ເກົາຫລີໃຕ້ແລະສະຫະລັດໄດ້ເລີ້ມທໍາການຊ້ອມລົບຮ່ວມກັນ ອີກຮອບໃໝ່ ໃນວັນຈັນມື້ນີ້ ຊຶ່ງພົວພັນກັບກໍາລັງສະຫະລັດປະມານ 30 ພັນຄົນ ແລະກໍາລັງເກົາຫລີໃຕ້ 56 ພັນຄົນ.
ການຊ້ອມລົບທາງຄອມພີວເຕີ ເປັນເວລາ 10 ມື້ເທື່ອນີ້ ນັບວ່າ ເປັນການຊ້ອມລົບຮ່ວມຄັ້ງໃຫຍ່ຮອບທີສອງ ໃນເວລາບໍ່ຮອດ 1 ເດືອນ ແລະມີຂຶ້ນຫລັງຈາກເຮືອລົບລໍານຶ່ງຂອງເກົາຫລີໃຕ້ ຈົມນໍ້າໃນຕົ້ນປີນີ້ ຊຶ່ງໄດ້ເຮັດໃຫ້ທະຫານເຮືອຂອງເກົາຫລີໃຕ້ ເສຍຊີວິດໄປ 46 ຄົນນັ້ນ.
ການຊ້ອມລົບທີ່ມີລະຫັດວ່າ “Ulchi Freedom Guardian” ເປັນການຊ້ອມລົບ ຈໍາລອງການສະກັດກັ້ນການໂຈມຕີດ້ວຍອາວຸດນີວເຄລຍ ລູກສອນໄຟ ແລະເຮືອດໍານໍ້າ ຂອງເກົາຫລີເໜືອ.
ເກົາຫລີເໜືອເຕືອນວ່າ ກອງທັບຂອງຕົນຈະທໍາການຕອບໂຕ້ຢ່າງບໍ່ປານີ ຕໍ່ການຊ້ອມລົບຮ່ວມທີ່ວ່ານີ້. ກຸງພຽງຢ້າງໄດ້ອອກຄໍາຂູ່ ໃນທໍານອງດຽວກັນ ໃນການຕອບໂຕ້ຕໍ່ການຊ້ອມລົບຕ້ານເຮືອດໍານໍ້າຂອງເກົາຫລີໃຕ້ ທີ່ມີຂຶ້ນໃນສັບປະດາຜ່ານມາຢູ່ນອກຝັ່ງທະເລທາງພາກຕາເວັນຕົກຂອງຕົນ.
ປະທານາທິບໍດີ ຫລີມິອອງພັກ ແຫ່ງເກົາຫລີໃຕ້ ໃນວັນຈັນມື້ນີ້ ໄດ້ເອີ້ນການຊ້ອມລົບ ເທື່ຶອຫລ້າສຸດນີ້ວ່າ ແມ່ນການຊ້ອມລົບເພື່ອສັນຕິພາບ ແລະເພື່ອການສະກັດກັ້ນ.
