ເກົາຫລີໃຕ້ກ່າວວ່າ ການເຈລະຈາກັນທາງທະຫານເປັນເວລາ 2 ມື້ກັບເກົາຫລີເໜືອໄດ້ຢຸດສະງັກລົງແລ້ວ ໂດຍບໍ່ໄດ້ບັນລຸຂໍ້ຕົກລົງກັນໃດໆ ຊຶ່ງພາໃຫ້ຄວາມຫວັງຊັກຊ້າໄປ ໃນການຢາກໃຫ້ສາຍພົວພັນທີ່ເຄັ່ງຕຶງທາງທະຫານຜ່ອນ ຄາຍລົງລະຫວ່າງສອງປະເທດນັ້ນ.
ເຈົ້າໜ້າທີ່ກະຊວງປ້ອງກັນປະເທດເກົາຫລີໃຕ້ທ່ານນຶ່ງກ່າວກັບ ວີໂອເອ ວ່າ ພວກຜູ້ຕາງໜ້າຝ່າຍເກົາຫລີເໜືອໄດ້ຍ່າງອອກຈາກກອງປະຊຸມທີ່ໝູ່ບ້ານຊາຍແດນ Panmunjom ໃນຕອນບ່າຍມື້ນີ້. ການເຈລະຈາ ກັນຄັ້ງນີ້ ມີວັດຖຸປະສົງເພື່ອຈັດແຈງໃຫ້ມີການພົບປະກັນໃນລະດັບສູງລະຫວ່າງພວກນາຍທະຫານຂອງສອງປະເທດ ເພື່ອໂອ້ລົມສົນທະນາກັນເລື້ອງຄວາມເຄັ່ງຕຶງທີ່ເກີດຈາກການທີ່ ພຽງຢ້າງໄດ້ຍິງປືນໃຫຍ່ໂຈມຕີເກາະນ້ອຍແຫ່ງນຶ່ງຂອງເກົາຫລີໃຕ້ໃນເດືອນພະຈິກປີຜ່ານນີ້.
ພວກເຈົ້າໜ້າທີ່ ບໍ່ໄດ້ໃຫ້ຄໍາຊີ້ແຈງໃດໆ ກ່ຽວກັບການພົບປະກັນທີ່ຢຸດສະງັກລົງນີ້ ແຕ່ພວກເຂົາເຈົ້າເວົ້າວ່າ ເກົາຫລີເໜືອບໍ່ຍອມຮັບເອົາເງື່ອນໄຂ 2 ຂໍ້ຂອງຝ່າຍເກົາຫລີໃຕ້ ສໍາລັບການພົບປະກັນໃນລະດັບສູງນັ້ນ ໃນລະຫວ່າງການພົບປະຫາລືກັນເປັນເວລາຫລາຍຊົ່ວໂມງໃນວັນອັງຄານແລະວັນພຸດມື້ນີ້.
ຝ່າຍເກົາຫລີໃຕ້ຢືນຢັດວ່າ ກ່ອນອື່ນເກົາຫລີເໜືອຈະຕ້ອງຂໍໂທດເສຍກ່ອນສໍາລັບການຍິງປືນໃຫຍ່ໂຈມຕີເກາະ Yongpyeong ໃນວັນທີ 23 ພະຈິກປີກາຍນີ້ ແລະຍອມຮັບຜິດຊອບໃນການຈົມກໍາປັ່ນລົບ Cheonan ຂອງເກົາຫລີໃຕ້ໃນເດືອນມີນາປີແລ້ວນີ້. ຝ່າຍເກົາຫລີເໜືອປະຕິເສດວ່າ ຕົນບໍ່ມີບົດບາດໃດໆກ່ຽວກັບການຈົມນໍ້າຂອງກໍາປັ່ນລົບ Cheonan ນັ້ນ ແລະອ້າງວ່າ ເກົາຫລີໃຕ້ໄດ້ເປັນຜູ້ເກາະຜິດໃນເຫດການໃນເກາະ Yeonpyeong ນັ້ນ.
