ເກົາຫລີເໜືອແລະເກົາຫລີໃຕ້ໄດ້ປະທະວາຈາກັນ ໃນວັນພະຫັດມື້ນີ້ ນຶ່ງມື້ຫລັງຈາກມີການ
ຍິງປືນໃຫຍ່ໃສ່ກັນໃນເຂດນ່ານນໍ້າໃກ້ໆກັບເຂດຊາຍແດນທະເລເຫລືອງຂອງພວກເຂົາເຈົ້າ
ຊຶ່ງພາໃຫ້ເກີດຄວາມເຄັ່ງຕຶງຂຶ້ນມາໃໝ່ນັ້ນ.
ໃນຖະແຫລງການທີ່ເປີດເຜີຍອອກທາງອົງການຂ່າວທາງການຂອງຕົນໃນວັນພະຫັດມື້ນີ້ ເກົາຫລີເໜືອໄດ້ປະຕິເສດຢ່າງສິ້ນເຊີງຕໍ່ການກ່າວຫາຂອງເກົາຫລີໃຕ້ ທີ່ວ່າເກົາຫລີເໜືອ
ໄດ້ຍິງປືນໃຫຍ່ໃສ່ຕົນຈໍານວນນຶ່ງ ຊຶ່ງເຮັດໃຫ້ມີການຍິງຕອບກັບຄືນໄປໃນວັນພຸດວານນີ້.
ຖະແຫລງການເວົ້າວ່າ ເກົາຫລີໃຕ້ຄົງສັບສົນແລະເຂົ້າໃຈຜິດ ຄິດວ່າສຽງລະເບີດຢູ່ບ່ອນກໍ່
ສ້າງແຫ່ງນຶ່ງໃກ້ໆກັບຊາຍແດນນັ້ນເປັນສຽງປືນໃຫຍ່.
ພວກເຈົ້າໜ້າທີ່ເກົາຫລິໃຕ້ກ່າວຕອບໂຕ້ວ່າ ບໍ່ມີຂໍ້ສົງໄສໃດໆເລີຍວ່າເກົາຫລີເໜືອໄດ້ຍິງປືນໃຫຍ່ແທ້ ແລະວ່າ ການກ່າວອ້າງຂອງເກົາຫລີເໜືອນັ້ນ ແມ່ນເປັນເລື່ອງປົກກະຕິທໍາມະດາ ຂອງປະເທດນຶ່ງ ທີ່ເຄີຍປະຕິເສດມາເປັນປະຈໍາກ່ຽວກັບການເກາະຜິດຕ່າງໆຂອງຕົນນັ້ນ.
ໃນໂອກາດຖະແຫລງຕໍ່ພວກນັກຂ່າວທີ່ກຸງໂຊນໃນວັນພະຫັດມື້ນີ້ ທ່ານພັນກິມູນ ເລຂາ
ທິການໃຫຍ່ສະຫະປະຊາຊາດ ກ່າວວ່າ ການຍິງປືນໃສ່ກັນນີ້ ພາໃຫ້ທ່ານມີຄວາມເປັນ
ຫ່ວງແລະເສຍໃຈ ຊຶ່ງທ່ານກ່າວວ່າ ມັນສະແດງໃຫ້ເຫັນວ່າ ສະຖານະການໃນແຫລມເກົາ
ຫລີ ຍັງຄົງບໍ່ທຸ່ນທ່ຽງຢູ່.
