ເກົາຫລີເໜືອໄດ້ກ່າວປະນາມສະຫະລັດ ຍີ່ປຸ່ນແລະເກົາຫລີໃຕ້ ທີ່ໄດ້ໂຮມກັນຈັດຕັ້ງເປັນອັນທີ່ກຸງພຽງຢ້າງເອີ້ນວ່າ ພັນທະມິດທາງທະຫານສາມຝ່າຍນັ້ນ.
ອົງການຂ່າວຂອງເກົາຫລີເໜືອ ອ້າງຂ່າວໜັງສືພິມ Rodong Sinmun ຂອງ ທາງການຂອງເກົາຫລີເໜືອໃນວັນເສົາວານນີ້ ທີ່ເວົ້າວ່າ ພັນທະມິດດັ່ງກ່າວສ້າງໄພຂົ່ມຂູ່ຕໍ່ແຫລມເກົາຫລີ ແລະຕໍ່ຂົງເຂດເອເຊຍຕາເວັນອອກທັງໝົດ.
ໜັງສືພິມສະບັບນີ້ກ່າວວ່າ ຄວາມເຄັ່ງຕຶງໃນແຫລມເກົາຫລີແລະຄວາມເປັນໄປໄດ້ ທີ່ຈະມີສົງຄາມໃໝ່ເກີດຂຶ້ນ ກໍາລັງເພີ່ມທະວີຂຶ້ນ ຍ້ອນຄວາມພະຍາຍາມຕ່າງໆຂອງສະຫະລັດ ຍີ່ປຸ່ນແລະເກົາຫລີໃຕ້ ເພື່ອຈັດຕັ້ງພັນທະມິດນີ້ຂຶ້ນ.
ບັນດານັກການທູດລະດັບສູງສຸດຈາກສະຫະລັດ ເກົາຫລີໃຕ້ແລະຍີ່ປຸ່ນກໍານົດຈະ ພົບປະກັນໃນວັນຈັນມື້ອື່ນນີ້ ທີ່ກຸງວໍຊິງຕັນ ເພື່ອທໍາການໂອ້ລົມສົນທະນາກັນເລື່ອງຄວາມເຄັ່ງຕຶງໃນແຫລມເກົາຫລີ ຫລັງຈາກເກົາຫລີເໜືອລະດົມຍິງປືນໃຫຍ່ ໃສ່ເກາະນຶ່ງຂອງເກົາຫລີໃຕ້ໃນເດືອນແລ້ວນີ້ ທີ່ໄດ້ເອົາຊີວິດພົນລະເຮືອນໄປ 2 ຄົນແລະທະຫານເຮືອອີກ 2 ຄົນນັ້ນ.
ທີ່ກຸງວໍຊິງຕັນໃນວັນເສົາວານນີ້ ປະທານາທິບໍດີບາຣັກ ໂອບາມາແຫ່ງສະຫະລັດ ກ່າວວ່າ ຂໍ້ຕົກລົງການຄ້າເສລີສະບັບໃໝ່ທີ່ໄດ້ລົງນາມກັນກັບເກົາຫລີໃຕ້ ສະແດງໃຫ້ເຫັນວ່າ ພັນທະມິດລະຫວ່າງສອງປະເທດນີ້ ແມ່ນເຂັ້ມແຂງກວ່າແຕ່ກ່ອນໃນເວລາທີ່ຄວາມເຄັ່ງຕຶງພວມເພີ່ມທະວີຂຶ້ນໃນແຫລມເກົາຫລີນັ້ນ.
ທ່ານໂອບາມາເອີ້ນການໂຈມຕີຂອງເກົາຫລີເໜືອໃນເດືອນແລ້ວນີ້ ໃສ່ເກາະແຫ່ງ ນຶ່ງຂອງເກົາຫລີໃຕ້ນັ້ນວ່າ ເກີດຂຶ້ນໂດຍບໍ່ມີການເກາະຜິດໃດໆເລີຍ.
