ສະພາກາແດງເກົາຫລີໃຕ້ກ່າວໃນວັນຈັນມື້ນີ້ວ່າ ຕົນຈະສົ່ງການຊ່ອຍເຫລືອສຸກເສີນ ເປັນມູນຄ່າຫລາຍກວ່າ 8 ລ້ານດອນລາໄປໃຫ້ເກົາຫລີເໜືອ ເພື່ອຊ່ອຍປະເທດດັ່ງກ່າວຟື້ນໂຕຄືນຈາກໄພນໍ້າຖ້ວມຫວ່າງບໍ່ດົນຜ່ານມານີ້. ທ່ານ Yoo Chong-Ha ປະທານສະພາກາແດງແຫ່ງຊາດເກົາຫລີໃຕ້ກ່າວຕໍ່ບັນດານັກຂ່າວທີ່ກຸງໂຊລວ່າ ອົງການຂອງທ່ານຈະສົ່ງເຂົ້າສານຈໍານວນ 5 ພັນໂຕນແລະດິນຊິມັງ 10 ພັນໂຕນໄປໃຫ້ປະເທດຄອມມິວນິດເພື່ອນບ້ານຂອງຕົນນັ້ນ.
ແຕ່ທ່ານກ່າວວ່າ ຄໍາຮຽກຮ້ອງຂໍອຸບປະກອນໜັກຂອງກຸງພຽງຢ້າງນັ້ນແມ່ນນອກຂອບເຂດຂອງການຊ່ອຍເຫລືອດ້ານມະນຸດສະທໍາ ແລະມັນຂຶ້ນຢູ່ກັບລັດຖະບານເກົາຫລີໃຕ້ ທີ່ຈະຕັດສິນໃຈວ່າຈະສົ່ງອຸບປະກອນທີ່ວ່ານີ້ ໃຫ້ຫລືບໍນັ້ນ.
ທ່ານ Yoo ຍັງກ່າວຕື່ມວ່າ ສໍາລັບເລື້ອງການພົບປະກັນຄັ້ງຕໍ່ໄປຂອງພວກຄອບຄົວຊາວເກົາຫລີທີ່ໄດ້ຖືກພັດພາກຈາກກັນ ຍ້ອນສົງຄາມເກົາຫລີນັ້ນ ແມ່ນຕ້ອງການເວລາສຳລັບທໍາການກະກຽມ ແລະເບິ່ງຊົງວ່າ ຈະມີຂຶ້ນໃນເດືອນຕຸລາ ຄືເດືອນໜ້ານີ້.
