‘ຄິມ ຈອງ ອຶນ’ ປະກາດວ່າ ພ້ອມດຳເນີນນະໂຍບາຍຕໍ່ຕ້ານສະຫະລັດ ຂັ້ນສຸດ ກ່ອນທ່ານທຣຳ ເຂົ້າຮັບຕຳແໜ່ງ

ຜູ້ນຳເກົາຫຼີເໜືອປະກາດຄວາມພ້ອມຈະດຳເນີນນະໂຍບາຍຕໍ່ຕ້ານສະຫະລັດ “ທີ່ແຂງກ້າທີ່ສຸດ” ໃນຊ່ວງເວລາທີ່ເຫຼືອອີກບໍ່ເຖິງ 1 ເດືອນກ່ອນທີ່ ວ່າທີປະທານາທິບໍດີ ດໍໂນລ ທຣຳ ຈະເຂົ້າຮັບຕຳແໜ່ງຢ່າງເປັນທາງການ ອີງຕາມລາຍງານຂອງອົງການຂ່າວເອພີ.

ອົງການສູນກາງຂ່າວຂອງທາງການເກົາຫຼີເໜືອ KCNA ລາຍງານໃນວັນອາທິດວ່າ ຄິມ ຈອງ ອຶນ ກ່າວລະຫວ່າງເຂົ້າຮ່ວມກອງປະຊຸມໃຫຍ່ຂອງພັກແຮງງານເກົາຫຼີ (Workers’ Party of Korea) ເຊິ່ງປິດສາກສົງໄປເມື່ອວັນສຸກ ວ່າ ສະຫະລັດນັ້ນ ເປັນ ຢລັດສັງຄົມນິຍົມທີ່ສຸດ ທີ່ເບິ່ງແນວທາງຕໍ່ຕ້ານຄຸມມິວນິສເປັນນະໂຍບາຍແຫ່ງລັດ ທີ່ບໍ່ມີທາງປ່ຽນແປງໄດ້” ພ້ອມຊີ້ວ່າ ຄວາມເປັນຮຸ້ນສ່ວນດ້ານຄວາມໝັ້ນຄົງ ສະຫະລັດ-ເກົາຫຼີໃຕ້ ແລະຍີ່ປຸ່ນ ນັ້ນ ກຳລັງຂະຫຍາຍຕົວເຂົ້າສູ່ການເປັນ “ກຸ່ມກ້ອນທາງທະຫານດ້ານນິວເຄລຍເພື່ອການຮຸກຮານ” ແລ້ວ.

ຄິມ ຍັງກ່າວດ້ວຍວ່າ “ຄວາມເປັນຈິງນີ້ ສະແດງໃຫ້ເຫັນວ່າ ທິດທາງທີ່ເຮົາຄວນຈະມຸ້ງໜ້າໄປ ຄືທາງໃດ ແລະເຮົາຄວນເຮັດຫຍັງ ແລະຢ່າງໃດດ້ວຍ.”

ອົງການຂ່າວ KCNA ບໍ່ໄດ້ໃຫ້ລາຍລະອຽດກ່ຽວກັບຍຸດທະສາດທີ່ວ່ານັ້ນ ແຕ່ກ່າວວ່າ ຄິດໄດ້ສັ່ງການເຮັດພາລະກິດເພື່ອຍົກລະດັບຄວາມສາມາດທາງການທະຫານ ດ້ວຍການເລັ່ງພັດທະນາເທັກໂນໂລຈີດ້ານການປ້ອງກັນແລະເນັ້ນຢ້ຳຄວາມຈຳເປັນໃນການປັບປຸງຄວາມແຂງແກ່ນດ້ານຈິດໃຈຂອງທະຫານເກົາຫຼີເໜືອດ້ວຍ.

ໃນຂະນະທີ່ການພົບກັນລະຫວ່າງ ຄິມແລະວ່າທີ ປະທານາທິບໍດີ ດໍໂນລ ທຣຳ ເມື່ອຫຼາຍປີກ່ອນ ບໍ່ໄດ້ນຳມາເຊິ່ງການເລີກໃຊ້ວາທະສິນຮ້ອນແຮງໃສ່ກັນ ຫຼືແມ່ນແຕ່ຄຳຂູ່ການທຳລາຍລ້າງກັນເລີຍ ເຫດການດັ່ງກ່າວກາຍມາເປັນຈຸດເລີ້ມການສ້າງຄວາມສຳພັນໃນແງ່ສ່ວນບຸກຄົນ ໂດຍ ທຣຳ ເຄີຍອອກປາກກ່າວໄວ້ວ່າ ຕົນແລະຄິມນັ້ນ “ຕົກຫລຸມຮັກກັນ” ກ່ອນທີ່ແຜນການຫາລືຂອງທັງສອງຜູ້ນຳ ຈະພັງລົງໃນປີ 2019 ໃນຊ່ວງທີ່ຍັງພິພາດກັນ ໃນເລື້ອງມາດຕະການລົງໂທດເກົາຫຼີເໜືອ ທີ່ສະຫະລັດ ເປັນຜູ້ນຳພາ.

ຈາກນັ້ນມາ ເກົາຫຼີເໜືອໄດ້ເລັ່ງດຳເນີນກິດຈະກຳທົດລອງອາວຸດຕ່າງໆຂອງຕົນ ເພື່ອສ້າງຄັງແສງຂີປະນາວຸດນິວເຄລຍ ທີ່ແນເປົ້າໄປຍັງສະຫະລັດ ແລະພັນທະມິດທັງຫຼາຍ ຂະນະທີ່ສະຫະລັດ ແລະເກົາຫຼີໃຕ້ຕອບໂຕ້ດ້ວຍການຂະຫຍາຍແຜນງານຊ້ອມລົບໃນລະດັບທະວິພາຄີ ແລະລະດັບສາມຝ່າຍທີ່ມີຍີ່ປຸ່ນເຂົ້າຮ່ວມນຳ ໂດຍທັງໝົດຍັງເຮັດໃຫ້ເກີດສຽງຂຶ້ນມາຈາກເກົາຫຼີເໜືອທີ່ວ່າ ກິດຮຈະກຳເຫຼົ່ານັ້ນ ເປັນການຊ້ອມຮຸກຮານຕົນ.

ຄວາມພະຍາຍາມປົດອາວຸດນິວເຄລຍເກົາຫຼີເໜືອ ຍິ່ງຫຍຸ້ງຍາກຫຼາຍຂຶ້ນ ເມື່ອພຽງຢາງຫັນໄປເສີມສ້າງຄວາມສຳພັນທາງທະຫານກັບຣັດເຊຍ.

ການປະເມີນໂດຍເກົາຫຼີໃຕ້ ຢູເຄຣນ ແລະສະຫະລັດ ລະບຸວ່າ ເກົາຫຼີເໜືອສົ່ງທະຫານກວ່າ 10,000 ຄົນ ແລະອາວຸດຕ່າງໆ ໄປສະໜັບສະໜູນມົສກູ ໃນການເຮັດສົ່ງຄາມກັບຢູເຄຣນ ໂດຍເຫດການນີ້ ເຮັດໃຫ້ເກີດຄວາມກັງວົນວ່າ ຣັດເຊຍອາດຕອບແທນເກົາຫຼີເໜືອ ດ້ວຍເທັກໂນໂລຈີອາວຸດທັນສະໄໝທີ່ອາດຊ່ອຍພຽງຢາງສ້າງຂີປະນາວຸດນິວເຄລຍຊົງພະລັງຂຶ້ນມາໄດ້.