ເກົາຫຼີເໜືອກ່າວວ່າ ຕົນບໍ່ມີແຜນການທີ່ຈະທໍາການທົດລອງນີວເຄລຍ ແຕ່ຢ່າງໃດ
ເຖິງແມ່ນວ່າໄດ້ມີອັນທີ່ເກົາຫຼີເໜືອເອີ້ນວ່າ ເປັນຄວາມພະຍາຍາມຂອງເກົາຫລີໃຕ້
ເພື່ອກໍ່ກວນໃຫ້ຕົນເຮັດ ກໍຕາມ.
ກະຊວງການຕ່າງປະເທດເກົາຫຼີເໜືອ ໄດ້ອອກຖະແຫລງການດັ່ງກ່າວ ໃນວັນເສົາ
ວານນີ້ ແລະເວົ້າວ່າ ເກົາຫລີໃຕ້ກໍາລັງພະຍາຍາມທີ່ຈະຫາຂໍ້ອ້າງຢ່າງນອງນັນກ່ຽວ
ກັບເລື້ອງນີ້ ເພື່ອໃຫ້ມີການເພີ້ມທະວີການລົງໂທດຕໍ່ເກົາຫຼີເໜືອ ທີ່ທຸກຍາກນັ້ນ.
ຮູບທີ່ຖ່າຍອອກທາງດາວທຽມໃນເດືອນເມສາທີ່ຜ່ານມາ ສະແດງໃຫ້ເຫັນກິດຈະກໍາ ທີ່ດໍາເນີນໄປຢູ່ສະຖານນີວເຄລຍຕ່າງໆຂອງເກົາຫຼີເໜືອ ແລະລັດຖະບານພຽງຢາງ
ກໍໄດ້ພະຍາຍາມທົດລອງ ປ່ອຍຈະຫລວດໄລຍະໄກຂຶ້ນສູ່ທ້ອງຟ້າໃນເດືອນນັ້ນ.
ເກົາຫຼີເໜືອກ່າວອ້າງວ່າ ຈະຫລວດນັ້ນ ແມ່ນເພື່ອນໍາເອົາດຽວທຽມດວງນຶ່ງຂຶ້ນປ່ອຍ
ສູ່ວົງໂຄຈອນ, ແຕ່ວ່າພວກປະເທດມະຫາອໍານາດຕາເວັນຕົກ ເວົ້າວ່າ ມັນແມ່ນການ
ທົດລອງລູກສອນໄຟ ທີ່ເປັນການລະເມີດຕໍ່ຂໍ້ຫ້າມຂອງສະຫະປະຊາຊາດ ທີ່ຫ້າມ
ການທົດລອງເທັກໂນໂລຈີດ້ານນັ້ນ.
ກອງເສນາທິການຮ່ວມຂອງເກົາຫລີໃຕ້ ກ່າວໃນວັນພະຫັດຜ່ານມາວ່າ ຕົນກໍາລັງ “ເຝົ້າຕິດຕາມເບິ່ງການເຄື່ອນໄຫວຕ່າງໆຂອງເກົາຫຼີເໜືອ ຢ່າງໃກ້ຊິດ” ລຸນຫລັງທີ່
ໄດ້ມີການຂຶ້ນບິນໃນຈໍານວນຫລາຍໆຄັ້ງ ຂອງເຮືອບິນລົບຂອງເກົາຫລີເໜືອ ຢູ່ໃກ້ເຂດອາວະກາດຂອງເກົາຫລີໃຕ້ ໃນຫລາຍໆອາທິດທີ່ ຜ່ານມານີ້.
