ຈີນກໍາລັງຮຽກຮ້ອງອີກຄັ້ງໃໝ່ ໃຫ້ສະຫະລັດແລະບັນດາພັນທະມິດຂອງສະຫະລັດ ໃຫ້ແບກຫາບເອົາເອົາຄວາມຮັບຜິດຊອບຂອງພວກຕົນ ໂດຍເຂົ້າຮ່ວມໃນກອງປະຊຸມລະດັບຂົງເຂດກັບເກົາຫລີເໜືອ ເພື່ອແກ້ໄຂຄວາມເຄັ່ງຕຶງໃນຂົງເຂດ.
ໂຄສົກຍິງປະຈໍາກະຊວງການຕ່າງປະເທດຈີນ ໄດ້ຮຽກຮ້ອງອີກຄັ້ງໃໝ່ໃນວັນອັງຄານມື້ນີ້ ໃນຂະນະທີ່ປະທານາທິບໍດີເກົາຫລີໃຕ້ເປີດເຜີຍແຜນການ ທີ່ເທົ່າກັບຈະຫັນປ່ຽນ 5 ເກາະໃນເຂດຊາຍແດນໃຫ້ເປັນປ້ອມປາການແທ້ໆ. ໃນວັນຈັນວານນີ້ ທີ່ກຸງວໍຊິງຕັນ ພວກລັດຖະມົນ
ຕີການຕ່າງປະເທດຈາກຍີ່ປຸ່ນແລະເກົາຫລີໃຕ້ໄດ້ຮ່ວມກັບລັດຖະມົນຕີການປະເທດສະຫະລັດ ທ່ານນາງ ຮີນລາຣີ ຄລິນຕັນ ຮຽກຮ້ອງໃຫ້ລັດຖະບານກຸງພຽງຢາງເອົາບາດກ້າວຕ່າງໆໃນທາງບວກເສຍກ່ອນ ຈຶ່ງ ຈະມີການພົບປະກັນໄດ້.
ທ່ານນາງ Jiang Yu ໂຄສົກປະຈໍາກະຊວງຕ່າງປະເທດຈີນ ກ່າວວ່າ ຄວາມຮັບຜິດຊອບເພື່ອຮັກສາໄວ້ຊຶ່ງສັນຕິພາບແລະສະຖຽນລະພາບ ຄວນຈະເປັນພາລະຂອງທຸກພັກຝ່າຍໃນຂົງເຂດ ແລະທ່ານນາງໄດ້ກ່າວຄໍາຮຽກຮ້ອງຂອງຈີນອີກເທື່ອໃໝ່ ໃຫ້ທຸກພັກຝ່າຍໃນຂົງເຂດພົບປະກັນ ເພື່ອທໍາການໂອ້ລົມສົນທະນາແລະເຈລະຈາກັນ.
ທີ່ເກົາຫລີໃຕ້ ການຊ້ອມລົບໄດ້ດໍາເນີນສືບຕໍ່ມາ ລ່ວງໜ້າການເດີນທາງໄປເຖິງ ເພື່ອທໍາການຢ້ຽມຢາມ ຂອງພົນເຮືອເອກ Mike Mullen ຫົວໜ້າກອງທັບສະຫະລັດ ໃນວັນພຸດມື້ອື່ນນີ້.
