ພວມມີການເຄື່ອນໄຫວ ທາງການທູດ ຢ່າງຂຸ້ນຂ້ຽວ ກ່ຽວກັບໂຄງການນິວເຄລຍ ຂອງເກົາຫລີເໜືອ

ການ​ດໍາ​ເນີນ​ຂັ້ນ​ຕອນ​ທາງ​ການ​ທູດ​ກ່ຽວ​ກັບ​ນີວ​ເຄລຍ​ໃນ​ເອ​ເຊຍ​ໄດ້ເພີ່ມ​ທະວີ​ຂຶ້ນ​ໃນ​ວັນ​ພຸດ​ມື້​ນີ້ 1 ມື້​ຫລັງ​ຈາກ​ອັນ​ທີ່​ມີ​ການບັນລະ​ຍາຍ​ກັນ ວ່າ​ເປັນ​ພົບ​ປະ​ເຈລະຈາ​ໃນ​ທາງ​ບວກ​ທີ່​ນະຄອນ​ເຈ​ເນ​ວາລະ​ຫວ່າງ​ພວກນັກ​ເຈລະຈາ​ສະຫະລັດ​ແລະ​ເກົາຫລີ​ເໜືອ​ນັ້ນ.

ຮອງ​ນາຍົກລັດຖະມົນຕີຈີນ ທ່ານ Li Keqiang ​ໄດ້​ພົບ​ປະກັນ​ກັບປະ ທາ​ນາ​ທິບໍດີ Lee Myung-bak ​ແຫ່ງ​ເກົາຫລີ​ໃຕ້​ ທີ່​ກຸງ​ໂຊນ ຫລັງ​ຈາກ​ເສັດ​ສິ້ນ​ການ​ໂອ້​ລົມ​ສົນທະນາ​ກັນ​ກັບ​ທ່ານ ກິມຈົງ​ອີລ ຜູ້​ນໍາ​ເກົາຫລີ​ເໜືອ​ທີ່​ກຸງ​ພຽງ​ຢ້າງ​ນັ້ນ ​ແລະ​ຫົວໜ້າທູດ​ພິ​ເສດດ້ານ​ນີວ​ເຄລຍຂອງ​ເກົາຫລີ​ໃຕ້​ໄດ້​ບິນ​ໄປ​ຍັງຣັດ​ເຊຍ​ເພື່ອ​ທໍາ​ການ​ໂອ້​ລົມ​ສົນທະນາ​ກັນ​ກ່ຽວກັບ​ຄວາມ​ຄືບ​ໜ້າ​ຄັ້ງ​ຫລ້າ​ສຸດ​ ກັບ​ຄູ່​ຕໍາ​ແໜ່​ງຝ່າຍຣັດ​ເຊຍ​ນັ້ນ.

ທ່ານ Leon Panetta ລັດຖະມົນຕີ​ປ້ອງ​ກັນ​ປະ​ເທດ​ສະຫະລັດ ທີ່​ເດີນທາງ​ໄປ​ຮອດ​ກຸງ​ໂຊນ​ໃນ​ວັນ​ພຸດ​ມື້​ນີ້ ​ເພື່ອ​ເຂົ້າ​ຮ່ວມ​ໃນ​ການ​ພົບ​ປະຫາລື​ກັນ​ດ້ານ​ປ້ອງ​ກັນ​ປະ​ເທດ​ຕາມ​ທໍາ​ມະ​ດາ​ນັ້ນ ​ເບິ່ງ​ຄື​ວ່າ ຈະ​ທໍາ​ການ​ໂອ້​ລົມ​ສົນທະນາ​ກ່ຽວ​ກັບ​ຄວາມ​ພະຍາຍາມ​ຮອບ​ຫລ້າ​ສຸດ​ເຊ່ນ​ກັນ​ເພື່ອລິ​ເລີ້ມ​ການ​ໄຂ​ການ​ພົບ​ປະ​ເຈລະຈາ​ກັນ ​6 ຝ່າຍຄືນ​ໃໝ່​ກ່ຽວ​ກັບ​ໂຄງ ການນີວ​ເຄລຍຂອງ​ເກົາຫລີ​ເໜືອນັ້ນ.