ເກົາຫຼີເໜືອ ແລະ ໃຕ້ ຈັດພິທີລະນຶກເຖິງ ວັນຄົບຮອບ 65 ປີຂອງການເລີ່ມຕົ້ນຄວາມຂັດແຍ້ງຂອງພວກເຂົາໃນຊຸມປີ 1950 ທີ່ເຮັດໃຫ້ມີຄົນເສຍຊີວິດນັບລ້ານ ແລະ ສອງປະເທດຖືກແບ່ງແຍກອອກຢ່າງເປັນ ການຖາວອນ.
ປະຊາຊົນປະມານ 3000 ຄົນ, ລວມທັງ ທະຫານຜ່ານເສິກ ແລະ ຂ້າລັດຖະການ ໄດ້ເຂົ້າຮ່ວມພິທີໃນນະຄອນຫຼວງ ໂຊລ ຂອງ ເກົາຫຼີໃຕ້, ໃນວັນພະຫັັດມື້ນີ້ ເພື່ອລະນຶກເຖິງວັນຄົບຮອບດັ່ງກ່າວ.
ນາຍົກລັດຖະມົນຕີ ເກົາຫຼີໃຕ້ ທ່ານ Hwang Kyo-anh ໄດ້ກ່າວ ເຖິງຄວາມເສຍໃຈກ່ຽວກັບ ສະພາບຄວາມໝັ້ນຄົງ ຂອງປະເທດວ່າ “ຍັງບໍ່ມີຄວາມທຸ່ນທ່ຽງເທື່ອ” ຢູ່ໃນແຫຼມ ເກົາຫຼີ, ຫຼາຍທົດສະວັດຫຼັງຈາກ ການຕໍ່ສູ້ໄດ້້ສິ້ນສຸດລົງໃນປີ 1953.
ທ່ານ ນາຍົກລັດຖະມົນ ໄດ້ກ່າວໃນບົດປາໄສຂອງທ່ານວ່າ “ຂ້າພະເຈົ້າຫວັງວ່າ ເກົາຫຼີເໜືອຈະກາຍເປັນສະມາຊິກທີ່ມີຄວາມຮັບຜິດຊອບ ຂອງປະຊາຄົມນາໆຊາດ ແລະ ເຮັດວຽກຮ່ວມກັນ ເພື່ອສັນຕິພາບ ແລະ ຄວາມຈະເລີນຮຸ່ງເຮືອງໃນແຫຼມ ເກົາຫຼີ”.
ໃນເວລາດຽວກັນ, ເກົາຫຼີເໜືອ ໄດ້ລະນຶກເຖິງໂອກາດດັ່ງກ່າວ ດ້້ວຍການກ່າວຫາ ສະຫະລັດ ຢ່າງແຮງ. ໃນຖະແຫຼງການ, ຄະນະກຳມາທິການປ້ອງກັນປະເທດຂອງ ເກົາຫຼີເໜືອ ໄດ້ກ່າວວ່າ ໂລກຄວນເຂົ້າມາຮວມກັນເພື່ອຕັດແຂນຕັດຂາ “ພວກປີສາດໄຂມັນ ລ່າຫົວເມືອງຂຶ້ນ ສະຫະລັດ.”
ຄະນະກຳມາທິການ ຍັງໄດ້ກ່າວຫາສະຫະລັດ ສຳລັບສົງຄາມເກົາຫຼີ, ແລະ ໄດ້ກ່າວວ່າ Washington ແມ່ນຍັງພະຍາຍາມທີ່ຈະກວດລ້າງ ປະເທດຄອມມູນິສ ດ້ວຍການໂຄສະນາ ເພື່ອສ້າງ “ຄວາມໂດດດ່ຽວ, ປິດລ້ອມ ແລະ ການຂັດຂວາງການພັດທະນາຂອງປະເທດ.”
ສົງຄາມເກົາຫຼີ ໄດ້ເລີ່ມຂຶ້ນໃນວັນທີ 25 ມິຖຸນາ 1950, ເມື່ອທະຫານ ເກົາຫຼີເໜືອ ທີ່ຖືກ ໜູນຫຼັງໂດຍ ຈີນ ເປີດການໂຈມຕີ ຜ່ານເສັ້ນຂະໜານ ທີ 38. ສະຫະລັດ ແລະ ພັນທະມິດ ໄດ້ເຂົ້າໄປແຊກແຊງເພື່ອສະໜັບ ສະໜຸນເກົາຫຼີໃຕ້.
ການຕໍ່ສູ້, ເຊິ່ງໄດ້ເຮັດໃຫ້ທະຫານ ແລະ ປະຊາຊົນຫຼາຍເຖິງ 3 ລ້ານ ຄົນເສຍຊີວິດ, ໄດ້ຈົບ ລົງໃນປີ 1953 ດ້ວຍການສະຫງົບເສິກຊົ່ວຄາວ, ບໍ່ແມ່ນສົນທິສັນຍາສັນຕິພາບ ເຮັດໃຫ້ ສອງປະເທດ ເກົາຫຼີ ໃນດ້ານເທັກ ນິກແລ້ວ ຍັງຢູ່ໃນສະພາບສົງຄາມລະຫວ່າງກັນຢູູ່.