ກອງກຳລັງທະຫານຂອງສະຫະລັດ ແລະ ຍີ່ປຸ່ນ ຫລາຍ
ກ່ວາ 4 ໝື່ນຄົນ ກຳລັງ ພາກັນເຄື່ອນເຂົ້າໄປປະຈໍາຢູ່ຈຸດ
ທີ່ຈະທຳການຊ້ອມລົບຮ່ວມກັນຄັ້ງໃຫຍ່ ຢູ່ໃກ້ຝັ່ງທະເລຂອງ
ເກົາຫລີໃຕ້ ນັບແຕ່ວັນສຸກມື້ອື່ນເປັນຕົ້ນໄປ.
ການຊ້ອມລົບ ທີ່ມີຊື່ນ້ອຍວ່າ “ດາບທີ່ແຫລມຄົມ” ຫລື
“Keen Sword” ໄດ້ມີການວາງແຜນກັນໄວ້ ໄດ້ປີກວ່າ
ມາແລ້ວ. ແຕ່ມີລາຍງານຂ່າງອ້າງຄໍາເວົ້າເຈົ້າໜ້າທີ່ກະ
ຊວງປ້ອງກັນປະເທດຍີ່ປຸ່ນ ທີ່ເວົ້າໃນວັນພະຫັດມື້ນີ້ວ່າ
ພວກເຂົາເຈົ້າຍິນດີນໍາການສະແດງ ເຖິງຄວາມຮ່ວມມື
ທາງທະຫານທ່າມກາງຄວາມເຄັ່ງຕຶງຢ່າງໜັກ ລຸນຫລັງ
ທີ່ມີການຍິງ ໂຈມຕີດ້ວຍປືນໃຫຍ່ຂອງເກົາຫລີເໜືອໃສ່
ດິນແດນຂອງເກົາຫລີໃຕ້ ໃນອາທິດແລ້ວນີ້.
ການຊ້ອມລົບທີ່ຈະດຳເນີນໄປເປັນເວລາ 1 ອາທິດ
ແມ່ນເປັນເທື່ອຫລ້າສຸດ ຂອງການເຄື່ອນໄຫວທາງດ້ານການທະຫານ ແລະການທູດທີ່ໄດ້ມີ
ຂຶ້ນຢ່າງຕໍ່ເນື່ອງ ໃນຂະນະທີ່ພວກອຳນາດທັງຫລາຍໃນເຂດມະຫາສະມຸດປາຊີຟິກຫາທາງ
ຕອບໂຕ້ຄືນ ຕໍ່ການຍິງໂຈມຕີຂອງລັດຖະບານພຽງຢາງໃສ່ເກາະນຶ່ງຂອງເກົາຫລີໃຕ້ ຢູ່ໃກ້
ຝັ່ງທະເລຂອງເກົາຫລີ ເໜືອ ທີ່ໄດ້ເຮັດໃຫ້ຄົນເກົາຫລີໃຕ້ 4 ຄົນເສຍຊີວິດນັ້ນ.
ເກົາຫລີໃຕ້ເອງໄດ້ປະກາດວ່າ ຈະຊ້ອມລົບການຍິງປືນໃຫຍ່ຄັ້ງໃໝ່ ຢູ່ໃນພື້ນທີ່ດຽວກັນນັ້ນ ເລີ້ມແຕ່ວັນຈັນໜ້ານີ້ເປັນຕົ້ນໄປ.
ໃນຂະນະດຽວກັນນັ້ນ ຝ່າຍຈີນ ກໍໄດ້ສະເໜີໃຫ້ຄຳໝັ້ນສັນຍາຄືນອີກຄັ້ງນຶ່ງ ທີ່ຈະໃຫ້ ການສະໜັບສະໜູນເກົາຫລີເໜືອ ເຖິງແມ່ນວ່າ ຫົວໜ້າໜ່ວຍສືບລັບຂອງ ເກົາຫລີໃຕ້ ຈະເຕືອນວ່າເກົາຫລີເໜືອມີທ່າທີວ່າຈະໂຈມຕີເກົາຫລີໃຕ້ ອີກຢູ່ກໍຕາມ.
