ນາຍົກລັດຖະມົນຕີ Tonga ໄດ້ປະກາດຂ່າວການສີ້ນພະຊົນຂອງ ກະສັດ George
Tupou ທີ 5 ເຈົ້າຊີວິດຂອງເກາະດັ່ງກ່າວ ທີ່ຕັ້ງຢູ່ໃນມະຫາສະມຸດປາຊີຟິກ.
ນາຍົກລັດຖະມົນຕີ Lord Tu’ivakano ກ່າວວ່າ ກະສັດ Tupou ທີ່ມີພະຊົນມາຍຸ
63 ພັນສາ ໄດ້ສີ້ນພະຊົນໃນວັນອາທິດວານນີ້ ທີ່ໂຮງພະຍາບານແຫ່ງນຶ່ງໃນຮົງກົງ
ໂດຍມີພະອະນຸຊາຫລືນ້ອງຊາຍ ຄືເຈົ້າຟ້າຊາຍ Tupouto’a Lavaka ຜູ້ຈະຂຶ້ນແທນ
ບັນລັງນັ້ນ ຢູ່ຄຽງຂ້າງພະອົງ.
ກະສັດ Tupou ຊຶ່ງເປັນທີ່ຮູ້ກັນແກ່ໂລກພາຍນອກວ່າ ເປັນກະສັດທີ່ແປກ ຕ່າງໝູ່
ເຊັ່ນວ່າ ມັກຂີ່ລົດແທັກຊີອ້ອມກຸງລອນດອນເພື່ອຊົມເມືອງນັ້ນ ຈະຢູ່ໃນຄວາມຊົງຈໍາ
ຂອງໄພ່ຟ້າປະຊາກອນຂອງພະອົງ ວ່າເປັນຜູ້ນໍາເອົາປະຊາທິປະໄຕ ມາສູ່ປະເທດ
ເກາະດອນນ້ອຍໆແຫ່ງນັ້ນ ທີ່ມີປະຊາກອນພຽງ ແສນ ຄົນ. ພະອົງໄດ້ຂຶ້ນຄອງ
ລາດເປັນເຈົ້າຊີວິດ ໃນເດືອນກັນຍາ ປີ 2006 ຫລັງຈາກການສິ້ນພະຊົນຂອງພະບິດາ
ກະສັດ Taufa’ahau Toupou ທີ 4.
ໃນເດືອນພະຈິກ 2010 ປະເທດຕົງກາໄດ້ຈັດການເລືອກຕັ້ງໂດຍກົງຄັ້ງທໍາອິດຂຶ້ນ
ຊຶ່ງເປັນຂີດໝາຍຈຸດອາວະສານຂອງການປົກຄອງໂດຍ ເຈົ້າຊີວິດ ມາເປັນເວລາຫລາຍ
ຮ້ອຍປີນັ້ນ. ຕໍ່ມາໃນເດືອນທັນວາ ສະມາຊິກສະພາທີ່ຖືກເລືອກຕັ້ງຂື້ນມາໃໝ່ ກໍໄດ້ຮັບ
ຮອງເອົາ Lord Tu'ivakano ເປັນນາຍົກລັດຖະມົນຕີຄົນທໍາອິດ. ໃນອະດີດນັ້ນ
ນາຍົກລັດຖະະມົນຕີແມ່ນໄດ້ຖືກແຕ່ງຕັ້ງ ໂດຍກະສັດ.