ວີໂອເອຕິດຕໍ່ພົວພັນກ່າວວ່າການ
ແນະນໍາໃຫ້ອົບພະຍົບແມ່ນຜິດປົກກະຕິ ແຕ່ການຂົ່ມຂູ່ການຕອບໂຕ້ຕໍ່ການຊ້ອມລົບຂອງ
ກອງທັບເກົາຫລີໃຕ້ນັ້ນແມ່ນເປັນເລື້ອງທໍາມະດາແລະບໍ່ເປັນສາເຫດທີ່ພາໃຫ້ມີການແຕກ
ຕື່ນໃດໆ.
