ລິ້ງ ສຳຫລັບເຂົ້າຫາ

ເກົາຫຼີເໜືອບໍ່ຕອບໂຕ້ ຕໍ່ການຊ້ອມລົບຂອງເກົາຫຼີໃຕ້

  • ວັນນະສອນ ແກ້ວດາຣາ

ປະຊາຊົນເກົາຫລີໃຕ້ ເບິ່ງຂ່າວການຊ້ອມລົບຍິງປືນໃຫຍ່ດ້ວຍລູກປືນແທ້ຂອງກອງທັບ ທີ່ຖ່າຍທອດອອກ ອາກາດສົດທາງໂທລະພາບ ຢູ່ສະຖານີລົດໄຟ ແຫ່ງນຶ່ງໃນນະຄອນຫລວງ Seoul, ວັນທີ 20 ທັນວາ 2010.

ປະທານາທິບໍດີເກົາຫລີໃຕ້ ໄດ້ສັ່ງໃຫ້ຄະນະລັດຖະບານ
ທຸກໆທະບວງກົມຂອງທ່ານ ຢູ່ໃນທ່າລະວັງເຫດສຸກເສີນ
ລຸນຫລັງຈາກການຊ້ອມລົບຍິງປືນໃຫຍ່ທີ່ໃຊ້ລູກປືນແທ້
ຢູ່ພາຍໃນສອງສາມກິໂລແມດ ຂອງຝັ່ງທະເລເກົາຫລີ
ເໜືອນັ້ນ.

ແຕ່​ວ່າ ເກົາຫລີເໜືອບໍ່ໄດ້ປະຕິບັດ​ຕາມຄໍາຂູ່ກ່ອນ​ໜ້ານີ້
ທີ່ວ່າຈະທໍາການ ຕອບໂຕ້​ແບບ​ທີ່​ຈະ​ສ້າງ​ຄວາມ​ຫາ​ຍະ​ນະ
ຢ່າງ​ຮ້າຍແຮງຕໍ່ການຊ້ອມລົບນີ້ ໂດຍກ່າວຜ່ານອົງການ
ຂ່າວທາງ​ການຂອງຕົນວ່າ ມັນບໍ່ຄຸ້ມຄ່າທີ່​ຈະ​ສະ​ແດງ
ປະຕິກິລິຍາຕໍ່ການຊ້ອມລົບດັ່ງກ່າວນັ້ນ.

ຝ່າຍເກົາຫລີໃຕ້ໄດ້ຍົກຍ້າຍປະຊາຊົນທ້ອງຖິ່ນຂອງເກາະ Yeonpyeong ໄປຫລົບ​ໄພຢູ່​
ໃຕ້ດິນຊົ່ວຄາວ ແລະສົ່ງ​ເຄື່ອງບິນລົບໄອພົ່ນຂຶ້ນ​ບິນ ໃນການຕຽມພ້ອມ​ ສໍາລັບການຊ້ອມ
ລົບທີ່ໃຊ້ເວລາ 90 ນາທີ​ໃນວັນຈັນມື້ນີ້ ທີ່ເກາະ Yeonpyong ທີ່​ໄດ້ຍິງປືນໃຫຍ່ຫລາຍ
ເຖິງ1,500 ຊຸດ. ພວກນັກຂ່າວທີ່ຊ່ອນຕົວຢູ່ປ້ອມຫລົບໄພໃຕ້ດິນກ່າວວ່າ ພວກເຂົາເຈົ້າ
ສາມາດຮູ້ສຶກ​ໄດ້​ວ່າ​ແຜ່ນດິນສັ່ນສະເທືອນໃນລະຫວ່າງທີ່ການຊ້ອມລົບກໍາລັງດໍາເນີນໄປນັ້ນ.

ເກົາຫລີເໜືອ​ໄດ້ຍິງປືນໃຫຍ່ໃສ່ເກາະດັ່ງກ່າວໃນການສະແດງປະຕິກິລິຍາ ຕໍ່ການຊ້ອມລົບ
ທໍານອງດຽວກັນເມື່ອເດືອນຜ່ານມາທີ່ຍັງຜົນໃຫ້ທະຫານເກົາຫລີໃຕ້ ສອງຄົນແລະພົນລະ
ເຮືອນອີກສອງຄົນເສຍຊີວິດ ແຕ່ພຽງ ຢາງ​ໄດ້​ກ່າວ​ໃຫ້​ຮ່ອງຮອຍ ຫລັງຈາກການຊ້ອມລົບ​
ໃນວັນຈັນມື້ນີ້ວ່າ ຕົນຈະບໍ່ທໍາການຕອບໂຕ້ໃດໆ​ ເນຶ່ອງຈາກວ່າເທື່ອນີ້ເກົາຫລີໃຕ້ໄດ້ແນປືນ
ອອກໄປໄກນອກຝັ່ງທະເລ.

XS
SM
MD
LG