ສານເກົາຫຼີໃຕ້ ໄດ້ຕັດສິນວ່າ ລູກສາວ ຂອງປະທານສາຍການບິນ
Korean Air Lines ໄດ້ລະເມີດກົດໝາຍວ່າດ້ວຍຄວາມປອດໄພ
ການບິນ ໃນລະຫວ່າງທີ່ນາງເກີດຄວາມໂມໂຫໂທໂສ ກ່ຽວກັບວິທີ
ໃຫ້ບໍລິການໝາກ macadamia ຂອງສາຍການບິນນັ້ນ.
ນາງ Heather Cho ອະດີດຜູ້ບໍລິຫານ ແລະ ຫົວໜ້າຝ່າຍບໍລິ
ການປະຈຳຖ້ຽວບິນ ຂອງສາຍການບິນດັ່ງກ່າວ ໄດ້ຖືກຕັດສິນ
ລົງໂທດຈຳຄຸກ 1 ປີ ຍ້ອນພຶດຕິກຳຕ່າງໆຂອງນາງ ຊຶ່ງໄດ້ກາຍ
ມາເປັນເລື່ອງທີ່ຮູ້ຈັກກັນວ່າ “ຄວາມບໍ່ພໍໃຈຢ່າງແຮງ ໃນການ
ເສີບໝາກ macademia” ຫຼື “nut rage” ນັ້ນ.
ນາງ Cho ໄດ້ບັງຄັບໃຫ້ຖ້ຽວບິນໃນວັນທີ 5 ທັນວາ ປີກາຍນີ້ ຕ່າວ ຄືນໄປຍັງປະຕູຈອດ
ໃນນະຄອນນິວຢອກ ເພື່ອຍ້າຍພະນັກງານສາຍການບິນທີ່ບໍລິການນາງອອກໄປ ຍ້ອນ
ຜູ້ກ່ຽວເສີບໝາກ macadamia ທີ່ຢູ່ໃນຖົງໃຫ້ນາງ ແທນທີ່ຈະໃສ່ຈານມາໃຫ້ຢ່າງດີ ຢູ່ໃນ
ບ່ອນນັ່ງຊັ້ນທີນຶ່ງຂອງເຮືອບິນນັ້ນ.
ນອກນັ້ນຍັງມີລາຍງານວ່າ ນາງໄດ້ບັງຄັບໃຫ້ພະນັກງານບໍລິການຄົນ ນັ້ນ ຄູ້ເຂົ່າລົງຢູ່ຕໍ່
ໜ້ານາງເທິງເຮືອບິນ ແລະເອົາແຈແຫລມໆ ຂອງປື້ມຄູ່ມືການບິນ ທັ່ງໃສ່ດ້ານຫລັງມື
ຂອງພະນັກງານການບິນຄົນນັ້ນ.
ຜູ້ພິພາກສາ ທ່ານ Oh Sung-woo ກ່າວໃນການຕັດສິນ ເມື່ອວັນພະຫັດມື້ນີ້ວ່າ “ຄະດີ
ນີ້ ເປັນຄະດີທີ່ກຽດສັກສີຂອງຄວາມເປັນມະນຸດ ໄດ້ຖືກຢຽດຢາມ.” ທ່ານກ່າວອີກ
ວ່າ ມັນແມ່ນ “ຄວາມສົງໄສວ່າ ວິທີການໃຫ້ບໍລິການໝາກ macadamia ນັ້ນ
ແມ່ນຜິດຫຼາຍເກີນໄປບໍ.”
ຊາວເກົາຫລີຈຳນວນນຶ່ງ ມອງເຫັນນາງ Cho ອາຍຸ 40 ປີວ່າ ເປັນ “ເຈົ້າຍິງ” ຂອງ
ບໍລິສັດ ທີ່ເອົາແຕ່ໃຈໂຕເອງ ແລະກ່າວວ່າ ບັນຫານີ້ສະທ້ອນໃຫ້ເຫັນ ເຖິງບັນຫາອັນ
ກວ້າງຂວາງ ໃນສັງຄົມເກົາຫຼີໃຕ້.
ນາງ Cho ຜູ້ທີ່ຍັງຖືກກ່າວຟ້ອງໃນຂໍ້ຫາ ຂັດຂວາງຂະບວນການຍຸດຕິທຳ ແລະ ທຳຮ້າຍ
ຮ່າງກາຍສະມາຊິກຄົນນຶ່ງ ຂອງພະນັກງານຖ້ຽວບິນ ດັ່ງກ່າວອີກ ໄດ້ຮ້ອງຮຽນຕໍ່ສານວ່າ
ນາງບໍ່ມີຄວາມຜິດ ຕໍ່ຂໍ້ກ່າວຫາເຫຼົ່າ ນັ້ນ. ນາງຍັງໄດ້ຂໍຂະມາໂທດຢ່າງເປີດເຜີຍກ່ຽວກັບ
ການປະພຶດຕ່າງໆ ຂອງນາງ.
