ບັນດານັກເຈລະຈານີວເຄລຍ ຈາກເກົາຫລີເໜືອແລະເກົາຫລີໃຕ້ ນັ່ງລົງສົນທະນາກັນໃນ
ນະຄອນຫລວງຂອງຈີນໃນວັນພຸດມື້ນີ້ ເປັນຮອບທີສອງຂອງເຂົາເຈົ້າ ໃນຮອບ 2 ເດືອນ ຜ່ານມາ.
ທ່ານ Wi Sung-lac ທູດພິເສດເກົາຫລີໃຕ້ ແລະທ່ານ Ri Yong Ho ທູດພິເສດເກົາ ຫລີເໜືອໄດ້ພົບປະກັນຢູ່ທີ່ສະໂມສອນເອກກະຊົນແຫ່ງນຶ່ງໃນໃຈການງກຸງປັກກິງເພື່ອໂອ້ລົມສົນທະນາກັນກ່ຽວກັບເງື່ອນໄຂຕ່າງໆສໍາລັບການໄຂກອງປະຊຸມເຈລະຈາ 6 ຝ່າຍຄືນໃໝ່ ເພື່ອທັບມ້າງໂຄງການນີວເຄລຍຂອງເກົາຫລີເໜືອນັ້ນ.
ທ່ານ Wi Sung-lac ກ່າວໃນລະຫວ່າງການຢຸດພັກຜ່ອນວ່າ ການໂອ້ລົມສົນທະນາກັນໄດ້ດໍາເນີນໄປດ້ວຍດີ ແລະກ່າວຕໍ່ໄປວ່າ ພວກທ່ານໄດ້ໂອ້ລົມສົນທະນາກັນຫລາຍເລື້ອງ ແຕ່ທ່ານບໍ່ສາມາດທໍານາຍໄດ້ກ່ຽວກັບຜົນຂອງການໂອ້ລົມສົນທະນາໃນຕອນບ່າຍມື້ນີ້.
ບັນດາເຈົ້າໜ້າທີ່ເກົາຫລີໃຕ້ ກ່າວໃນວັນອັງຄານວານນີ້ວ່າ ທ່ານ Wi ກໍາລັງຊອກຫາທາງເພື່ອໃຫ້ໄດ້ຮັບຄຳໝັ້ນສັນຍາຈາກຝ່າຍເກົາຫລີເໜືອທີ່ຈະປະຕິບັດຕາມເງື່ອນໄຂຕ່າງໆຂອງເກົາຫລີໃຕ້ສໍາລັບການໄຂການພົບປະເຈລະຈາກັນຄືນນັ້ນ. ທາງເກົາຫລີໃຕ້ແລະສະຫະລັດໄດ້ຢືນຢັດວ່າໃຫ້ກຸງພຽງຢ້າງສະແດງໃຫ້ເຫັນວ່າຕົນເອົາຈິງເອົາຈັງທີ່ຈະປະຕິບັດຕາມຄໍາໝັ້ນສັນຍາຕ່າງໆທີ່ຕົນໃຫ້ໄວ້ວ່າຈະຢຸດເຊົາໂຄງການນີວເຄລຍ ຂອງຕົນນັ້ນ.
ເກົາຫລີເໜືອ ຊຶ່ງຍ່າງອອກຈາກການພົບປະເຈລະຈາກັນໃນປີ 2009 ນັ້ນໄດ້ຖືກກົດດັນ ໂດຍການໜຸນຫລັງຂອງຈີນ ເພື່ອໃຫ້ໄຂການພົບປະເຈລະຈານີ້ຄືນອີກ ໂດຍບໍ່ມີການວາງເງື່ອນໄຂໃດໆນັ້ນ.
