ບັນດາເຈົ້າໜ້າທີ່ເກົາຫລີໃຕ້ກ່າວວ່າ ການເຈລະຈາທາງດ້ານ
ທະຫານກັບເກົາຫລີເໜືອກໍາລັງຄືບໜ້າຕໍ່ໄປພາຍໃຕ້ບັນຍາ
ກາດທີ່ເຄັ່ງຂຶມແລະບໍ່ມີການສະແດງທ່າທີທາງການເມືອງ
ພົວພັນນໍາ.
ພວກທະຫານໃນຂັ້ນພັນເອກຂອງສອງປະເທດໄດ້ພົບປະກັນເປັນເວລາເກືອບນຶ່ງຊົ່ວໂມງໃນເຊົ້າວັນອັງຄານມື້ນີ້ ແລະພົບປະກັນອີກຫລັງຈາກກິນເຂົ້າທ່ຽງແລ້ວ. ການພົບປະຫາລືກັນດັ່ງກ່າວ ນັບວ່າເປັນຄັ້ງທໍາອິດລະຫວ່າງສອງເກົາຫລີ ນັບແຕ່ເກົາຫລີເໜືອໄດ້ຍິງປືນໃຫຍ່ໂຈມຕີເກາະນ້ອຍແຫ່ງນຶ່ງຂອງເກົາຫລີໃຕ້ໃນເດືອນພະຈິກປີແລ້ວນີ້ ເປັນຕົ້ນມາ.
ກະຊວງການຕ່າງປະເທດເກົາຫລີໃຕ້ໄດ້ນຳອອກເຜີຍແຜ່ຮູບພາບການຈັບມືກັນຂອງພວກນາຍທະຫານ 2 ຝ່າຍ ກ່ອນການໂອ້ລົມສົນທະນາກັນເລີ້ມຂຶ້ນທີ່ບ້ານຊາຍແດນ Panmujom ນັ້ນ. ໂຄສົກທ່ານນຶ່ງກ່າວວ່າ ສອງຝ່າຍໄດ້ທໍາການສົນທະນາຫາລືກັນເລື້ອງລາຍການປະຊຸມແລະການດໍາເນີນຂັ້ນຕອນສໍາລັບການພົບປະກັນໃນລະດັບທີ່ສູງຂຶ້ນ ແລະວ່າບໍ່ໄດ້ມີການໂຕ້ແຍ້ງກັນໃດໆທາງດ້ານການເມືອງຈາກທັງສອງຝ່າຍນັ້ນ.
