ຫົວໜ້າເສນາທິການຮ່ວມຂອງກອງທັບສະຫະລັດ ກ່າວວ່າ
ສະຫະລັດແລະເກົາຫລີໃຕ້ຈະສືບຕໍ່ທໍາການຊ້ອມລົບຮ່ວມ
ຕິດຕໍ່ກັນໄປ ເພື່ອຕອບໂຕ້ຕໍ່ການໂຈມຕີຂອງເກົາຫລີເໜືອ
ໃສ່ເກາະນຶ່ງຂອງເກົາຫລີໃຕ້ໃນເດືອນແລ້ວນັ້ນ.
ນອກນີ້ ພົນເຮືອເອກ Mike Mullen ຍັງໄດ້ກ່າວຢໍ້າຕື່ມອີກ ເຖິງຄວາມໝັ້ນໝາຍຂອງອະເມຣິກາຕໍ່ການປ້ອງກັນເກົາຫລີໃຕ້ ຫລັງຈາກການພົບປະຫາລືກັນຢູ່ທ່ີກຸງໂຊນໃນວັນພຸດມື້ນີ້.
ນາຍພົນ Mullen ກ່າວຕື່ມວ່າ ທ່ານຫວັງວ່າ ພວກປະ
ເທດເພື່ອນບ້ານຂອງເກົາຫລີໃຕ້ໂດຍສະເພາະຍີ່ປຸ່ນ ຈະເຂົ້າຮ່ວມໃນການກະກຽມເພື່ອ
ທໍາຕອບໂຕ້ຕໍ່ການໂຈມຕີໃດໆ ທີ່ອາດຈະມີຂຶ້ນໃນອະນາຄົດຈາກເກົາຫລີເໜືອນັ້ນ.
ໃນກອງປະຊຸມຖະແຫລງຂ່າວ ນາຍພົນ Mullen ໄດ້ໃຫ້ຂໍ້ສັງເກດເຖິງການພົບປະຫາລືກັນຄັ້ງປະວັດສາດທີ່ກຸງວໍຊິງຕັນໃນວັນຈັນຜ່ານມານີ້ ລະຫວ່າງພວກລັດຖະມົນຕີການຕ່າງປະເທດຂອງສະຫະລັດ ເກົາຫລີໃຕ້ແລະຍີ່ປຸ່ນ. ນາຍພົນ Mullen ກໍານົດຈະເດີນ
ທາງໄປຍັງກຸງໂຕກຽວໃນຕອນແລງວັນພຸດມື້ນີ້ ເພື່ອທໍາການໂອ້ລົມສົນທະນາກັບບັນດາ
ເຈົ້າໜ້າທີ່ຍີ່ປຸ່ນ.
ນອກນັ້ນ ທ່ານ Mullen ຍັງໄດ້ກ່າວຍ້ອງຍໍສັນລະເສິນພວກຜູ້ນໍາເກົາຫລີໃຕ້ເຊ່ນກັນ ສໍາລັບການຍັບຍັ້ງຊັ່ງໃຈຂອງເຂົາເຈົ້າຕໍ່ໜ້າກັບການໂຈມຕີດ້ວຍປືນໃຫຍ່ຂອງເກົາຫລີເໜືອໃສ່ເກາະ Yeonpyeong ຊຶ່ງໄດ້ເອົາຊີວິດຜູ້ຄົນໄປ 4 ຄົນນັ້ນ. ແຕ່ທ່ານ Mullen ເຕືອນວ່າ ກຸງພຽງຢ້າງບໍ່ຕ້ອງເຂົ້າໃຈຜິດຄິດວ່າ ຄວາມຍັບຍັ້ງຊັ່ງໃຈ ກໍຄືຄວາມເຕັມໃຈທີ່ຈະປະ
ປ່ອຍໃຫ້ມີການໂຈມຕີອີກໃນອະນາຄົດ ໂດຍປາສະຈາກການໂຕ້ຕອບຄືນນັ້ນ.
