ເຈົ້າໜ້າທີ່ເກົາຫລີໃຕ້ກ່າວວ່າ ເກົາຫລີເໜືອແລະເກົາຫລີໃຕ້ໄດ້ຍິງປືນໃຫຍ່ ໃສ່ກັນແລະກັນ ໃນວັນພຸດມື້ນີ້ ຢູ່ເຂດນຶ່ງໃກ້ກັບຊາຍແດນທີ່ເຄັ່ງຕຶງຕິດກັບ ເກົາຫລີເໜືອນັ້ນ.
ລາຍງານຂ່າວໃນເບຶ້ອງຕົ້ນກ່າວວ່າ ທັງສອງຝ່າຍໄດ້ຍິງປືນໃຫຍ່ໃສ່ກັນ ຄົນລະສາມລູກ
ຊື່ງສ່ວນໃຫຍ່ໄດ້ໄປຕົກລົງທະເລ ບໍ່ຮອດຊາຍແດນ. ຍັງບໍ່ມີຫລັກຖານຂອງຜົນເສຍຫາຍ
ຫລື ຜູ້ໄດ້ຮັບບາດເຈັບໃນທັນທີນີ້ເທື່ອ.
ກະຊວງປ້ອງກັນປະເທດເກົາຫລີໃຕ້ ກ່າວວ່າ ກອງທັບເຮືອຂອງຕົນໄດ້ ຍິນສຽງປືນໃຫຍ່
3 ລູກ ທີ່ຍິງມາຈາກເກົາຫລີເໜືອ ໃນອັນທີ່ອາດເປັນການຊ້ອມລົບກັນ. ໂຄສົກຄົນນຶ່ງກ່າວວ່າ ເກົາຫລີໃຕ້ກໍໄດ້ຍິງຕອບຄືນ ສາມລູກເຊັ່ນກັນ ທີ່ໄປຕົກຢູ່ໃກ້ເຂດຊາຍແດນ.
ລາຍງານຂ່າວອ້າງເອົາຄໍາເວົ້າເຂອງຈົ້າໜ້າທີ່ກະຊວງປ້ອງກັນປະເທດທ່ານນຶ່ງ ທີ່ເວົ້າວ່າ ລູກປືນໃຫຍ່ຂອງເກົາຫລີເໜືອໄດ້ ຕົກລົງໃສ່ເຂດດຽວກັນກັບບ່ອນທີ່ເກົາຫລີເໜືອ ໄດ້ສັງ ຫານຊາວເກົາຫລີໃຕ້ສີ່ຄົນ ໃນການໂຈມຕີດ້ວຍປືນໃຫຍ່ ໃນເດືອນພະຈິກປີຜ່ານມານີ້.
ການໂຈມຕີຂອງເກົາຫລີເໜືອໃນຄັ້ງນັ້ນ ໄດ້ມີຂຶ້ນເພື່ອເປັນການຕອບໂຕ້ຕໍ່ການຊ້ອມລົບ
ຂອງເກົາຫລີໃຕ້ ທີ່ເກາະ Yeonpyeong ຊຶ່ງເປັນເກາະນ້ອຍໆ ຢູ່ໃກ້ຊາຍແດນທາງທະເລ
ລະຫວ່າງສອງເກົາຫລີນັ້ນ. ເກົາຫລີເໜືອໄດ້ຍິງປືນໃຫຍ່ ຫລາຍກວ່ານຶ່ງຮ້ອຍລູກໃສ່ເກາະ
ດັ່ງກ່າວ ຍັງຜົນໃຫ້ທະຫານເຮືອສອງຄົນ ແລະພົນລະເຮືອນສອງຄົນເສຍຊີວິດ.
ການໂຈມຕີບັ້ນດັ່ງກ່າວ ໄດ້ສ້າງຄວາມເສຍຫາຍຢ່າງໜັກໃຫ້ແກ່ຄວາມສໍາພັນລະຫວ່າງ
ສອງເກົາຫລີ ທີ່ຢູ່ໃນສະພາບເຄ່ງຕຶງຢູ່ແລ້ວ ຍ້ອນເຫດການຈົມເຮືອລົບເກົາຫລີໃຕ້ ໃນ
ເດືອນມີນາປີ 2010 ນັ້ນ.
