ເກົາຫຼີໃຕ້ໄດ້ທໍາການຊ້ອມລົບທີ່ຈັດຂຶ້ນເປັນປະຈໍານັ້ນ ຢູ່ໃກ້ໆກັບເຂດຊາຍ ແດນທາງນໍ້າ
ທີ່ເປັນຈຸດຜິດຖຽງກັນກັບເກົາຫຼີເໜືອໃນວັນຈັນມື້ນີ້ ເຖິງແມ່ນໄດ້ມີການຂູ່ຈາກເກົາຫຼີເໜືອ
ວ່າ ຈະທໍາການຕອບໂຕ້ຖ້າວ່າຊາຍແດນຂອງຕົນຫາກຖືກລ່ວງລະເມີດ. ການຊ້ອມລົບ
ແມ່ນມີຮວມທັງການໃຊ້ ປືນໃຫຍ່ ປືນຄົກ ແລະເຮືອບິນເຮຣິຄອບເຕີນໍາ.
ການກະຈາຍສຽງຈາກວິທະຍຸຂອງເກົາຫຼີເໜືອ ໄດ້ປະກາດເຕືອນກ່ຽວກັບການຕອບໂຕ້
ຄືນໂດຍທັນທີແລະຢ່າງບໍ່ປານີ ຖ້າຫາກມີການຕິດຕາມເຫັນວ່າ ຜິວນໍ້າໃນເຂດຂອງຕົນຖືກ
ກະທົບກະເທືອນແມ່ນແຕ່ແຖວດຽວກໍຕາມ.
ນອກນັ້ນ ທາງເກົາຫຼີເໜືອຍັງໄດ້ເຕືອນພວກປະຊາຊົນທີ່ອາໄສຢູ່ຕາມເກາະແນວໜ້າ
5 ເກາະຂອງເກົາຫລີໃຕ້ນັ້ນ ໃຫ້ຍົກຍ້າຍອອກໄປເພື່ອຄວາມປອດໄພໃນກໍລະນີທີ່ອາດ
ມີການຍິງປືນໃຫຍ່ຕອບໂຕ້ຄືນ. ແຕ່ເວລານີ້ ຍັງບໍ່ໄດ້ມີລາຍງານຂອງການເອົາບາດກ້າວ
ແຕ່ຢ່າງໃດເທື່ອ ຈາກທາງເກົາຫຼີເໜືອ.
ຂະນະດຽວກັນ ເກົາຫຼີໃຕ້ ແລະສະຫະລັດ ກໍມີແຜນຈະທໍາການຊ້ອມລົບ ຕໍ່ຕ້ານເຮືອດໍານໍ້າ
ຮ່ວມກັນ ໃນເຂດທະເລເຫຼືອງໃນອາທິດໜ້ານີ້ ຄືເລີ່ມແຕ່ວັນຈັນອາທິດໜ້ານີ້ໄປ ຄູ່ພາຄີ
ທັງສອງຈະເລີ່ມບັ້ນທໍາອິດຂອງການຊ້ອມລົບປະຈໍາປີ ຂະນາດໃຫຍ່ສອງບັ້ນຮ່ວມກັນ
ທີ່ພົວພັນທະຫານຈໍານວນຫລາຍພັນຄົນຈາກທັງສອງປະເທດ.
